Thursday, June 28, 2007

شوفتونى لما هيست؟؟؟

صحيت الصبح وفطرت

وفى المواعين غسلت

وبعدها فى الصالة وضبت

سلطة طحينة وخضرا وعملت

وبعدها شلت وهشكت

واديت الرضعة للبت

وبعدها اكلت

وعمايل الشاى ماخدتش وقت

وفى البطيخة قطعت

وعلى اختى غلست وصحيتلها البت

وروحت انا فتحت النت

بصيت ع المدونة وبحلقت

وفى كاميكاز الكسلان زعقت

وفى التراب اللى على شبابيك المدونة نفضت

وزهقت من الواد كاميكاز ومن النت وقفلت

الدنيا حر اوى وتعبت

وماية النيل كلها تقريبا شربت

وبعدها تنحت وتايست

وخدت بعضى ونمت وأنتخت
 

بعدها صحيت

وللمغرب وبعده العشا صليت

وغيرت للبت ومعاها شوية لعبت

وللعشا بتاع بابا حضرت

ولبست ومن تانى هشكت

 

وخدت اختى وبنتها وخرجت

ولبيتها وصلت

ورجعت تانى وفى الميكروباص ركبت

وشوية فيروزيات كدة سمعت

ودخلت العمارة وفى الأسانسير ركبت

طنط جارتى سألتنى ع الكلية وضحكت

بصيتى كدة وقالتلى عقبال العريس يابنت

بصراحة اتكسفت

وقفت الأسانسير و على البيت دخلت

لاقيت بابا عايز الجرنان ولتانى مرة نزلت

ومالقتش الجرنان ورجعت
 

وفى الأسانسير تانى ركبت

وركب كمان عمو الحاج جوز طنط

سألنى ع الكلية بردو وقالى عقبال العريس بقا يابنت

تانى مرة بقا اتفقعت
 

اصل عمو ده كل مايشوفنى يقولى مافيش عريس فى ايديك ليه يابنت؟؟

تقولش بيوزعوهم فى حتة وانا مروحتش وكسلت؟


رحت كاتمة فى قلبى وسكت

ووقفت الأسانسير وعلى البيت جرى دخلت

كنت جعانة بس طنشت

وفى الغسيل نشرت وطبقت

ورجعت تانى فتحت النت

رديت ع التعليقات ومع صحابى شايتت

وفى الكلام العجيب ده كتبت

وعملته قال ايه بوست

ظبطت فيه كدة ورتبت

وحطيتله صورة كمان ونشرت

كاميكاز رفضه وانا صممت

اتخانقت معاه واتعاركت

وسيبتله المدونة وطفشت

ومش انا اللى بكتب دلوقتى دى عفريتة الست

لما شوفتها خوفت منها وهربت

معلش يا جماعة اصل انا هيست

وللكلية خلصت

وحاسة بملل واحباط فيظع اما تعبت

اسيبكوا دلوقتى بقا لحسن انا اتخنقت وهنجت

ونعست اوى وكان زمانى نمت

123 comments:

  1. هههههههه
    لا واضح ان التخرج عامل معاكي شغل عالي (:
    زهقانة ليه اخس عليكي؟؟ ده حتى الملل حلو ):
    بجد مفيش حل غير اننا نرجع الكلية تاني

    ReplyDelete
  2. ههههههههههههه
    كل ده في يوم واحد ..
    هيييييه بكرة نقول ولا يوم من الأيام دي ..

    طب أنتي بتساعدي والدتك .. وبتساعدي اختك ... يعني كلها مساعدات

    وبتهشتكي وتلبسي بنوتة واحدة

    أمال بقى لما يبقى البيت بيتك وترجعي من الشغل .. لو مصصمة تشتغلي يعني .. مهدودة وأنتي المسئولة عن كل حاجة .. وعندك بدل العيل أربعة .. دا غير الأفندي اللي قاعد يقرا الجرنال وعامل نفسه مش واخد باله ..

    حتعملي إيه ساعتها بقا .. ساعتها مش حيبقى تهييس .. دا حيبقى عباسية رسمي

    ReplyDelete
  3. انا لما قريتها فطست
    م الضحك لحد ما عيطت
    و بقى الدموع تملا طشت
    بس كفاية كده لاني تعبت
    :)
    جامدة جدا

    تحياتي

    ReplyDelete
  4. ههههههههههههههههههه

    لا جاااااااااااامدة

    مساء التهييس

    اقولك على حاجة

    بينى وبينك يعنى

    ومتقوليش لحد



    .
    .
    .
    .

    انا حاسس ان انا عطلتك


    :p


    هههههههههههه

    والله جامدة

    انا لسه منمتش اهو

    مش قلتلك مش هعرف انام

    معرفتش

    عااااااااااااا

    :(

    ReplyDelete
  5. هع هع هع
    الله يخرب بيت البتاع ده الى اسمه ....
    جامدة اوى
    تحياتى :)

    ReplyDelete
  6. جميله
    جميله
    جميله
    جميله
    جميله
    انا لو قعدت اقول جميله للصبح ميكفيش بحب جدا الكلمات اللي بتخرج من القلب كده وتدخل على القلب بجد احييكي على كلماتك الجميله دي برافو عليكي
    ومبروك على التخرج ولو انها متأخره يعني
    سلاااااااااااااااااااااااااام

    ReplyDelete
  7. جدولك اليومى مشغول جدا

    ReplyDelete
  8. السلام عليكم
    بجد جميلة قوي

    ReplyDelete
  9. ما انتى صاحية اهو و بتشيتى

    بس اتغديتوا طحينة و سلطة بس فييييييين السمك ؟؟؟؟؟؟؟؟؟؟

    تحفة يا بنتى

    ReplyDelete
  10. ايه ده؟؟
    بتتعبي يابنت والله..بس قشطة عليكي انتي التهييس عندك بيجي بفايدة اهو
    بس خدي بالك من السراية الصفرا بقى لحسن يقفشوكي

    ReplyDelete
  11. يخرب عقلك بجد
    انتي موتيني من الضحك


    عبد الله بيفكر في موضوع سلسبيل ده
    وربنا يقدم ما فيه الخير
    علي فكره ام عبد الله عاجبها الاسم جداجدا
    :)

    ReplyDelete
  12. looooooooooooooooooooooooooooooooooooooooooooooooooooooooooooooool
    simo enty et-habalty ya 7abebty :S
    eh ya benty el mas5ara di?!
    bas tesadda2y laziz awi ya bent :P

    ReplyDelete
  13. مع انى اول مرة ادخل المدونة دى وآخد بالى منها بس بجد عجبتنى اوى الكلام اللى انتى كتبتيه تنفعى تكتبى زجل يا بنتى
    بجد كلامك جميل اوى خلانى اضحك لغاية ما اللى فى البيت صحيتهم من النوم واضربت :P

    ReplyDelete
  14. تهييسة جميلة للغاية

    تحياتي اختاة

    ReplyDelete
  15. بابا عايز الجرنان بعد العشا ؟؟؟؟؟؟
    ليه جنسه ايه الجرنان ده
    ده اكيد مش صباحي ولا مسائي
    ده جرنا السهره مش كده ؟

    ReplyDelete
  16. صباح التهييس
    هههههههههههه
    دى مش اول زياره ليا على فكرة
    انا دخلت عندك ساعه بوست
    مبنى الجحيم اللى امتحنتوا فيه
    بجد ساعتها ما كنتش مصدقه ان الوضع منيل كده
    وما علقتش بصراحه بس عجبنى البلوج بشكل عام لانه فيه حاجات متنوعه وما فهمتش يعنى ايه كاميكاز بس بجد متت على روحى من الضحك من حديثك معاه
    وقلت جايز ده مصطلح شبابى او شخصيه كارتونيه بس ما اظنش
    هههههههههههه
    واضح انها شخصيه انسانيه خاصه بيكى
    سعيده جدا بزيارتك
    وتمنياتى لك بعرييييييييييييس
    بصى هما بيوزعوهم دلوقت على البطاقه
    بس القديمه
    عشان كده كل اللى معاها رقم قومى مش حتلحق لها عريس
    ومن غير عياط
    هههههههههههههه

    ReplyDelete
  17. انا مش قولتلك هتندمى انك خلصتى
    وقولتلك لما تندمى اديني رنة
    انا عارف انك خلاص هيستى يعنى كل سنة وانتى طيبة
    قلبي عند كل الشباب اللى لسه مخلص جديد

    ReplyDelete
  18. ايه بس الدماغ العالية دي بس؟
    عجبتني قوي مدونتك

    ReplyDelete

  19. ههههههههههههههههههههههههههه
    جميل اوى

    كاتبه يومياتك زى الاغنيه
    وحلو اوى تعليق علاء دا

    ReplyDelete
  20. هههههههههههه

    تصبحي علي خير

    بس التهيس ده حلو خالص

    ابقي هيسي كده كل فتره ((:

    ReplyDelete
  21. عشان تعرفي بس
    نذاكر نقول امتي نخلص مذاكرة
    نخلص مذاكرة نهيس ونحس بملل وقرف والوقت اللي مش بيعدي
    احمدي ربنا بقي علي اللي انتي فيه بدل منعمة الزهق والفاض ده تزول منك
    صحيح وبعدين مانتي يابنتي بتطبخي وتغسلي وتجيبي الجرنان وتغيري للبنت
    تخيلي بقي مفيش كل ده واكتبي بوست تاني

    ReplyDelete
  22. لا فعلا واضح ان التخرج ساب اثره تهييس مبارك :)

    ReplyDelete
  23. انا عايزة تعويض بقى لان مدونتك هنجت لى النت
    وانا بقى منها اتعصبت
    بس برضه صممت وغلست
    بجد من غير مبالغه تحفه وضحكتينى جدا ما شاء الله عندك موهبه الكتابه بجد حاولى تستمر وتورينا انتاج من دة كتير
    بس الحمد لله مزاجك احسن شويه يارب دايما

    ReplyDelete
  24. مش قولت لك باين عليكي بت لهلوبه ..غسيل و طبيخ و تهشيك و حاجه اخر حلاوه ، ما تيجي نحط زهقي علي زهقك و نشوفلنا حاجه نعملها ؟
    و صحيح شكرا علي تعليقك عند زياد و عندي

    ReplyDelete
  25. إلي أول بنت تضحكني بالمنظر ده

    أشكرك جدا

    ReplyDelete
  26. ايه يابنتي ده
    انتي لحقتي تزهقي؟
    ربنا يستر عليكي بقا اذا كان يومين عملوا فيكي كده
    :)))))

    ReplyDelete
  27. جميلة
    بجد لذيذة يا ياسمين
    لكن متستعجليش على الزهق من قلة الشغل
    بكرة تشتغلي و تطلع عينك و تقولي مين يرجعهالي ايام
    اساليني
    لما اتخرجت كنت منشكحة اوي على الشغل دلوقتي بقول اه لو

    متخفيش بختك يا ابو بخيت
    و صحيح معكيش عريس في ايديك ليه؟؟
    هههههههههههههههه
    ضحكتيني والله

    تحياتي

    ReplyDelete
  28. أنا شفت في البوفايل إنك بقيتي عاطله قولت آجي أبارك .. إستنتجت إنك إتخرجتي على طول

    بس حلو قوي البوست ده .. عجبني قوي موضوع العريس اللي تطلعي بيه في إيدك .. جايز بيتباع تحت عند بتاع الجرانين أو بيطلع في السحب وألا حاجة

    ههههه

    ربنا يرزقك بالزوج الصالح إن شاء الله

    ReplyDelete
  29. ههههههههههههههههههههههههههههههههههههه

    مسخره بجد كتبتيه ازاى ده.......معلش هانت بكره الملل ده يروح وتموتى فى وقت فراغ ومتلااقيش

    ReplyDelete
  30. :)))))))))
    أول مرة أجيلك ...بجد ضحكتيني أوي ما شاء الله عليكي ...بس زهقانة ليه ..بكرة تقولي فين الأيام دي وتروحي الشغل وتنسي السلاطة بتتعمل ازاي والبلكونة حتى شكلها ايه :) مش بحبطك بس بفكرك إن في ايدك نعمه بس احنا كده ...محدش فينا عاجبه حاله:)
    المهم حاولي تستمتعي بكل مرحلة تمري بيها ...وبصي لمزاياها أكتر وربنا يوفقك للي فيه الخير :)

    ReplyDelete
  31. تحياتي

    فكرة جيدة لسرد مجريات يوم من حياتك

    هذه هي الحياه، هذا رأيي ، أعني ان كل منا له حقوق و عليه واجبات...
    الام و الاب كانا و سيلة لخروجك من عالم الذر الي عالم الحياة الدنيا....
    ربياك صغيرة ...رضيعة...لا تقوين و لا تدرين من الدنيا غير حضن أمك و ثديها.

    و الان ما شاء الله كبرت و ترعرعت..و آن الآوان أن تتحملي جزء من المسؤليات.

    بالمناسبة...هل مازال هناك بنات بتنكسف لما تيجي سيرة عريس.... ههههههه

    مجرد مزحه....فبالتأكيد الحياء موجود
    لان الايمان موجود... و الحياء من شعب الايمان.

    تحياتي و ربنا يوفقك في حياتك العملية ان شاء الله.

    ReplyDelete
  32. وااااااااااو
    روووووووووعه
    ايه الجمال دا يا عسووول
    ربنا يوفقك دايما
    و يرزقك بالزوج و الذرية الصالحة
    آآآمين يا رب

    ReplyDelete
  33. ايه ده ده انا بايني علقت
    ههههههههههههههه
    ودي بقى يوميات واحدة بنت؟؟؟
    لذيذة اوي بجد

    ReplyDelete
  34. ههههههههههههههههههههه
    تحفة
    دمك خفيف مووووووت
    فعلا
    ظهرت عليكي امارات التخرج
    مبروك اولا التخرج
    ثانيا يومك طويل قوي
    بس جميل تعبيرك
    رغم ان القافية شداكي قوي
    بتعمل ترلملم
    :)
    للأمام ولما تلاقي شغل قوليلي
    انت خريجة ايه؟

    ReplyDelete
  35. ظريف اليوم دا وخصوصاً لما يتحكي بالطريقه دي

    ReplyDelete
  36. احلي تهيس

    دنا عرفت كل حاجة كدة بزمتك مش احلي من التاجات دي

    حت نوعية الاكل

    والبطيخة وجوز طنط والبنت

    جامدة التدوينة دي بجد

    احلي عالم واحلي تهيس

    :)

    ReplyDelete
  37. يا سـلام ايه الشطارة دى كله فى يوم واحد لالالالالالالالالالالا مش معقول بسم الله مشاء الله ولا حول ولا قوة الا بالله
    لو انا كنت عملت حاجة واحدة وباقى اليوم اخخخخخخخخخخ
    هههههههههههههههههههههههه
    تحياتى

    ReplyDelete
  38. لذيذة جدا كلماتك وبكرة تقولي ولا يوم من ايام الفضى اللي انت فيه
    وبعد الجواز هتقولي فينك يا بيت بابا
    اقل ما فيها انك تنامي وقت ما انت عايزة تنامي
    سلاماتي

    ReplyDelete
  39. طيب ما كنتى نمتى م الاول وريحتى نفسك وريحتينا

    ReplyDelete
  40. انا هنا فعلا وصلت
    ولمدونتك الجميله زرت
    وقعدت اقرا فيها لما تهت
    كوكو وكاميكاز ومعقولة اتخرجت؟
    مدونتك حلوة ولبوستاتك اعجبت
    وفي اخر بوست مطرئع ليكي علقت

    :)
    تحياتي ليكي
    محمد سمير

    ReplyDelete
  41. والله انتى دمك ذى العسل
    بس روقى انتى كده

    ReplyDelete
  42. ههههههههههههههههههههههه
    هههههههههههههههههههههههه
    هههههههههههههههههههههههه
    موتينى من الضحك الله يهديكى
    ايه يابنتى دا
    دانتى سكر بجد
    هههههههههههههههههههههههههههه

    ReplyDelete
  43. الله يكون فى عونك يا جميل

    ReplyDelete
  44. امرأة تقول الذي لا يقال

    لا بعد الشر نرجعها ايه ياشيخة .. ربنا يستر ونعدى على خير قولى يارب

    هو الملل مش لطيف خالص الصراحة ربنا مايحكم على حد بيه

    منورانى ياقمر
    :)

    ReplyDelete
  45. ma_3alina

    الله .. اتجوز واجيب اربع عيال كمان .. يسمع منك ربنا هههههههههههه

    ياسيدى مش مشكلة ماهو كله تعب .. وبعدين مين قالك انى مضايقة فى يومى بالشكل ده .. الحمد لله رب العالمين طالما ضميرى مستريح يهون التعب

    ادعى بس ربنا يقوم ماما بالسلامة

    اللهم امييييييين

    ReplyDelete
  46. علاء

    ههههههههههههه
    هتنافسونا فى البوست ولا ايه
    :D

    كومنت جامد جدا

    تحياتى

    ReplyDelete
  47. zordeak

    هههههههههههه

    ياسيدى ولا تعطيل ولا حاجة كل الحكاية كام طبق فى الحوض عاوزين يتغسلوا بس هههههههههههههه

    على فكرة انا بكتب الرد دلوقتى الساعة 6 الصبح ومش جايلى نوم من الحر بردو

    عااااااااااااا

    :(

    ReplyDelete
  48. YHYيــوســف الـمصـرى

    نفسى اعرف ايه البتاع اللى نازل دوعا عليه ليل نهار ده

    ربنا يكرمك يافندم

    تحياتى

    ReplyDelete
  49. الشنكوتي الكبير

    ياسيدى الله يكرمك ويعزك يارب
    ده من زوقك بس

    الله يبارك فيييك ولا متأخرة ولا حاجة انا مستنية النتيجة على اى حال

    ادعيلى انجح يااااااارب
    اللهم امين

    سلااااااام

    ReplyDelete
  50. e7na

    مايعتبرش مشغول ولا حاجة .. ده ده الطبيعى بتاعى
    :D

    تحياتى

    ReplyDelete
  51. No Fear

    وعليكم السلام ورحمة الله وبركاته
    ربنا يكرمك ويعزك يارب
    اللهم امييييين

    ReplyDelete
  52. Ma-3lina

    اه بشيت معاكى يابنتى كل مادخل الاقيكى فى وشى .. ده ايه الناس دى
    ;)

    كلنا السمك خلااااااااص ..كل سنة وانتى طيبة بقا

    منورانى ياقمراية

    بت انتى استنى هنا .. هو انتى دخلتى قلبى كدة ليه عايزة افهم؟؟؟

    ReplyDelete
  53. بيسوو

    هههههههههههه
    لا متخافيش يابيسو مش هياخدو بالهم منى عشان سمرا ههههههههههههه

    ReplyDelete
  54. مـحـمـد مـفـيـد

    ههههههههههه ربنا يسعدك دايما يارب

    طب كويس جدا .. هى اربع شهور دلوقتى وبنأكلها بسكويت .. فيعنى كلها كام سنة كدة وتبقى عروسة ان شاء الله

    جاهزيييين؟؟؟؟

    ReplyDelete
  55. lost in the web

    هههههههههههههههه
    ربنا يكرمك يا نوسة وبعدين انتى مش جديد عليكى الهبل بتاعى ياماما .. فى بيتها يعنى

    إنتى مختفية فين يابت انتى صحيح؟؟؟؟؟

    ReplyDelete
  56. 3abdo me7tas

    ههههههههههههه
    لا بعد الشر عليك من الضرب

    ربنا يكرمك اهلا بيك لاول مرة خطوة عزيزة وعايزين الزيارة تتكرر ان شاء الله

    تحياتى

    ReplyDelete
  57. صاحب البوابــة

    ربنا يكرمك ويبارك فيك يااخى

    تحياتى

    ReplyDelete
  58. أحمد عبد الفتاح

    ههههههههههههههه
    لا الأهرام بيجى عندنا متأخر شوية على 11 كدة ولا حاجة
    :)

    ReplyDelete
  59. loumi

    لومىىىىىى صاحبة الأحاسيس العالية

    ياستى انتى تنورى فى اى وقت المدونة مدونتك .. والواد كاميكاز بيعمل ساقع وسخن والحياة تمام التمام يعنى

    ههههههههههههههه
    لا زعلتينى منك اوى
    بقا متعرفيش كاميكاز؟؟؟
    اخص اخص اخصصصصص

    لا ياستى كاميكاز ده يبقى الفراش بتاع المدونة هنا .. اللى بياخد باله منها فى غيباى .. من الاخر كدة شخصية خيالية ياستى هههههههههه

    ايه ده بجد؟؟؟؟
    ياخسارة انا عاملة البطاقة الجديدة
    بس ماضحكتش فى الصورة
    تفتكرى هتفرق؟؟؟؟
    ههههههههههههههه

    سعيدة بمعرفتك يالومى بجد
    :)

    ReplyDelete
  60. تخاريف دكتور

    تصدق بالله؟؟ الموبايل بتاعى بقا حتة حديدة مصدية .. لا بشحنه فلوس ولا كهربا كمان
    عااااااااااااا

    صباح الحياة الضاااااائعة
    :D

    تحياتى

    ReplyDelete
  61. S H A H

    ربنا يكرمك يافندم
    اهلا بيك دايما وفى اى وقت

    كاميكاز يرحب بزواره
    زورزنا تجدوا مايسركم
    نحن نختلف عن الآخرين .. خاااااااالص
    :D

    تحياتى

    ReplyDelete
  62. sendrlla

    ربنا يكرمك ياسندريلا

    ايه رأيك احط كومنت علاء فى البوست نفسه هههههههههههه

    منورانى ياجميلة

    ReplyDelete
  63. esraa

    من عنيا حاضر
    كل يوم بيطلع اكتر من كدة يا إسو بس هكتب بيحصل ايه كل شوية مش هينفع كدة

    تعبت
    واتجننت
    وهنجت
    :D

    ReplyDelete
  64. أحمد عيسي

    انت بتأطم فيا كدة ليه
    :'(
    :D

    عادى لو مافيش كل ده هيبقى البوست كالتالى

    صحيت الصبح ونمت

    ههههههههههههه

    ReplyDelete
  65. HoNdA

    الله يبارك فيكى يارب

    بس مال الكمبيوتر مزهقق كدة ليه هههههههههههه

    منورانى ياقمراية
    :)

    ReplyDelete
  66. رفقه عمر

    ههههههههههههههه

    مدونتى عملت فيكى كل ده؟؟؟

    كلوا من الواد كاميكاز اللى فاضحنا ده .. تحبى اطردهولك؟؟؟
    انتى بس تأمرى وانا ارميه من الشباك على طول
    :D

    ربنا يكرمك ويباركلى فيكى يارب

    دعوااااتك بالله عليكى

    منورانى بجد

    ReplyDelete
  67. اتفضل عندنا

    هههههههههههههههههههه
    هنعمل ايه يعنى ياحسرة .. طبيخ وغسيل وتهشيك بردو .. وظائف مقدسة يا أختشى ههههههههههه

    ربنا يكرمك ياجميلة انا سعيدة اوى بمعرفتك والله

    ReplyDelete
  68. سكتم بكتم

    العفو اى خدمة
    عملنا فيكوا جميلة اهوه
    هاتوا البحر اللى عندكوا بقا
    هههههههههههههه

    ReplyDelete
  69. fanan fa2eer

    ماهو الحر مزود الموضوع بقا

    ربنا يستر ونعرف نصمد

    دعواااااااااتك

    ReplyDelete
  70. HafSSa

    ربنا يكرمك ياحفصة يارب

    لا الأنتخة حلوة مانكرش .. هنتبطر ع النعمة يعنى؟؟؟ .. بس الفراغ قاتل بعيد عنك

    اااااه من العريس ومن الجيران وبلاويهم
    الراجل عقدنى كل مايشوفنى يقولى البوقين دول اما اتخنقتتتتتتتتتتتت

    ReplyDelete
  71. يا مراكبي

    الله يبارك فيك يارب عقبال انجالك يا ابو مها هههههههههه

    اللهم امين ربنا يكرمك يارب

    ReplyDelete
  72. camera_girl

    ربنا يسعدك دايما يا كاميرتنا ياللى هارية مصر تصوير ههههههههه

    كتبته من التهييس يابنتى وكل حاجة اتقالت حصلتتتتتتتتتت

    وانا قلت ونبهت
    واديت الرضعة للبت

    هههههههههههههه

    ReplyDelete
  73. Just a Reader

    عندك حق والله .. فعلا لازم نستمع بكل مرحلة

    وشعار المرحلة اللى انا فيها دى

    الحلة ع النااااار ولازم نقطع الخيااااار

    هههههههههههههه


    اهلا بيكى ياجميلة منورانى

    ReplyDelete
  74. الربان

    كلامك صح جدااااا

    اه والله اتكسفت
    شوفت الزنقة اللى فيها وقعت؟؟

    ههههههههههه

    اهلا بيك يافندم

    ReplyDelete
  75. عقد الياسمين

    ربنا يكرمك ياجميلة
    اللهم امين واياكى يارب
    آميييين

    ReplyDelete
  76. SAKAyAR

    ههههههههههه حلوة علقت دى

    ربنا يكرمك ويعزك يارب اميييييين


    تحياتى

    ReplyDelete
  77. إبراهيم محسن

    ربنا يكرمك بس ايه أمارات التخرج دى؟؟؟

    شعرى سنانى هتقع ولا حاجة؟؟؟؟

    مش طويل ولا حاجة ده فى كلمتين خلص اهوه

    يارب الاقى ادعيلى الله يكرمك

    كلية اقتصاد يافندم .. ومش منزلى
    ههههههههههههههه

    ReplyDelete
  78. mohamed

    ربنا يكرمك يا استاذ محمد

    اهلا بيك

    ReplyDelete
  79. كراكيب عادل

    يا اهلا بالمبدعيييين

    التهيسة فضحتنى يعنى .. طب ده شئ كويس جدا ههههههههههه

    واحسن مبدعين كمان

    الصور اللى عندك تحفة بجددددد ما شاء الله لا قوة الا بالله

    ReplyDelete
  80. أمــانــى

    هههههههههههه
    طبعا يابنتى كفاية الجو اللى عندكوا
    ده انتوا لو اتكلمتوا تنهجوا اصلا ههههههههههههه

    منورانى ياقمر

    ReplyDelete
  81. mimi

    سبحان الله .. تصدقى بعد ما قريت تعليقك وانا بقيت بنام بغل كدة .. باخد حقى بإفترا ههههههههههه

    سلاماتى ليكى ياجميلة

    ReplyDelete
  82. حقى اهرتل

    الله منا كمان حقى أهييس

    ههههههههههه

    ReplyDelete
  83. غمض عينيك

    ههههههههههه تصفيق حاااااااااد

    اهلا بيك يافندم شرفت المدونة

    لو كوكو عملك اى حاجة إشارة بس وانت تشوف هعملك فيه ايه ههههههههه

    تحياتى لك

    ReplyDelete
  84. semsem

    الله يكرمك ده من زوقك بس

    اروق؟؟ .. روقت المطبخ الحمد لله ولما اصحى هكمل ان شاء الله
    :D

    تحياتى

    ReplyDelete
  85. رينـــــــــــا

    وانتى موتينى من التنهيدة يابنتى
    هههههههههههه

    رومانسية بجد يعنى
    :D

    ReplyDelete
  86. mariamagdolen new

    ربنا يكرمك ياقمر

    ReplyDelete
  87. جامده اوى اوى

    بجد انا فوجئت بالمدونه بتاعتك ...ازاى انا ماعرفهاش ؟؟؟

    :)


    تحياتى ليكى و ميرسى انك زورتينى و ابقى تعالى كتير


    سلام

    ReplyDelete
  88. السلام عليكم ورحمة الله وبركاته

    ههههههههههههههههه

    دي آخرت الحر بوظ دماغ 99,99% من الشعب ، المفروض ماكنتيش تعملي بوستات الا بعد الحر ما يخلص

    بس قوليلي عرفتي تعملي كل الحاجات دي مع بعض ازاي ..... سلطه وطحينه واسانسير وجرايد وعيال صغيرين وغسيل..,....و....و...الله يكون في عونك

    بقي بزمتك يا شيخه مش الكليه ارحم


    يلاا ربنا معاكي

    ReplyDelete
  89. أحلي تهييس و الله

    مدونتك راااااااااائعه

    و يا ريت تشرفيني في المدونة

    :)

    ReplyDelete
  90. هههههههههههه
    بجد واضح ان انت مالكيش حل

    تحياتى

    ReplyDelete
  91. وانا من الضحك سخسخت

    ومن كلامك اتعجبت

    عشان انا زيك اتخرجت

    بس كل العمايل دى مش عملت

    يمكن لانه معنديش اخت وليها بنت

    ولاجيران من رغيها صدعت

    بس حقيقى يعنى وبجد

    انا بمعرفتك فرحت

    ومن تهييسك انبسطت

    وبكلامك التلقائى استمتعت

    وشكلى كتبت بدل التعليق بوست:D

    ReplyDelete
  92. كويس اوي بتعرفي تشغلي وقتك والله برافو عليكي
    شاطرة

    ReplyDelete
  93. لينك لقيته ودخلت
    شوفت البوست انبهرت
    حبيت ارد تنحت
    فأى حاجة كتبت
    بعد ما إللى قدامى وإللى ورايا بعت
    وفى زيارة مدونتك اشتغلت
    قلت اعلق وطرت ....

    ReplyDelete
  94. يارب نفرح بيكي
    :)
    برضه
    هو الجرنان بتجيبوه بالليل ليه

    ReplyDelete
  95. ايه اليوم الزحمه ده
    هو احنا كلنا كده يومنا فيه حاجات كتير

    ReplyDelete
  96. هههههههههه...يا دماغك
    جامده جدا يا انسانه
    تحياتي لكي

    ReplyDelete
  97. انا شفتك لما هيستى
    وبصراحة ضحكت على اللى كتبتى
    وضحكت اكتر على اللى عملتى

    بس بجد هو ليه مفيش عريس فى ايديك .. انتى مش عارفة انهم بيوزعوهم فى ميدان العتبة ؟ ههههه

    تهييس رائع

    ReplyDelete
  98. ههههههه
    بجد جامده اوي الفكره دي
    وانتي عامله ايه دوأت
    هههههههه

    ReplyDelete
  99. هههههههههههههههههههه
    حلوة اوي اوي اوي

    اليوم عندك جميل اوي وفيه بركة .

    ووصفك دمة خفيف أوي وجميل أوي

    ReplyDelete
  100. مدونتك جميلة

    واضح انى هكون زبون دائم هنا

    هحاول اقرا كل موضوعاتك من اولها لان بجد الاسلوب عجبني

    والسلام

    ReplyDelete
  101. Hello, my friend! This day 8 I go for Africa. I go I stop next to abandoned children. When I to arrive, in October, go to visit you. I take you in my heart. Until always

    David Santos

    ReplyDelete
  102. شفناكي لما هيستي
    وفي البلوج وافتكستي


    ههههههههههههههه

    بس كده مافيش حاجه تانيه تتقال انا التعليق رقم 102

    معتقدش اني حضيف حاجه على اللي اتقال قبلي
    بس بجد بوست حلو

    ReplyDelete
  103. Shower-Mirror

    ربنا يكرمك يافندم اهلا بيك دايما

    المدونة مدونتك

    :)

    تحياتى

    ReplyDelete
  104. خمسة فضفضة

    ااااه ماتفكرنيييييش الحمد لله الموجة انكسرت

    تصدقى بالله؟
    فى احداث تانية كتيرة حصلت مارضتش ادوش دماغكوا بقا هطفطسوا منى فى الحر ده هههههههههه

    بصراحة .. ارحم بكتيييييييييييير

    تحياتى ياجميلة
    بحبك فى الله
    :)

    ReplyDelete
  105. و القادم....أجمل

    مبرووووك المدونة ياجميلة ويارب تبقى حاجة مهمة اوى كدة فى الفضاء البلوجرى
    منورانى اوى
    :)

    ReplyDelete
  106. اه يا دماغى

    :D
    ربنا يكرمكككك

    تحياااتى

    ReplyDelete
  107. SoRsaRaa

    ههههههههههه

    والله واجدع بوست يا صرصارة الصراصير ياجميلة ههههههه

    انا اللى اتشرفت وبتعليقك فرحت وبحبك فى الله بجد
    :)

    ReplyDelete
  108. sendbad

    مجبرة اختك لا بطلة
    :((

    ReplyDelete
  109. The Manager

    وانا بزيارتك اتشرفت
    وبتعليقك انبسطت
    ومن كلامك انبهرت
    بصحيح يعنى طرت؟؟
    ههههههههه

    اهلا بيك يافندم شرفت المدونة
    :)

    تحياتى

    ReplyDelete
  110. عصفور المدينة

    اللهم امين ربنا يكرمك

    والله بيجى عندنا بالليل اعمله ايه
    بس جرنان بكرة .. يعنى جرنان الجمعة نجيبه الخميس بالليل وكدة يعنى

    :D

    اهلا بيك فى المدونة يا استاذى

    ReplyDelete
  111. koukawy

    كوكو الكميل عندى مرة واحدة
    يا مرحبا يا مرحبا

    منورانى بجد اوى
    :)

    ReplyDelete
  112. micheal

    :D
    متشكرة جدااااا

    تحياتى ليك
    :)

    ReplyDelete
  113. omar مشروع بطل

    هههههههههه
    عتبة ايه بس حرام عليك
    هتبقى انت وعمو الحاج ده عليا
    :(

    ربنا يكرمك يااخى ويعزك يارب

    ReplyDelete
  114. تامر حسين

    :D
    عاملة رز وبامية وبتنجان مخلل
    أغرفلك؟؟؟

    اهلا بيك وشرفت المدونة
    :)

    ReplyDelete
  115. احمد رفعت

    ربنا يكرمك ويعزك يا استاذ احمد

    اهلا بيك فى المدونة ونورت
    :)

    ReplyDelete
  116. Islamist Bloke

    ياسيدى الله يكرمك
    ده من زوقك بس
    المدونة تحت امرك اقرا براحتك
    بس اوعى كاميكاز يضايقك بحذرك اهوه وقد اذعر من انذر
    :D

    والسلام

    ReplyDelete
  117. david santos

    Thanks alot ...
    :)

    ReplyDelete
  118. اسكندراني اوي

    قل اعوذ برب الفلق
    ايه يا استاذ اسكندرانى هنقر ولا ايه
    :D

    يافندم الله يكرمك ويعزك واهلا بيك فى المدونة دايما

    تحياتى

    ReplyDelete
  119. السلام عليكم
    لما يكون ده يوم واللى حصل دة مش بيتكرر تبقى مبلوعة لكن لو بيتكرر معاكى كل يوم
    اوعى تكتبية تانى كان الله فى عونك

    تحياتى

    ReplyDelete

  120. وانا قبل ما الاوضة دخلت
    وقبل ما عالسرير اترميت
    قولت في سري لانسانة انا لسه مش قريت
    قومت من نومي وللكمبوتشر فتحت
    وعالليستة بتاعتي ومدونتها روحت
    وفتحت لسيادتها أخر بوست
    عجبني كل الكلام في البوست
    وقولت في سري لازم اسيب كوممينت
    فروحت دايس على بوست أ كومنت
    ورميت البوقين دولا بعد ما بسملت


    وربنا يستر :)

    تحياتي لك من ماناساس البلد

    ReplyDelete
  121. very nice and light blog!!!!!!!!!bs msh t3rfena bkolytk deh eh??

    ReplyDelete
  122. دمااااااااااااااااااااااااغ :):)
    حلوة اوووى

    ReplyDelete
  123. والله جميلة انا كمان لسه قاريها اسلوبك خفيف ولذيذ واتمنى بنتى تكون زيك كدة بس هى بتحب الرسم اكتر

    ReplyDelete

الكلمـة نـور .. وبعـض الكلمـات قبـور