Wednesday, February 10, 2010

الشمس الشموسة


كان فيه يا بلدنا يا نسّاية .. حتة بسكوتة فريسكاية

ع الشط تبعتر ضحكتها .. تفرش حدوتة و غنواية

نشوانة بسحر جلال الكون .. عشقانة جمال الصوت و اللون

هيمانة ف حلم جميل حيكون .. عنوان الأيام الجايّة

بتحب الناس و الناس ناسيين .. و بتحلم تكسي الكون فساتين

و قلوب الناس تطرح بساتين .. التينة جنب العنباية

و البنت الشمس الشموسة .. مع كل صباح تبقى عروسة

تطلع على مصر المحروسة .. فرحة بزغروتة بضحكاية

------

كان فيه يا زمان عصفور إنسان .. في الجو شريد و مالوهش مكان

و الصقر معربد و العصافير .. طايرين خايفين و الغدر جبان

بيلملم عشه عود على عود .. و بيفرش جنة للموعود

و اكمن مفيش للحب حدود .. فرحان في الروحة و في الجاية

و البت الشمس الشموسة .. مع كل صباح تبقى عروسة

تطلع على مصر المحروسة .. فرحة بزغروتة بضحكاية

كان فيه يا بلدنا يا نسّاية .. حتة بسكوتة فريسكاية

ع الشط تبعتر ضحكتها .. تفرش حدوتة و غنواية
أحمد فؤاد نجم

3 comments:

  1. احسنتى والى الامام دائما

    ReplyDelete
  2. صباح الفل ... من اجمل ما كتب الفاجومى .. اختيار جميل .. دمتى بود :)

    ReplyDelete
  3. افتكرتى تقولى نجم و نسيتى عمرو ابو ذكرى...ده نص جمال التتر ده فى موسيقى عمرو ابو ذكرى

    ميرسى على اختيارك الهايل..بجد متعتينا

    ReplyDelete

الكلمـة نـور .. وبعـض الكلمـات قبـور