Friday, September 24, 2010

يعني ايه صافي سليم؟



يعني ايه صافي سليم؟ يعني كل الوزراء ورجال الأعمال وكبارات البلد يعرفوكي ومعاهم رقم تليفونك كمان ، ومش بعيد يكونوا بيدوكي ميسد كول وبتكنسلي عليهم يا قادرة  

يعني ايه صافي سليم؟ يعني يبقى اسمك صافي سليم مع إن الحقيقي أمينة عبد الحميد ، وتستعري  من هذا الأسم العريق ، رغم إن أكبر ممثلات الزمن الجميل كان إسمها أمينة رزق ، وصاحبة أول صلعة فى الدراما التليفزيونية هي الفنانة فردوس عبد الحميد

يعني ايه صافي سليم؟ يعني تفضلي طول عمرك مصيبة، وكل شوية مصيبة من مصايبك تبان ...  مرة بتاعة علاقات مشبوهة ، مرة مدمنة حشيش ، مرة أمينة صديقة الطلبة .. خايفة لا تطلعى فى الآخر انتى اللى سرقتي لوحة زهرة الخشاش وبلعتيها على إنها لفافة بانجو تبقى مصيبة 

يعني ايه صافي سليم؟ يعني تطق فى دماغك إنك تتجوزي - الله أعلم للمرة الكام - لأ وكمان تعملي فرح .. وبعيد عنك كان فرح جملي ومليان مصايب متلتلة .. المصيبة الأكبر فى نظري إن الفرح خلص قبل ما البوفيه يتفتح 

يعني ايه صافي سليم؟ يعني تطلعي السويت مع عريسك بعد الفرح المنيل تلاقي سي دي فاضح ليكي - إخص على دي تربية – وجوزك يدب معاكي خناقة  ويتخنق منك ويطلقك .. أحسن

يعني ايه صافي سليم؟ يعني تموتي وترتاحي من هنا واحنا نضرب أخماس فى أسدادس مين اللى قتلك .. مش أصول يعني تكتبي جواب ولا حاجة قبل ماتموتي تقوليلهم مين اللى قتلتك وتخلصينا يا ولية أنتى؟ ولا هي غلاسة وخلاص؟

يعني ايه صافي سليم؟ يعني حسن باشا محفوظ يطلع عينه فى كشف الحقيقة فى بلد لا تعرف الإحتراف أو الأمن أو النظام ، يا شيخة حرام عليكي تعباه حية وميتة ، مش كفاية عليه مراته الخنيقة والجيوب الأنفية؟ .. روحي يا شيخة إلهي تموتي أكتر ما انتى ميتة 

يعني ايه صافي سليم؟ يعني الشك يفضل يحوم حوالين الجميع فيتهموا سميرة طلعت اللى تطلع بتغير منك وبتكرهك وعلمتك الإدمان وتسببت فى تبويظ فرحك كمان ... إحساسك ايه لما حسن باشا خلاها تعترف بكل ده بعد ما موتي صحيح؟

يعني ايه صافي سليم؟ يعني تتجه أصابع الإتهام لجوزك الجراح العالمي المشهور (شريف راسخ) واللى نكتشف فى الآخر إنه لا دكتور ولا حاجة ولا عمره عتب كلية طب برجليه ، كل الحكاية إنه رجل أعمال ، صاحب محل فول وطعمية عقبال آمالتك

يعني ايه صافي سليم؟ يعني تتجه أذرع الإتهام لنديم كمال ، فنكتشف إنه ماقتلكيش ولا حاجة ، كل الحكاية إنه بيتعامل تجارياً مع إسرائيل بس ، بسيطة المهم إنه بريئ من دمك

يعني ايه صافي سليم؟ يعني كل شوية حد يمثل الجريمة ويلخبط اللى جابونا ، مرة نديم كمال ومرة على القاضي ومرة شريف راسخ ومرة خالد الصاوي .. ماكانش ناقص بس غير المخرج والمؤلف وكل واحد من الجمهور ياخدله لفة فى قلب مسرح الجريمة

يعني ايه صافي سليم؟ يعني نكتشف فى آآآآآخر حلقة إن اللى قتلك وضلل العدالة وخنقنا من أول المسلسل هو أبوكي .. خوفاً من إنك تفضحيه بعد السنين دي كلها - قال يعني مش مفضوح بخلفتك من أساسه - بس بيني وبينك كدة ياصافي ماتتكسفيش مش هقول لحد .. كنتي هتفضحيه بإيه؟ ها؟

يعني ايه صافي سليم؟ يعني البعض يجد إنه مش منطقى أبداً إن أبوكي اللى يقتلك ويغير أداة الجريمة فى رقبة بنته بدم بارد ده غير إن دوافعه غير كفاية لإرتكاب الجريمة ومش محبوكة كويس .. بس انا شايفة إنه منطقى أوي إن عم عبد الحميد هو اللى يقتلك .. ملك الكبدة بقى وقلبه ميت  

17 comments:

  1. باينة زى الشمس يا سمسم ..كانت هتفضحه انه اغتصبها و هى صغيرة ..التلميح كان واضح جداً فى الحوار

    على فكرة انتى كده غطيتى حاجات كتير م اللى كنت هقولها فى الريفيو ... شكلى كده مش هكمله

    منورة مدونتك بعد غياب :))

    ReplyDelete
  2. حلو قوى البوست دا يا ياسمينا

    الله ينور

    بس على فكرة بقى
    انا شايفة ان نهايته منطقية جداااا
    البنت دى تنويعة كدا على حكاية سوزان تميم
    و بصراحة رغم البسكرى و لا هشام و لا مين اللى قتلها بإيده ..و منعرفوش فعلا لحد دلوقتى
    انما انا شخصياً شايفة ان اللى قتلها بجد
    هوه ابوها
    اللى طالع ف الفضائيات يتجاهر بدمها
    و شوية يتهم واحد و شوية يتنازل
    كله عشان الفلوس
    الراجل (مجازاً)دا هوه اللى قتلها
    من اول مرة باعها او سابها تبيع روحها
    و عشان كدا نهاية المسلسل كانت هادية و عاجبنى قوى
    لما خالد الصاوى اخد بنته يفسحها
    و المشهد بمنتهى البساطة بيقول
    يا جماعة
    كل واحد ياخد باله من بنته
    و يحبها
    و يحافظ عليها
    تقوم متوصلش ف النهاية لهذا المصير

    انا اتفذلكت و رغيت
    معلش
    انا عارفة ان البوست كوميدى و ساخر
    بس انتى استفزيتى سفسطتى بقى

    تسلم ايدك يا حبيبتى

    ربنا يسمعنى عنك كل خير يا رب

    بوسات و حضونات
    يا جميلة

    ReplyDelete
  3. hehhehehheehehhehehehehhehhhehe gamda moooooooooooooot

    ReplyDelete
  4. هو انا برده كان عندى نفس السؤال
    هو ليه بعد ماخلاص خلونا نشك انه نديم كمال رجعوا وغيروا الاتجاه خالص
    وليه يبقى ابوها واللى انا فهمته انه ممكن يكون كان متحرش بيها وهيا صغيره وحاجه زى كده
    بس معرفش اذا كان اغتصبها ولا لأ
    بس الاكيد ان بلال فضل بجد عرف انه يشدنا للمسلسل دا
    بكل مافيه من بوليسيه شويه ورمانسيه شويتين وواقعيه شوياااات
    تسلمى يا ياسمين البوست حلو جدااا
    ونقدى جدااا

    ReplyDelete
  5. ههههه..واضح ان انتي شوفتي المسلسل كويس....بس للأسف ماشفتش المسلسل ..بس اكيد خالد الصاوي ابدع فيه

    ReplyDelete
  6. هههههههههههههههه

    انتي رهيييييييبه

    ربنا يكرمك زي ما ضحكتيني وانا مكتئبه

    تحياتي

    ReplyDelete
  7. ولله أول مره أعرفها لما قرأت عنها هنا
    يظهر اني جاهل اوي

    ReplyDelete
  8. انا طنت محوشة التعليق على التدوينة لغاية ما اخلص الفرجة على المسلسل .. وخلصته قبل دقيقتين بعون الله وسرعة البفرنج هيهيهيهي

    عجبتني كتير حتة "مهو ملك الكبدة وقلبه ميت" هههه فعلا فسرتلي حاجات كتير

    وفعلا ما كانش فاضل غير ان بلال فضل بذات نفسه يطلعلنا في اخر المسلسل وياخدله دور هو كمان ... انا حزنانة عليها الي عملت مشهد قتلها ولا ست سبع مرات ! الله يكون في عونها اكيد بيجيلها كوابيس

    اما المشهد الي توقفت عنده وعدته كتير .. بتاع لما حسن وداليا يقولو لبعض عن مشاعرهم فوق الكوبري ياااااااه مشهد بديع بديع ولا في الاخر وهما في الجنينة وعايز يمسك ايدها وهي شدتها منه الله الله الله فزيع فزيع فزيع .. اوعدنا يارب هههههههههه

    كمان بحيي فاتيما على التحليل العمييييق بتاعها عن اخر مشهد ..

    ReplyDelete
  9. انا شفت المسلسل بعد قطيعة طويلة مع المسلسلات و اعجبني

    ReplyDelete
  10. مساء الخير انسانه
    انا محمد . تشرفت بمرورى لمدونتك الرائعه. اسلوبك جميل وسلس .ارجو ان تقبلينى صديقا ومتابعا.
    وارجو ان تسعدينى بزيارة مدونتى المتواضعه يوميات انسان.mohamedgomaa22.blogspot.com حاجه كدا فى البدايه بس محتاجه دعم . ياريت متبخليش عليا بالمشوره
    تحياتى واحترامى الجم
    ابو يارا

    ReplyDelete
  11. بوست جميل ورائع
    بس فعلا المسلسلات كلها غريبة جدا

    ReplyDelete
  12. انا اول مره اشرك معك في هذه المدونه الرائعه
    قرأت كل المواضيع تقريبا وكانت غيه الروعه لانها رغم مواضيعها المهمه الا انها تزيل الهم عن القلب

    ReplyDelete
  13. قبل عرض المسلسلات كانت الدعايه قويه
    بس لما اتعرضت ,,,,في الحقيقه وجدتها كللللللها سخيفه ومضيعه للوقت

    ReplyDelete
  14. مع اني ما حضرتش المسلسل لعدة اسباب " هو اني مش من محبي المسلسلات كثير ، وكمان لانه بنتي راما حرماني من التلفزيون بسبب براعم وكراميش " إلا انه سمعت الكثير والكثير عن شخصية صافي وعن المسلسل ، بس بجد هاي الشخصية مش بس موجودة في مصر بل في كل العالم حتى غزة " يعني هي غزة حقها ناقص " ,,..عموما موضوع يستحق القراءة ، سلمت يمينك اختي

    ReplyDelete
  15. رائعة مدونتك
    ورائع تحليلك
    ولاذع نقدك
    لكنك
    عصرتى الحقيقة وصفتيها فى بوست
    ------------------------------
    مع تحياتى/ حازم ربيع

    ReplyDelete

الكلمـة نـور .. وبعـض الكلمـات قبـور