Friday, February 12, 2010

يا دموعي

يا دموعي أرحميني بقى وأهجريني

يا دموعي سيبيني فى حالى عشان أعرف أعيش

يا دموعي كفاية عشان خاطري

عشان خاطري ماتحاوليش

مش ح يرجع صدقيني

ولا حد فى الطريق

صدقيني ماتقاوحيش

الدكاترة قالوا كدة

استني ماتحلميش

يادموعي كفاية والنبي

قلبي ماعدش عارف يعيش

عارفة انك حاسة بيا

عارفة انه واحشك زي ماواحشني

عارفة انك نفسك تشوفيه أوي

بس خلاص ياحبيبتى

ثلاث شهور عدوا

وح يعدي زيهم قد ما ح نعيش

كتير أو قليل

عارفة انك حزينة على بعد الأمل فى اللي جاي

بس ارجوكي ماتنزليش

باتعب منك أوي يا دموعي

وانتى مابتصبرنيش

لوحدي !؟

آه لوحدي طب وماله

ما أنا بأقرا أهوه

وبأحاول

بأحاول أخرج برة قلبي

برة حزني وهمومي

برة ألمي وابتلائي

برة مكاني وزماني

برة روحي وجروحي

برة نفسي

بأحاول أهرب منك يا دموعي

بأحاول أفلفص منك وأعافر

عشان ما تغرقنيش

يمكن ألاقي ضحكة تايهة تحن عليا وتقعد معايا

أضحك معاها يمكن أنساكي وتنسيني

يا دموعي

تعبت منك أوي وماعدتش مستحملة

ده انا قلبي داب منك خلاص واتهرى

يا دموعي اسمعي كلامي وإبعدي بقى

يمكن أعرف أعيش

13 comments:

  1. جميييييييييييييييل الدمعة من عينى فرت

    ReplyDelete
  2. طيب و ليه ما تفكريش ان دموعك دي نعمة من ربنا بتبرد على قلبك
    و ان عدم مجيئ ما تنتظري فرصة ليكي علشان تستغلي فراغك في كل اللي نفسك فيه
    تحفظي قرآن و تعلمي ناس اميين و تتعلمي كروشية و خياطة و تتفسحي انت و جوزك في اي وقت و كل مكان من غير ما حاجة تنغص عليكي حياتك

    و ليه مايكونش ربنا عايزك تقربي منه و يسمع صوتك دايما بيدعيه و يناجيه
    مش يمكن مدخرلك الافضل؟ مش يمكن ليه حكمة؟ مش يمكن عطاؤه اقربلك مما تتصوري
    ده أكيد
    ربنا زي ما اخد ...ابقى
    أخد اللي بتحبيه و ابقى لك لسان ذاكرا و بدنا صابرا
    و اصدقاء بيحبوكي من غير ما يعرفوا شكلك

    ادعي و انا حدعي معاكي.. بس لما يجي اللي بتستنيه مافيناش من عياط و ترجعي تقولي جتها نيله اللي عايزة
    حبي و سلامي

    ReplyDelete
  3. دموعك أثرت فيا

    لك كوني على ثقة
    أن ربنا كاتبلك الأجمل في علم الغيب

    ReplyDelete
  4. ربنا يفك كربك
    ويصبرك
    ويرزقك الذرية الصالحة
    انه ولى ذلك والقادر عليه
    دايما قولى
    يامن يجيب المضطر اذا دعاه ويكشف السوء
    رب انى مسنى الضر وانت أرحم الراحمين

    ReplyDelete
  5. تعرفى انا لو مكانك هعمل ايه؟؟؟
    هحمد ربنا انى فقدته قبل ما يكبر قدام عينى ويبقى بينى وبينه ذكريات كتير

    هحمد ربنا ان قلبى متحرقش اكتر من كدة عليه لما يموت بعد ما كان مالى الدنيا بوجوده وحاجته ولعبه ولبسه

    هحمد ربنا انه مسابليش حاجات كل ما اشوفها قلبى يتحرق اكتر عشان ريحته فيها

    لو مكانك هحمد ربنا اوى اوى

    ReplyDelete
  6. حبيبتى لو تعرفى ان الابتلاء ده معناه حب ربنا ليكى دموع حزنك هتتبدل افراح
    مين يطول انه يلاقى ايد تاخد بايده وتساعده يعدى الصراط المستقيم الارفع من الشعرة وتحته جهنم والعياذ بالله
    مين يطول يلاقى عزوة فى الجنة من دمه يفرح بيهم ويفرحوا بيه
    ويتلاقوا فى احلى حياة بعد الفراق
    الدنيا متستاهلش مننا ابدا اننا نزعل على حاجة فيها
    لانها دار ابتلاء مش دار متاع
    كل اللى علينا اننا نصبر ونحتسب
    وربنا يوفينا اجرنا فى الاخرة ان شاء الله بافضل مما كنا نحلم به او يرد الى خيالنا فى الدنيا

    ربنا يصبرك يا ياسمين ويكرمك بالذرية الصالحة التقية
    ويجمعك بابنك وكل من تحبين فى الاخرة بعد طول عمر ان شاء الله

    ReplyDelete
  7. السلام عليكم ورحمة الله وبركاته
    ربنا يصبر قلبك
    وينعم عليكى بنعمة الصبر والنسيان يارب
    والحمد لله على كل اللى يجيبه
    قضاءه كله خير وليس لنا الا الحمد والصبر
    تقبلى مرورى وتحياتى
    مصطفى المعتصم

    ReplyDelete
  8. صدقيني .. الأيام هي أقصر حاجة في الدنيا دي

    مهما كان شكل الأيام كتير .. ومهما الواحد حس ان الإنتظار بياخد وقت طويل جدا وممل جدا .. كله في الأخر بيخلص وبينتهي

    تفتحي عين وتغمضي عين تلاقي الست شهور خلصوا بسرعة .. وتسعة وراهم هوا كمان

    روقي كده

    ReplyDelete
  9. ياما قلوب موجوعه وحزينه
    ولا حد حاسس بيها

    حزينه اوى

    ReplyDelete
  10. وجعتى قلبي :(

    الحل هو الصبر و الدعاء و الثقة بأن الله سيبدل الحال بأفضل مما نتخيل

    ReplyDelete
  11. السلام عليكم
    ادعوكم لمتابعة مدونتي الجديدة التدبر
    تحت العنوان التالي : http://altadebor.blogspot.com/

    ReplyDelete
  12. انتى كاتبه الى انا حاسه بيه بالظبط

    :(

    ReplyDelete
  13. http://www.facebook.com/group.php?gid=315061881193
    مدونة باللغة الصينية

    ReplyDelete

الكلمـة نـور .. وبعـض الكلمـات قبـور