عفواً .. انا غير متضامنة

طبعا معظمنا سمع عن قضية هبة نجيب ياإما من الفيس بوك او حتى من مواقع او مدونات تانية كتير وحتى لو مكنتش سمعت ممكن تعرف عن الموضوع أكتر من هنا


بصراحة انا مش فاهمة او يمكن كل حاجة واضحة والعيب فى قدراتى الذهنية اللى بقت فى النازل اليومين دول ، انا لما قريت كل اللى اتكتب حاولت أحط صوباعى على المشكلة مالقتش مشكلة اصلا عشان افكر فيها ، كل الحكاية ان البنت عايزة تسيب السعودية وعايزة ترجع مصر لوحدها ووالدها معترض .. مشكلة عائلية بحتة بس بما انها بقت علانية والكل بيدلوا بدلوه فمعلش حقول رأيي واستحملونى


انا شايفة ان اعتراض والدها ده شئ طبيعى جدا حتى لو كانت فى مصر بردو حيعترض ، يعنى الفكرة مش فى كون الاسرة فى السعودية او مصر الفكرة فى كونها اسرة عربية بتخاف على أبنائها ، وبيزيد إستغرابى لان اصلا خوف الأهل علينا ده شئ كويس مش وحش وعمرى ما اتضايقت منه بالعكس ، كنت كل ما اقرا فى جريدة او اشوف فى التليفزيون جريمة بشعة من اغتصاب وسرقة وقتل وبلاوي زرقا كنت اخاف انا على نفسى اكتر واقدر اوى اللى يخاف عليا


كنا مع الموضوع ده او ضده انا شايفة ان فى ناس كتير اوى بتحاول تخلى القضية نسائية زيادة عن اللزوم ، وحجتكم ان كل ده بيحصلها عشان هي بنت إنما لو كانت ولد كان حيقف قدام ابوه ويرفض طلبه ويعارضه ويروح مطرح ماهو عاوز ... انا بسأل هل حتى الولد اللى يعمل كدة يبقى صح؟ .. ماهو كمان غلط ويبقى ابن عاق وحرام عليه اللى بيعمله


ومش معنى ان الولد بيغلط او مجتماعتنا سامحة للولاد بالغلط فى القدرة على الوقوف فى وجه الأهل وعصيان أوامرهم يبقى نطالب للبنت بالمثل ، وللعلم حاليا ومع الجرائم اللى كترت أوى بقت الاهالى تخاف على الولد زى البنت واحيانا الولد أكتر


ليه كل حاجة نلزقها فى أنثى ضايع حقوقها فقط لكونها أنثى؟؟؟ ... كأننا على راسنا بطحة واى حد يجي جمب اى أنثى تبقى مصيبة سودا على راسه


انا شايفة ان عمر مافى حاجة بتحصل بالعافية خصوصا مع الأهل لأن فى ايديهم باب الجنة أساسا وطاعتهم فرض وربنا قرنها بعدم الإشراك بيه .. المفروض ان العلاقة تتصلح بين البنت ووالدها ونسعى اننا نصلحها ومافيش حل غير كدة بدل ما نمشى ورا دماغنا ونسافر بلد أهلها نفسهم واللى طول عمرهم فيها ومخرجوش منها أبدا مش عارفين يتعاملوا او يتعايشوا فيها فمابالكم بأى حد جاى من بلد غريبة وطباعها مختلفة وكل حاجة فيها مختلفة عن هنا


ولو انى حاسة بردو ان فى حاجة مش واضحة .. يعنى هل للبنت قرايب هنا فى مصر حتقعد عندهم ولا هى عايزة تسافر وخلاص حتى لو حتقعد لوحدها .. وطبعا احنا عارفين اننا بنتكلم عن مصر مش انجلترا ... مصر اللى لو واحدة بس قاعدة بطولها هيا وعيالها ومطلقة او أرملة مش بتخلص من كلام الناس ... فمابالكم بآنسة


انا مش عايزة نجرى ورا العواطف وتاخدنا الهمة ونعمل منشتات كبيرة وإعلانات فى مدوناتنا انا اتضامن مع هبة نجيب .. انا شايفة ان اللى عايز يفيد البنت دى فعلا يكلمها بالعقل ويحاول يفهمها انها ممكن تندم بعد كدة لما تلاقى نفسها بطولها ومحتاجة لأهلها .. وكلنا أصلا محتاجين لبعضينا فمحدش يقولى مش حتحتاجهم ... حتى فى ابسط الأمور لو اتجوزت ولا حاجة حتحتاج أهلها يكونوا معاها


لازم نبص لقدام ويبقى عندنا بعد نظر ... خطوة السفر دى صح ولا غلط ونتيجتها ايه فى المستقبل


ده غير ان فى نقطة محيرانى الصراحة .. دلوقتى البنت بتقول ان اسبابها فى طلب السفر هو مش لمجرد السفر وإنما للبعد عن هذه الأسرة بإعتقادتها وأساليبها الدينية الخانقة بالنسبة لها ، طب إفرض ان البنت دى عايشة هيا واسرتها فى مصر ومافيش السعودية دى خالص كان حيبقى ايه الحل؟ ... هل حنطالب ساعتها انها تسيبهم وتسافر اى بلد تانية ولا تستقل عنهم وتعيش فى شقة لوحدها؟

وكمان مش عايزين ننسى ان فى بنات كتييييييييييييييييييييير اوى فى مصر بيعانوا من اللى بتعانى منه هبة ده ... وبردو مش عايزين ننسى ان البنت والولد كمان حاليا بيعانوا يمكن من حاجات أكبر من الأسرة نفسها زى البطالة والفقر والعنوسة وحاجات كتيرة أوى ، يعنى الكل مخنوق ولو عايزين ننقذ حد من الخنقة كنا أنقذنا نفسنا الأول

ولأنى عارفة مصر واللى فى مصر فأنا مستغربة بصراحة هذه الرغبة القوية لهبة فى العودة الى مصر ، يمكن اللى مقلل إستغرابى شوية انها ماقعدتش فيها كتير وكانت زيارتها ليها قليلة أوى .. لأنها لو كانت طولت كانت حتعرف قد ايه فى جرائم من قتل وسرقة وإغتصاب وخلافه وقد ايه في فقر وبطالة وارتفاع أسعار وأزمة مواصلات وتلوث وأمراض واللى كان آخرها التيفود والمحاصيل الزراعية المروية بمياه الصرف الصحى ... ده اللى قاعد فى مصر نفسه يطفش وينفد بجلده من المصايب المتلتلة اللى نازلة على دماغ أهلها من كل مكان

فجأة بقت مصر جميلة ونظيفة وحلوة ... ده لدرجة ان الناس نفسهم يرجعوا لحضنها تانى .. حضنها اللى تعبنا من كتر الشوك اللى فيه ، والموضوع كبر وخد أكبر من حجمه وكل اللى فى مصر حسوا انهم فعلا فى بستان آخر الزمان اللى مليان مانجة ورمان واللى بيساندوا ياعينى اختهم اللى قاعدة بعيد عن البستان ومش لاقية لا مانجة ولا رمان

ألا هو الرمان بقا بكام دلوقتى؟

الحقيقة انا شايفة انها تستهدى بالله وتتقرب من ربنا وتصلى وتدعى ربنا يعينها ويقويها وتصبر وتحتسب وتسمع كلام أبوها وتحاول تصلح العلاقة اللى بينهم وفى الأول وفى الآخر دول أبوها وأمها وأكيد بيحبوها وعايزينلها الخير وأكيد ربنا حيعوضها خير إن شاء الله فمن ترك شيئاً لله عوضه خيراً منه ، وحيلف الزمن ومشكلتها حتتحل وهى نفسها لما تبقى أم عمرها ما حترضى ان الوضع بينها وبين ولادها يوصل للمرحلة دى ولا إن ولادها " ولد أو بنت " يوقفوها الموقف ده فى يوم من الأيام

وانا عن نفسى حدعيلك ربنا يهديلك نفسك ويهديكى للى فيه الخير والصواب فى دنيتك وآخرتك اللهم آمين

  

تحديث

بعد تبنى «المصرى اليوم» قضيتها.. هبة نجيب المحتجزة فى السعودية تتوصل لتسوية عائلية

وتنهال التهانى من كل صوب لتهنى هبة لأنها وقفت أمام القهر والظلم وإستطاعت ان تأخد حريتها بعد 3 سنوات من العناء ، طب معلش احنا عندنا مشكلة بسيطة كدة اننا بنفكر وعندنا دماغ والمأساة الأكبر ان لينا رأى وده بيضايق الكثير بس معلش 

 

 

عايزة أعرف بس منين متشدد ومنين سمح بعمل تسوية عائلية تسمح للبنت بالسفر دون تدخل أطراف خارجية؟

وازاى نوصفه بالتشدد أصلا دون ان نسمع وجهة نظره؟؟ وكمان ازاى يبقى متشدد بعد ما عرفنا انه اقتنع هو والأسرة بإن إستمرار هبة فى السعودية يضر بها نفسياً ؟؟

السؤال دلوقتى بقا ... هل الأب ده فعلا متزمت ومتشدد ولا كلنا ظلمناه وتحاملنا عليه وأولنا بنته نفسها؟؟؟

 

وبعدين إزاى نص الخبر بيقول ان الأب والأسرة إقتنعوا بكدة بدون تدخل أى أطراف خارجية وإزاى تطلعلنا المصرى اليوم وتقول ان بعد ما الجريدة اتبنت قضيتها أخيرا عرفت تحصل على تسوية عائلية وان البنت بتشكر الجريدة على إهتمامهم بقضيتها 

 

طب معلش يعنى البنت حلتها لوحدها أهو فى الآخر .. من غير لا سفارة ولا حقوق إنسان ولا وزارة خارجية ولا فيس بوك ولا مدونات ولا حاجة أبدا ... طب ليه مانعملش كدة من الأول بدل مانشهر بإسم الأب فى كل حتة وسيرتنا وسيرة حاجة أسرية تبقى على كل لسان وفى الجرايد والجروبات والمدونات؟ 

 

هبة أعذرينى انا مش قادرة أهنيكى وأقف فى طابور المهنئين الطويل اللى شغال تهانى وناقص يزغرطوا ويطرقعولهم صندوق ساقع على النصرة القوية دى ... يمكن مش قادرة أعمل كدة لانى كنت فى يوم من الأيام زيك وفاكرة انى لو بعدت حبقى أحسن وحبقى مبسوطة .. وسبحان الله فعلا بعدت وبقيت فى بلد غير البلد خالص ... بس ساعتها بجد ماكنتش مبسوطة ولا حاجة ولا عمرى عرفت آخد فرحتى كاملة وأهلى كلهم بعيد عنى ولا عمرى قدرت أنسى اللى ربوا وكبروا وصبروا وصرفوا وعلموا وعملوا كل حاجة علشانى .. ودلوقتى بتمنى أشوفهم ولو حتى فى صور او اسمع صوتهم ونصيحتهم فى اى حاجة فى حياتى 

 

كانت أمى وأبويا دايما يقولوهالى زمان ... عمر ماحد فى الدنيا دى يقدر يحبك زى أمك وأبوكى ... احنا حبنا ليكى خالص ونقى ومن غير اى طلبات او شروط .. إحنا بنحبك وبس 

 

أتمنى تراجعى نفسك وحتى تمشى وهما راضيين عليكى وماتنسيش تقبلى إيدهم قبل ما تسافرى