كاميكاز كبر وإتخرج من تحت إيدي .. قصدي اتخرج من الجامعة وبقى صوحافي محترم فى جريدة قومية محترمة – سامحني يارب الكذب حرام – ما علينا ، كاميكاز بعد الثورة أتنفخ وإتنفش وعمل فيها سبع رجالة فى بعض وكل ما يمشي ويلاقي بوستر للثورة يشتريه جري ، إذ فجأتن بقى ثورجي وعاشق لميدان التحرير – الله يرحم زمان ماكنش يعرف يعني ايه تحرير أصلا – بعد الثورة كاميكاز بقى من أكبر المتحولون .. مرة واحدة إتحول زي مازنجر وبقى ولا جيفارا فى زمانه
بعد ما مبارك اتنحى بكام يوم كاميكاز روح البيت وهو وماسك كمية بوسترات للثورة لا حصر لها بيقول لأمه وهو فرحان أوي: انا اللى فجرتها – انا اللى فجرتها !!!!ا
أم كاميكاز: فجرت ايه ياللى تنشك فى قلبك؟
كاميكاز: انا اللى فجرت ثورة 25 إبريل يا ماما .. إفرحي بقى
أم كاميكاز: يشفيك من الهبل يارب .. أولا دي كانت ثورة 25 يناير يا أحول .. ثانياً انت كنت نايم ساعتها
كاميكاز: يا ماما احترميني بقى مش كدة .. ثم انا فاكر انى كنت صاحي ساعتها وقاعد ع السرير ، حتى بالأمارة كنت بهرش فى راسي وفاتح بقي ، وأول ما قالوا إن الريس إتنحى قولت هيه .. حصل ولا محصلش؟
أم كاميكاز: حصل يا آخرة صبري .. بس يعني عشان قولت هيه بقيت بطل خلاص؟ .. نسيت يوم الجمعة لما صحابك قالولك إنزل وقولتلهم لأ انا بحب الريس؟
كاميكاز: إحم .. ايه يا ماما لازمة الكلام ده بس دلوقتي؟ .. ظبطي موجة الراديو على المرحلة .. انا ضد الرئيس وطول عمري ضده ولما بشوفه فى التليفزيون بيجيلي حموضة
أم كاميكاز: الحموضة دي بتجيلك من كتر أكل السجق من عند حودة المعفن ... ثم انت مش كنت غاوي فرجة على سيد وسيدة ومصر توداي وبتفكر تقدم عضوية فى الحزب الوطني وكنت مقتنع تماماً ان فى جهات خارجية بتحرك الثورة وإنهم بيوزعوا أجندات وكنتاكي ببلاش فى الميدان حتى لما جه يوم وماطبختش فكرت تنزل تاكل كنتاكي هناك .. راح فين كلامك يا تييييت؟
كاميكاز: لالالالالا .. ايه اللي بتقوليه ده .. انا طول عمري ضد النظام وبكره حسني مبارك وجمال مبارك وحسن شحاته .. حتى إعتزلت القراءة ومكتبة الأسرة مخصوص عشان صورة سوزان اللى ملزوقة وراها .. انا وطني يا ماما من يومي ومولود فى ميدان التحرير كمان
أم كاميكاز: ناقص تقولي إنك مفجر ثورة تونس كمان .. كفاية كدب بقى
كاميكاز: ايوة يا ماما انتى مستقلة بإبنك ولا ايه .. طب مش محمد بوعزيزي اللى فجر ثورة تونس حرق نفسه؟
أم كاميكاز: آه
كاميكاز: أنا اللى كنت شاريله البنزين يا ماما وربنا
أم كاميكاز: رحمتك يارب .. مش كنت رحت ميدان التحرير بصحيح وإستشهدت وخلصت منك .. انت مستحمل نفسك إزاي كدة .. ثم انت مش كنت نزلت مظاهرة مصطفى محمود وأيدت الرئيس وشالوك على الأعناق كمان والكاميرات كلها صورتك؟
كاميكاز: أيوة بس انا كنت بهتف للإستقرار .. اصل الأنتخة ع السرير حلوة أوي يا ماما
أم كاميكاز: آه ماانت كبيرك تأنتخ .. فين محكمة الثورة عشان ياخدوك وأرتاح من كدبك
كاميكاز: لااااااااااااااا .. منا لما فجرت الثورة دي بقدارتي الفذة ماقولتش إنى عايز محكمة ثورة .. والحمد لله سمعوا كلامي وماعملوهاش .. عقبال ما يسمعوا كلامي ويرشحوني لرئاسة الجمهورية بقى .. قولي يارب
وما أن نطق آخر كلمة حتى إنهال عليه شبشب أمه عابراً قارة الكنبة راشقاً فوق نافوخه .. أحسن!
ههههههه
ReplyDeleteكاميكاز اتحول خالص و معادش فيه ستو هانم
بقي شاب مرحلاوي بصحيح
متهيألي سمعت صوت كاميكاز ع الهوا مش هو ده بردو اللي كان بيقول
يوم الخلاص من مين ؟ الخلاص من مين؟ و هاتك يا عياط
يلا يحرق تكاتيك ابوكوا مليتو البلد
أما ندل بصحيح . .
ReplyDeleteداحنا شفنا كمية رهيبة من كاميكاز ده ف كل حتة الأيام اللي فاتت . . والواضح كدة أن لسة في منه بيظهر كل يوم (:
ولعلمك بقى . . كاميكاز ده كداب . . أنا مفجر الثورة دي أصلاً :D
ههههههه الحقيقة البلد كلها كاميكاز على رأى الكاتب جلال عامر: مصر كلها ابطال مفيهاش غير مواطن واحد هو جلال عامر!!
ReplyDeleteده حتى شعبولا إتحول و غير غنوته:
حبطل الهيافة و أكون إنسان جديد
ومن بعد 25 يناير
حظبطكم أكييييييييييييييد
و هيييييييييييييييييييييييييييييييييييييه
:-))))
ReplyDeleteأنا فرحت جدا جدا بما عرفت إن كاميكاز رجع .. كانت أيام جميلة وبوستس جميلة بتاعته أيام الجامعة .. فاكراها؟
المهم إن ما لاقيت كاميكاز .. ده بينوكيو كده
:-)))