Tuesday, June 05, 2012

الشعب غير سعيد لكن انت خالد


ازيك يا خالد؟ عامل إيه؟ .. مش فاكرني؟ أنا ياسمين اللى بكيت عليك من غير ما أعرفك .. وزرتني في الحلم بعد مماتك وكان جسمك كله بيشع نور لحد ما نورت الأوضة المضلمة بجسمك ومامتك كانت فرحانة بيك أوي . ايه؟ مش فاكرني؟ .. مش مشكلة بس انا فاكراك كويس وعمري ما هنساك J

حصل إيه في الدنيا؟ ياااااااه الدنيا اتغيرت اوي من ساعة ما مُت يا خالد  ، بعد استشهادك الدنيا اتقلبت والشباب عملوا ثورة وخلعوا مبارك .. ماتفرحش أوي كدة أصل جه الجيش مسك الثورة مننا وحماها .. حماها جامد أوي يعني ، ولسه بيحمي فيها لحد دلوقتي .. وربنا على الظالم والمفتري L

آآه مبارك اتحاكم بقى هو وعلاء وجمال وحبيب العادلي ومساعديه .. أصلهم قتلوا شباب كتير مايتخيروش عنك كدة .. قتلوهم وعملوا فيها أبريا .. لا ، سوزان عضمة ناشفة ماقدروش عليها ، ومااتسجنتش بس اتجرست جرسة بجلاجل ، لكن فايزة أبو النجا كويسة الحمد لله ، الظاهر أمها داعية للشال بتاعها جامد .. الغريب يا أخي إن أمي ليل ونهار بتدعي لي .. إني ألاقي وظيفة؟ ..  أبدااااااااااا .. ياللا ما علينا 

مبارك زي ماهو عمال يموت كل شوية ويعيش تاني .. مات له كدة ييجي 15 مرة من ساعة ما انت مُت يا جدع ! .. أصله مش جدع زيك لا ده جبان ونفسه التراب يداريه من عمايله .. بس على مين هيهرب مننا هيروح في ستين داهية ان شاء الله


 اسكت مش مبارك بقى سوابق؟! آه والله خد مؤبد وقعد يعييييييييط ويحسبن على الشعب ولبس البدلة الزرقا واتحكور ، ده حتى لابس ساعة دهب من كتر الكحورة يا خالد بعد ما جددوا له مستشفى السجن ب8 مليون جنيه ونص بس ! .. تعبناه معانا كتير طيارة رايحة وطيارة جاية واتشحطط على الآخر .. بس الحمد لله صبغة شعره لسة بخير والفيسبوك كله بيشكر فاتيكا دلوقتي !

الباقي؟ اللى هم علاء وجمال اللي كانوا واخدين البلد لحسابهم دول؟ اسكت يا خالد مش طلعنا ظالمينهم هم ولواءات الداخلية ؟! .. ايوة زي ما باقول لك كدة .. خدوا براءة عشان هما طيبين من جواهم زي محمود الجندي وكمال أبو رية ، ومبارك هو اللى كان حاصرهم في أدوار الشر .. حتى اسماعيل الشاعر اللى قتل العيال خد براءة برضه عشان احنا ظلمة ومفتريين 

بس احنا تمام التمام وزي الفل والأشيا معدن .. كل ما هنالك إن عجلة الانتاج فرقعت في وشنا وناس كتير سابت شغلها والأسعار انفجرت هي كمان  ، الليمون بقى ب15 جنيه يا خالد .. تصدق؟ تلاقي انت عندك شجر ليمون وهايص ياعم مين قدك .. ما باحسدش يا برنس أنا باقر بس  J

بس الثورة طلعت لذيذة أوي يا خالد  .. ده إحنا بنضحك ضوحك .. ده مبارك لازم يتعدم بتهمة حرمان المصريين من التهييس ده كله . الإخوان بقى ركبوا على الثورة وعملوا فيها صحابها وطلعوا على البرلمان والكتاتني بقى مكان فتحي سرور ! والنواب بقوا يقولوا القسم بما لا يخالف شرع الله كمان ، والسلفين ظهروا وعبد المنعم الشحات بقى يطلع في التليفزيون ينظر علينا ولا أحمد عز في زمانه ، بس الثوار بخير والله .. كل القوى السياسية والاحزاب باعتهم بس 


آه كنت هانسى .. مش إكتشفنا ان في شوية مصريين فلول يا خالد؟! ..  لا ده مش مرض مُعدي ده خلل في كيميا المخ بعيد عنك ! .. مش شايفين أي مشكلة في إنك اتعذبت لحد الموت وبيدافعوا عن اللى قتلوك وبيحبوهم .. بيسموا نفسهم ( أبناء مبارك ) وبيمووووووووووتوا في حبه .. بيحبوا فيه إيه ده ؟! والله ما أعرف ، ده حتى ضيع مستقبلنا وكرٍه أجيال كاملة في عيشتها ! ياللا القرد في عين أمه غزال بقى ! ودي أسرار بيوت مالناش فيها يمكن ماسك عليهم ذلة ولا حاجة 


واكتشفنا إن نسبة كبيرة من النخب معاهم الجنسية الأمريكية رغم تصريحاتهم الكتيرة في التليفزيون والجرايد إنهم معجونين بطين مصر .. أمال الجنسية الأمريكية جت منين؟! علمي علمك .. اللى مضايقني إنهم واخدين الجنسية لوحدهم وسايبين الشعب واقف طوابير أمام السفارة الأمريكية .. أنانيين مش كدة؟ ماهو يانعيش في أمريكا عيشة فُل يا نندفن في مصر إحنا الكل ! 

أهم حاجة أنا مش عايزاك تقلق على البلد .. إحنا مشينا في طريق الديمقراطية حافيين ووقفنا سنة ونص من غير رئيس لحد ما جالنا دوالي من الوقفة ! .. بس خلاص أخيرا كلها كام يوم وننتخب رئيس في الإعادة ..        معانا بِس وتِش .. يوه قصدي شفيق ومرسي ، دول بقى حكاية الحكايات وأسطورة الأسطورارات ^^ ..  واحد محشش ومضروب بالجزمة ومش فاهم حاجة .. والتاني عنده زيت وأطنان بطاطس عشان يأكل الشعب شيبسي جامبو  ..  بس طلع ماعندوش غضاضة للأسف .. إستأصلها بعيد عن السامعين L


بنتظاهر وبنعترض أهو وبنهاااااتي لما صوتنا اتنبح  .. لا مش الكل معترض فيه ناس بتقول لك نحتكم للصندوق وهو اللى يحكم ولازم نرضى بقرار الصندوق  .. مع إن الصندوق ده يا خالد لو بينطق كان شتمنا شتيمة وحشة أوي  .. ياللا مش مهم . 


 وإحنا ؟ لا إحنا هتنجنن بس  .. لا عارفين ننتخب ولا نقاطع ولا عارفين نكمل لعب ولا نقلب الترابيزة في وش شفيق ولا عارفين نشوف برامج من غير إعلانات ، ده حتى – لامؤاخذة انت اخويا – الملابس الداخلية بقوا يعلنوا عنها في التليفزيون عيني عينك  .. آه والله زي ما باقولك كدة  .. تلاقي المرشح من دول قاعد يهذي أي كلام في أي بتاع والشاشة البلازما جنبه عارضة ملابس داخلية قطونيل والمرشح مبتسم وماعندوش أي غضاضة ، ماتستغربش يا خالد .. الملابس الداخلية بقى ليها دور أساسي في التحليلات السياسية وفي الديمقراطية وفي الانتخابات الرئاسية لدرجة ان الإعادة بقت بين قطونيل ودايس .. والشعب لايص ! 

معلش طولت عليك  .. أصل اللى حصل كتير ولا يتحكي ولا يتوصف ولو سبتني كدة هافضل أرغي أرغي لحد ما شفيق يفوق .. وعلى إيه ، خليه مسطول أحسن عشان الجزم ترشق في وشه كويس ! .. خلي بالك من نفسك وماتزعلش .. ربنا كبير وقادر على كل شئ .. سجل رقمي بقى عشان لما أبعتلك تاني تعرفني .. قشطة؟ سجلني بإسم الآنسة أم أنس .. ايه؟ إزاي آنسة وأم أنس في نفس الوقت؟! .. مش قولتلك الدنيا اتغيرت اوي من ساعة ما مُت يا خالد؟ L

10 comments:

  1. رحم الله خالد سعيد ........ فى جنة الخلد

    المقال لذيذ جداً ........ أستمرى ف الكتابة علطول


    بالمناسبة .... الثورة مستمرة و مش حتموت

    الثورة إيمان

    ومن إبداع الى أبداع أحلى و أفضل بإذن الله

    تحياتى

    ReplyDelete
  2. رحم الله ( تعالى ) خالد سعيد وجميع شهداء مصر الأطهار

    وأحيي فيك غيرتك الحميدة ومشاعرك النبيلة
    بارك الله فيك وأعزك

    ReplyDelete
  3. لسه زي مانتي
    ربنا يحميكي
    المقال رائع بالمناسبة

    ReplyDelete
  4. الأسلوب هنا اتغيَّر أخيراً
    صحيح فيه قدر عالي من السُخرية
    لكنها سُخرية مؤلمة بتشرَّح القلب تشريح

    بتشرَّح الوطن

    أحسنتِ

    ReplyDelete
  5. تدوينة مش محتاجة اي كلام
    رحمك الله يا خالد
    يا من مات ليعيش خالداً :]

    ReplyDelete
  6. جاااااااااااااااامدة ^__^
    أحييكي يا ياسمين
    عبرتي عن احساس كامل في سطور بسيطة

    حقيقي خالد سعيد وحشنا كلنا :(
    ربنا يرحمه يا رب و يرحم كل شهداء الثورة :)

    ReplyDelete
  7. هو فعلا الشعب لايص
    روضة

    ReplyDelete
  8. مشكووووووووووووور
    http://www.alsadiqa.com

    ReplyDelete

الكلمـة نـور .. وبعـض الكلمـات قبـور