Wednesday, January 24, 2007

ايه الرغى ده كله

فى البداية عاوزة اقولكم وحشتونىىىىىىى اوىىىىى
الحمد لله خلصت الامتحانات
هيييييييييه
مش عارفة افرح اوى عشان البحث لازم نشتغل فيه
غير ان الاجازة كلها على بعضها اسبوعين بسسسسسس
ومع ذلك وحشتونى برضه
وادعولنااااااااااااااااااااااااااااااااا
-------------------
ياسمينا الحرة بعتتلى تاج اجاوب عليه
متشكرة ليكى جدا يا مينا
ومن عينى هجاوبه حاضر
بس ماقلتليش عليهم كام درجة؟
------------------------------
.
اية اللي حيحصل لايميلك لما تموت ؟
انا كنت بفكر فى الموضوع ده بقالى فترة
مش مشكلة حيحصل ايه للإيميل
انا كل اللى يهمنى انى ادى الباسورد لحد لما اموت عشان يقول لصحبااتى إنى مت عشان يدعولى
.
اديت الباس وورد لحد قبل كده؟
مممم هى باسوردى صعبة جدا عموماً
بس بما إنى عندى ايميلات كتيرة جدا
فأى حد بيتزنق فى ايميل بيجيلى
وبديله الايميل بباسورده
إيميل من بابه يعنى
رجعه تانى اهلا وسهلا
مرجعوش يبقى حلال عليه
.
لو اه كانت طبيعة علاقتك بيه اية؟
اللى إديتها إيميلات بالناس اللى عليها
مش مجرد باسورد يعنى
كانت واحدة صحبتى عزيزة عليا اوى
.
اسمك؟
مممممممممم
إسمى اللى اهلى إختاروه وانا صغيرة
ياسمين
بس لو كان ينفع اسمى نفسى كنت سميتها اسامى تانية خااااااالص
خديجة
عائشة
إخلاص
إكرام
أسامى كدة تفرح القلب
اصل بصراحة بفكر كدة لو ربنا إدانى عُمر وبقيت جدة
هبقى تيتة ياسمين؟
مش حلوة فى حقى حتى
.
اسم الدلع المشهور في وسط اصحابك؟
والله الاسامى كتيييييير
وكل حد بإسم شكل
فى البيت الإسم الرسمى للدلع هو توتى
مالوش اى علاقة بياسمين
بس مع صحابى فى سيمو
وناس تقول سمسم او سمسمة
وناس جاسمين
واكتر حد مطلع عليا اسامى غريبة هى اختى .. كل يوم بإسم شكل
اخويا لما بيبقى عاوز حاجة بقى بيقولى ياسمينا
بس بالنسبة لى عادى مش بتفرق اوى
اهوه انا وخلاص
.
عمرك؟
21 سنة
عدوا ازاى عدوا امتى متسألنيش عشان معرفش
.
برجك؟
برج الدلو ... حاد الذكاء (أشك) ، معندهمش اسرار ، الصراحة ، إجتماعى
and extremely unexpected
.
مجالك او مجال دراستك ؟
فى سنة رابعة كلية إقتصاد تخصص عام إقتصاد - إنجليزى ، تخصص فرعى إحصاء - جامعة القاهرة
وبلا فخر مطلعة عينى وعين اللى جمبى
ولما بنام بحلم إن الكلية بتتحرق
!!!!!!
.
شخصيتك نوعها اية؟
بنى محروق
هههههههههه
نوعها زى اى بنى آدم عادى
جوايا وجوه كتيرة جدا
فى ناس فكرانى متدينة جدا وده مش حقيقى .. انا بس بحاول
وفى ناس فكرانى على طول بضحك ولمضة وبقول حاجات تتضحك
بس الحقيقة إنى إنسانة زى اى إن حد ، يعنى ممكن ابقى جد وممكن اهزر .. وسعات كتير بفرح وسعات بحزن ، سعات ابقى مقبلة على الحياة من غير مناسبة وسعات اكتائب وابقى فى قمة اليأس
بس اهم صفة على الإطلاق هى
*..............*
بنى محروق
.
السفر بالنسبة لك؟
السفر حاجات كتيرة اوى
السفر إنسان جديد ،عالم تانى ،ناس تانية
السفر ممكن منفعة .. رزق وشغل ومستقبل ونجاح
السفر ممكن متعة مع البحرررر مثلا
وعبادة .. حج وعمرة مثلا
بس مع كل الاختلافات دى بيفضل ربنا واحد مهما سفرنا
بس تبص فى السما تحس إنك ماسفرتش ولا حاجة
وإنك مهما رحت فانت على الارض برضه وهو رب كل مكان
.
المود بتاعك؟
هو دايما كدة الحمد لله تلاقى على وشى إبتسامة من غير مناسبة
لدرجة إن فى واحدة صحبتى بس فى قسم تانى كل ما تشوفنى تقولى
هو انا يابنتى كل ما اشوفك الاقيكى بتضحكى؟؟
على اساس إنها جريمة
بس الابتسامة فى وش الناس صدقة وبعدين هنعقدها ليه يعنى
محدش واخد منها حاجة
بس مش معنى كدة انى على طول مبسوطة كدة من غير مناسبة
بس مش بحب اشيل حد همى لان محدش ناقص
وبعدين ما احنا بنضحك من الهم
هم يضحك وهم يبكى
صحيح فكروتونى بمثل راجل كبير مرة قالهولى وانا صغيرة .. هو توفى الله يرحمه
كان بيقولى صباح السمر يطول العمر
ساعتها مفهمتش ايه العلاقة مابين العمر وصباح السمر
لما لاقانى متنحة ومش فاهمة حاجة .. قالى يابنتى عشان بيضحكوا كتير
!!!!
.
وقت فراغك بتعمل فيه اية؟
غالباً افتح الكمبيوتر وافتح موقع بص وطل او المدونات واقعد اقرا، او اقرا اى مقالة فى التنمية البشرية على النت
او التليفزيون
او اقرا كتاب
اخرج مع ماما
اروح لأختى
كدة يعنى..حسب
.
الاكلة المفضلة؟
بص هى لو ماما اكلتنا عيش ناشف هقولها تسلم إيديكى يا ماما وهيبقى شهد .. بجد بتتعب اوى ربنا يكرمها
بس فى الغالب اى حاجة مش فيها شطة
واى حاجة بعيدة عن لحمة الراس ومشتقتهاااااااا
.
الصفات اللي خدتها من بابا؟
سماره .. اللون يعنى
تحليله للمواقف
.
الصفات اللي خدتها من ماما؟
خدت منها الملامح .. شبهها
التعلق بقيمة كبيرة أوى وهى الدين
إخشوشنوا فإن النعمة لا تدوم ... بمعنى إن لو مزهزهة معايا اصرف بس مش بتذير ، ولو مش معايا أعيش على قدى ومعقدهاش .. يعنى فى كل الظروف حاول تبقى متزن
والله لو فضلت اتكلم عن امى مش هتكفينى ولا عشر مدونات وبرضه مش هكفيها حقها خااااااااااالص
.
اكتر 6 حاجات بتكرهها؟
الشتايم ... عمى عمى عمىىىىىىىىىى
السجاير مش بطيييق رحيتها
الحال المايل
إن حد يزعل منى .. بحس إن صفو حياتى إتعكر
اى حاد طالع فيها
ضميري لما يأنبنى .. بمووووووت
مش بحب حد يبقى كشرى على طول كدة.. بكسر الكاف
التحقير من الناس بشكل عام
مبحبش النصيحة بأسلوب فج
بس كفاية بقا دول اكتر من 6 بكتييير
.
اكتر 6 حاجات بتحبها؟
الله وسوله والإسلام
كل من تحوط بهم شفقة قلبى ( أمى ، بابا ، اختى ، اخويا ) عيلتى ، صحابى ، جيرانى ... الناس كلها من الآخر
بيتنا .. بحب اقعد فى البيت جدااااااااااااااااااااااا .. واكتر حاجة تضايقنى لما يطلوبوا منى انزل الشارع
القراية والكتابة
الحياة والموت
.
الشغل بالنسبة لك؟
ضرورة بتفرض نفسها على البنت ، بس لو محتاجاه هيبقى وسيلة اجيب بيها فلوس والفلوس وسيلة اجيب بيها احتياجاتى وهكذا ، لو مش محتجاه يبقى افضل فى بيتى احسن من البلاوى اللى الواحد بيشوفها فى الشارع
انا بجد بقيت بخاف انزل الشارع
.
اية الكومبيوتر والانترنت بالنسبة لك؟
دنيا تانية .. معلومات .. طموح .. مستقبل.. ثقافة ومعرفة
حاجات كتيرة اوى
.
عايزيني امرر التاج دلوقتي لحد
مش عارفة مين اصلا راحله التاج ده قبل كدة
عشان كدة
اللى عجابه الاسئلة وعاوز يجاوب عليها ياخد التاج هدية منى ليييه
والسلام عليكم

18 comments:

  1. بصي انا قلت الحق اول كوممنت وبعدين اقرا بقي

    علشان اخد الجايزة

    ومبرووووووووووووووووووووووووووك

    وعقبال النتيجة

    ReplyDelete
  2. ازيك يا ياسمين يا ست الكل
    انتى قلتى كل حاجة .. بس نسيتى تقولى إعجابك الشديد بأسلوبى وكتاباتى الرهيبة!!!
    ده ينفع يا ياسمين؟ عموما أنا مسامحك بس لازم تعملى لى بوست كامل تقعدى تشكرى فيا بقى وتقولى كلام حلو عنى كده .. ماشى؟؟
    على فكرة والله البوست ده روعة والأسئلة جميلة .. كويس ان الواحد يقلع القناع اللى حطه دايما على وشه ويتعامل ببساطة ويتكلم عن نفسه من غير رتوش ..
    ربنا يوفقك ..
    خلاص خلاص ما تشكرنيش عشان علقت..دا واجب يا بنتى..

    ReplyDelete
  3. بما انك بتتكلمي عن الرغي
    فانا اقولك رغيك لذيذ
    ولكن اخذت جوله في البلوج
    بلوج والله رائع ومميز والجوانب الدينيه طاغيه عليه وهذا سر جماله

    ReplyDelete
  4. ألف مبروووووووووووووك وعقبال النتيجه ان شاء الله.
    البوست جميل خالص, واجاباتك فيه بسيطه ورائعه , ربنا يخليلك ماما.

    ReplyDelete
  5. ياسمين


    أولا كل سنة وإنتى طيبة

    دة علشان عيد ميلادك


    ثانيا

    كلامك صادق ومن القلب

    مدونتك هايلة تستحق الزيارة وعناء القراءة

    ثالثا

    عادى بقة
    أودى

    ReplyDelete
  6. عجبتنى مدونتك وعجبنى الاغانى هيا عندى بس ش متعوده اسمعها فى مدونه
    وعجبتنى الصور وكلامك جميل
    حلو جدا برغم انك جديده فى عالم التدوين

    ReplyDelete
  7. انا قلتها قبل كده كلامك جميل و مدونتك جميلة بس فى البوست ده اكتشفت ان كمان صاحبتهم أجمل و خصوصا برائتها و طهرها و ابتساماتها و سمارها اللى زيى
    عقبال النجاح و كل سنة و انتى طيبة و يا ريتنا زيك فى صفاتك الجميلة دى

    ReplyDelete
  8. ربنا يبارك لك يا بنتي
    و حلو رغييييك

    وكل سنة و انتي طيبة

    ReplyDelete
  9. ايه يا ياسمين يا حبيبتى الرغى الكتير ده مش بيخلوكى تتكلمى فى بيتكم ولا على طول بتلعبوا "بدون كلام"
    و بعدين ايه كل الحاجات اللى بتحبيها و بتكرهيها دى السؤال بيقول 6 بس
    غير كدا بقى تعالى هنا يا هانم انتى هاتعملى متواضعة زى أستاذ أشرف "أخف دم" كل الصفات دى واخداها من ماما و بابا يعنى كل دى صفات كويسة فيكى
    و بعدين اسم ياسمين حلو يا تيتة ياسمين مش ناقص كمان غير ان الواحد يتعقد من اسمه
    الاحسن نعمل قانون جديد يسمح للشخص بتغيير اسمه فى المناسبات و فى المراحل العمرية المختلفة و كمان لما يبلغ عشان لو مش عاجبه الاسم اللى اختاره مامته و باباه
    بس كفاية كدا ده انا طلعت رغاية أنا كمان "صورة وش مكسوف" قال يعنى بتكسف هههههه

    ReplyDelete
  10. amr ahmed
    ههههههههه شاطر لحقت اول كرسى
    الله يبارك فيك وادعيلنا

    أخف دم
    لا والله ماقلتش كل حاجة عن نفسى
    هههههه
    بوست كامل صفحة أولى يا استاذى ولا تزعل


    محمد مفيد
    ربنا يكرمك ويعزك
    والبلوج جميل بالناس المحترمة اللى بتشرفه

    ReplyDelete
  11. esraa
    الله يبارك فيكى ويكرمك
    ادعيلى بقا عشان الامتحانات مكنتش كويسة
    ربنا يستر


    ody911
    اولا وحضرتك طيب
    ثانيا ربنا يكرمك واهلا بيك فى المدونة لاول مرة وياريت ماتبقاش اخر مرة
    ثالثا وده الاهم
    عادى بقا
    انا مش اودى


    همس الليل
    وانا اقول ايه النور اللى فى المدونة ده
    اهلا بيكى والحمد لله المدونة عجبتك ويارب تنورينا هنا كتير

    ReplyDelete
  12. Khaled
    ربنا يكرمك على الكلام اللى انا اقل منه بكتييييييييييير جداااا
    وصفاتى مش كلها حلوة والله
    بس من باب عدم الجهر والستر مش بقول
    ربنا يكرمك ويعزك وادعيلنا عشان الامتحانات

    إيبى
    إيبى عندنا
    يا مرحبا يا مرحبا
    نورك غطى ع الكهربا
    نورتينى بجد يابنتى ويارب اشوفك هنا كتير

    ReplyDelete
  13. Enas
    بصى يابنتى لو تلاحظى عند صفات ماما وبابا انا فى الغالب مش بقول انا خدت منهم ايه
    ساعتها كان قصدى انى اوصفهم واعتقد ان ده اقل بيكتيييييييييير اوى من اللى هما يستحقوه او اى اب واى ام يستحقوه... سلميلى على عمو وطنط بقا

    بالنوسبة للإسم انا حرة بقا احبه ولا اكرهه إنتى هتشاركينى؟
    إت....يا إيناس

    ReplyDelete
  14. ايوة طبعا صفاتهم انتى فاكرانى فاكراها فيكى :P
    المهم بقى يا هانم "حاجة تخصك و غيرك يستعملها أكتر منك" تبقى اسمك يعنى مالكيش دعوة بيه خالص
    قال اسمى و أنا حرة فيه قال
    بنات آخر زمن كمان هايقولوا الكلمة القبيحة "حرة" قال حرة قال

    ReplyDelete
  15. مممممممممممم
    بما ان الاجابات عجبتنى
    فهديكى 18 و نص من عشرين
    علشان محدش عندى ياخد الدرجة النهائية
    مبروك

    ReplyDelete
  16. Enas
    مكنتش اعرف انك بتحبى إسمى كدة يا نوسة (صورة واحدة مكثوفة) ميرسى خالث

    ReplyDelete
  17. حررررررة
    ميرسى ليكى يا ميس حرة
    وربنا يسهل واخد عندك درس ولا حاجة

    ReplyDelete
  18. لاننا اتكلمنا مرةواحدة بس فكلامك عرفني بيكي اكتر
    وخلاني اتشرف بمعرفتك اكتر واكتر

    ReplyDelete

الكلمـة نـور .. وبعـض الكلمـات قبـور