تانى تاج على التوالى

فى البداية عاوزة انبه إن أنا حرة بعتتلى تاج يا جماعة بقاله اسبوع تقريبا ومجاوبة عليه والله

تحت عنوان إيه الرغى ده كله .. وده لأن التيجان نزلت عليا ترخ زى المطرة من جهات متعددة

المهم جاى تاج خبيييث بكل المقاييس من واحدة عزيزة عليا اوى وهى الجميلة

دينا فهمى

يارب يا معين

خمس حاجات ماحدش يعرفهم عني خااالص

ربنا يسهل

.

أولاً: زمان وانا صغيرة كنت مش عارفة ليه بعد ما البيت كله ينام ويبقى الحال تمام التمام اجرى على المطبخ وافتح برطمان الزتون المخلل واديييييييييييييها اكل فيه من غير مناسبة .. طبعا مافيش اى أثر ورايا ولا حاجة

بس حاليا مش بطيق اكل زتوناية واحدة .. جالى تشبع من اللى عملته وانا صغيرة

.

ثانياً: زمان برضه وانا فى ابتدائى كنت باخد درس رياضة- شفتوا الخيبة- وكان المستر بيدينا واجب عشان نحله

انا بقا بنصحتى عرفت إن اخر الكتاب فى حلول للأسئلة دى .. وعليها

اى واجب يجي كل اللى عليا إنى انقل الاجابة من ورا

وطبعا كنت ممتازة وشاطرة فى نظر الجميع ومحدش يعرف الحقيقة المرة دى لحد دلوقتى

بس طبعا إتأكدت إنها غلط لما كبرت شوية

.

ثالثاً: فى حاجة أهلى بس اللى يعرفوها

كنت وانا فى تالتة إبتدائى بعرف فى إلقاء للشعر وكدة

كان فى قصيدة بقا إسمها .. أمى

المهم بما إنى بارعة ولازم الكل يشوف

كانوا قرايبنا عندنا جمعتهم وقلتلهم انى بلقى قصيدة واقعدوا ساكتين عشان الاقيها وكدة

وانا طبعا زى عقلة الإصبع وقفت على كرسى وقعدت اديييها

أمى نداااااااااء محبة .. بل إن كل الحب أم - واتشحتف وانا بقول - أماااه .. أماااااه يرعاكى الذى خلق البرية من عدم

وفى وسط مانا ملعلعة بالإلقاء وفى قمت مجدى إذ بى مرة واحدة وبدون اى مناسبة عمالة اعيط

عااااااااااااااااااااااااااا

مالك يا ياسمين فيه ايه؟-

الكتاااااااب ضااااااااااااع عاااااااااااااااااااااااااا-

وهاتك يا عياط عااااااااااااااااااااااااااااا

ساعتها بقا اللى اتقلب من على كرسيه واللى كان هينط من الشباك من الضحك

ومن ساعتها طلعت اول نسخة من سلسلة مجلات ياسمين للجيب ... زى ميكى وتنتان كدة

ألا وهى : ياسمين والكتاب الضائع

.

رابعاً: كان فى مدرس انجليزى فى اعدادى شاكك انى باخد درس وانا تقريبا كنت الوحيدة اللى مش باخد معاه - وباخد بره برده - المهم بقا

فهمته انى مش باخد درس ولا حاجة

الامتحانات تيجى وامتحن اقوم جايبة 18 من 20

الراجل يجى يسألنى بسخرية ها عملتى ايه .. اقوله جبت 18

يتخض ويتنرفز: 18 إزاى يعنى إنتى كنتى بتغشى ولا ايه

قلتله: وانا مالى يا مستر ما انتوا اللى بتصححوا .. نجحتونى ليه امال

بصى بحزن كدة وقالى بصوت مخنوق:ه

زى زكى رستم فى فيلم "مين عمل ايه" بالظبط

وساعتها نزلت النسخة التانية من سلسلة المجلات برده

ســــرك معاكى ياياسمين (وين هنادى ياماى)ه

.

خامساً: الكلية بوظتلى عنيا الحمد لله وقعدت فترة مش بشوف البورد - الصنبورة - ورحت لدكتورعيون .. المهم انى المفروض اعمل نظارة

وقد كــــان .. خدت ماما ونزلتها فى البرد عشان نجيب الشنبر ومشاوير عشان اوديها واستلمها وهيصة كدة

المهم جت بعد طول إنتظار واول ما لبستها بصيت لنفسى فى المراية وضحكت وقلت: انا بقيت كاميكااااااااااز

المهم بقا رحت بيها الكلية زى الشاطرة وفرحانة بشبابى وبشكلى الكاميكازى

وفى آخر اليوم اديتها لصحبتى عشان كنت عاوزة اتوضى

خلصت ورجعتلها وصليت وبعدين وانا بربط الكوتش قولتلها: هى فين النظارة؟؟

بصتيتلى وبرقت

قلت فى بالى اكيد البت بتهزر

لاقتها كمان مش عارفة فين النظارة

وبعدين قامت سيبانى وراحت قدام كدة وجبتهالى من على الارض

وطبعا العدسة اتكسرت وطلع عينها

واتغميت اوى اليوم ده عشان ده اول يوم ليا بيها وملحقتش

المهم روحت البيت وقلتلهم انها اتكسرت

ايه اللى كسرها يابنتى؟-

قلتلهم وانا بصلى وقعت منى واتكسرت ومجبتش سيرة صحبتى خالص

وقعدت اعيط ( مش استهبال والله بس عشان هما تعبوا معايا فعلا ) هما افتكرونى بعيط عشان عايزة النظارة وعياطى ده كان أسف .. المهم بابا حن عليا وخلانى اروح اصلحها

وده بقا سر من النوع التوب شكرى ( توب سكرت يعنى ركزوا بقا ) قبل ماروح صحبتى ضميرها وجعها ياعينى وبقت مش عارفة تعملى ايه .. بس الحمد لله قلبتلها الموضوع ضحك لدرجة ماكنتش عارفة تروح من كتر الضحك

قلتلها جهزى البيت بقا عندكوا عشان لو ابويا طردنى ولا حاجة .. قالتى حاضر

انا : عندكوا همبورجر؟

هى: فى ايه يابنتى

انا : ايوة ماهو مايبقاش كسر نظارة وجوع كمان .. يا همبورجر يا هوديكى فى داهية انا بقولك اهوه ههههههههههههههه

وساعتها برده نزلت النسخة الثالثة من سلسة المجلات الشهيرة

ياسمين والنظارة المكسورة

فى نسخ تانية من المجلة على فكرة بس دينا عاوزة خمس حاجات بس

المهم كفاية فضايح لحد كدة بقا

ليه يا زمن ماسبتناش أبريا .. تيرا را را

--------------------------------------

أمرره لمييييييييين ؟

لأول مرة أدبس حد

واحد من الناس و سمراء النيل وانا حرة و إسلام و أخف دم وكوبا

اللى عاجباه الاسئلة ياخد التاج برده هدية منى ليه

بس يدفع نص جنيه مصاريف الشحن