بيقولوا فى عصابات بتخطف فى الستات

كنت بتفرج على برنامج صبايا لاقيت المذيعة بتتكلم عن موضوع غريب جدا .. ألا وهو خطف البنات ، بصراحة استغربت لانى اعرف ان الأطفال هما اللى بيتخطفوا عشان تجارة الأعضاء وكدة ... وعموما جرائم الخطف بيبقى هدفها مساومة الأسرة على مبلغ فدية زى ما بنشوف فى الأفلام كدة ، بس اللى استغربتلوا المرة دى ان اللى بيخطف مش بيبقى ناوي يرجع البنت اللى خطفها أصلا لأنه خطفها لوضعها فى إحدى بيوت الدعارة ليجبرها على البغاء

طبعا اللى حيسمع الكلمتين دول حيفتكرنى بتكلم عن أمريكا مثلا لان الموضوع ده منتشر هناك فعلا او على الأقل بيحصل لكن دى بجد اول مرة اسمع بالموضوع ده ... البنت رجعت وخدت المذيعة والكاميرا بالليل وورتها فين البيت اللى كانت مخطوفة فيه وكانوا بيعملوا فيها ايه بالظبط وفى باقى المخطوفات

كانت حلقة كلها فرحة ان البنت دى رجعت الحمد لله صاغ سليم ربنا قدرها وعرفت تحافظ على نفسها بأعجوبة ، إنما اللى عكر صفو الحلقة وبيوت كل اللى شافوا الحلقة هى ان فى بنت تانية اتخطفت ، اتخطفت فى وضح النهار الضهرية لما راحت تجيب خضار لأمها والبنت لغاية دلوقتى محدش عارفلها طريق جرة، طبعا والدتها منهارة وانا انهرت معاها وبقيت ادعى ان ربنا يرجعلها بنتها بالسلامة يارب

بس قلت يمكن صدفة .. أكيد يعنى مش ظاهرة ولا حاجة، لحد ما جه تاني يوم وجه برنامج الحياة اليوم ولاقيت بلاغ تانى عن بنت تانية اتخطفت بردو فى وضح النهار ، ام البنت كانت تعبانة فالبنت واخوها خدوا امهم وراحوا بيها المستشفى وهناك كان فى واحدة على كرسى عجل طلبت من البنت انها توديها الحمام .. ومن ساعتها البنت اختفت ، اخوها راح يشوفها اتأخرت ليه لقى الست ام كرسى وجمبها راجل سألها قالتلوا بنت مين انا ماشوفتش بنات!!! ... دور فى باقى الأدور ورجع تانى لاقى الكرسى اللى كانت الست قاعدة عليه فاضى ومافيش حد خالص .. وإلى الآن لم تعد

وبردو جريمة اختطاف تانية فى شبرا الخيمة برنامج 90 دقيقة اتكلم عنها .. بنت اسمها آية عندها 18 سنة راحت تشترى الفطار واتأخرت لغاية الساعة 11 الصبح ، وبعد شوية اتصلت من على تليفونها وكلمت أمها وكانت بتصرخ وتقوللى الحقينى ياماما !!أنا باتخطف

 الغريب هو كثرة الحوادث على اختلاف اماكنها والغريب كمان هو طريقة عز الضهر دى .. كانوا زمان بيعملوا معاد معين للبنت بعده ماتخروجش من بيتها ... دلوقتى بقا الصبح زى بالليل .. كله خطر

فكرونى بأغنية فى مسرحية ريا وسكينة " بيقولوا فى عصابات بتخطف فى الستات " .. وكمان التشابه الكبير فى طريقة الخطف نفسها .. الوضع ماختلفش كتير والله اعلم الهدف سرقة ولا قتل ولا دعارة ولا يمكن اكتر من كل ده

 

انا بتكلم وكاتبة البوست عشان اسأل راح فين الأمان من شوارعنا ... لما بنت فى عز الضهر وفى قلب شارعها وتخطف وماتظهرش والايام تعدى والشهور ويمكن السنين الله أعلم وأهلها مش عارفين عنها اى حاجة خالص ده يبقى اسمه ايه؟؟؟

يا جماعة الموضوع بجد صعب .. حتى أصعب من الموت ، على الأقل اللى بيموت بيتدفن وتبقى عارف هو فين وأهو قدر ربنا وقضائه .. إنما المخطوف ده لا حد عارف هو حى ولا ميت ولا هو سليم ولا مصاب ولا بيحصل فيه ايه بالظبط ولا حتى هو فى انهى بلد

انا خايفة .. خايفة على نفسى وعلى اهلى وعلى كل بنت فى البلد دى .. خدوا بالكوا من بناتكوا يا جماعة ... ما تبعتوهمش فى حتة لوحدهم او حتى لو نزلت تجيبلك حاجة من تحت بصى عليها لحد ما ترجعلك بالسلامة

رمضان داخل وأهالى كل البنات دى مش حسيين بأى فرحة .. ولا عارفين بناتهم فين ولا بيحصل فيهم ايه .. ياريت كلنا ناخد بالنا بجد وننتبه أوى للموضوع المقزز ده .. وندعى للأهالى دى ربنا يردلهم بناتهم بالسلامة يارب اللهم آمين ، كل سنة وانتوا طيبين يا جماعة وآسفة اوى انى نكدت عليكوا بس بجد ادعولهم وربنا يسترها علينا وعلى الجميع اللهم آمين

مش عارفة اقول غير انى خايفة يا مصر ... خايفة يا بلد الأمن والأمان .. خايفة منك ومن اللى بيحصل لأهلك فيكى .. خايفة اوى

مع كل اللى بيحصل ده يا أخى يجيلك واحد كدة ماتفهمش ده عايش فى نفس بلدك ولا بلد تانية ولا ايه بالظبط .. وقاعد يغنى ويلعلع ويقولك: زى ما عشت الأمان عايز ولادي يعيشوه .. ايه يعنى جمال مبارك يجي بعد أبوه؟ 

مش عارفة بقا هو مش فاهم ولا بيستهبل ولا يكونش هو رئيس العصابة اللى بتخطف فى الستات دى وبيخطفهم فى أمان وسلام وفى عز الضهر عشان كدة متحمس أوى للأمان اللى فى الشوارع