Monday, December 31, 2012

راس السنة وراس الكرنبة


إلتقطتها عدسة البرنامج التليفزيوني ووجدت كورة صغيرة سوداء تقترب من وجهها ادركت بعد لحظات انها المايك .. 

سألها المذيع: كل سنة وانتِ طيبة يا حاجة .. ممكن نعرف راس السنة بتمثلك ايه؟

الحاجة:  احم احم .. راس السنة كانت دايما بتمثلي راس كرنبة كبيرة مش عارفة أقطعها .. بس خلاص كانت أيام عز دلوقتي الكرنب غلي 

المذيع لحقها قبل ما تفتح في العياط وقالها: طيب معلش سيبك من الكرنب دلوقتي وقوليلنا بتعملي ايه في راس السنة 

الحاجة: بص يابني انا في أي موسم كنت بدبح دكرين بط بس هو فينه البط دلوقتي ده غلي راخر 

المذيع في سره: يادي النيلة السودا .. ركزي معايا ياأمي وقوليلي بتحتفلي براس السنة ازاي؟

الحاجة: انا مابحتفلش يابني انا بنام بدري .. بس في حاجة غريبة بتحصلي كل ليلة راس سنة 

المذيع: خير يا حاجة؟ 

الحاجة: كل ما اسمع كلمة راس السنة دي افتكر راس الكرنب وراس الثوم وراس التين وراس البر ولما ازهق افتح التليفزيون وألاقي الست امنية شلباية جمعاهملي وبتعرفني اتخلص منهم ازاي إلهي يسترها

المذيع: تتخلصي من ايه يا حاجة؟!! 

الحاجة: الرؤوس السودا يابني بعيد عنك

6 comments:

  1. كل سنه وأنتم طيبين
    ربنا يصلح أحوال الجميع

    ReplyDelete
  2. هم يضحك وهم يبكي
    وكل سنة وانت طيبة رغم انها متأخرة 25 يوم

    ReplyDelete
  3. ههههههههههه جميله وصح جدااا

    ReplyDelete
  4. هابي نيو يير :-)

    تحب تقول ايه في ليلة رأس السنة؟

    - حسبي الله ونعم الوكيل

    :-))

    ReplyDelete

الكلمـة نـور .. وبعـض الكلمـات قبـور