Wednesday, August 22, 2007

Think Differently


طبعا زى مانتوا عارفين الواد كاميكازعشان ثقافته مش عالية زى حلاتى فمفهمش حاجة من العنوان ولا من الصورة وقعد يصوت ويحتج ويندد ويشجب ويرفض فى البوست وراسه والف كاميكازاية انى مادخلش احط البوست فى المدونة، يهديك يرضيك يا كوكو ، ابدااااااااااااااا
.
شكله مابيجيش بالذوق، قمت مسكاه من تيشيرته الكاميكازى وحدفته ع الكرسى اللى على باب المدونة وربطه ربط شدييييييييد عقبال ما اخلص واكتب البوست العجيب ده
.
بس صوعوب عليا بقا عشان هو غلبان وكوكو فحقوله انا كاتبة كدة فى البوست ليه .. بقا يا جماعة الحمد لله نفسيتى ابتدت تظبط الحمد لله وده كان نتيجة انى حاولت احسبها حسبة تانية .. وقد كان ، حاولت افكر بطريقة مختلفة وابقى اكثر مرونة فى مواجهة نفسى واحزانها ده اولا وفى مواجهة حياتى والناس بشكل عام ده ثانيا .. وكل مشكلة وليها حل وربنا كريم وان شاء الله خير
.
بحاول ارجع لياسمين الأولانية المتفائلة اللى دايما بتضحك وتحب تضحك غيرها ، هرجع اقرا من تانى ان شاء الله واكتب كمان زى الاول من الاخر كدة ححاول ألاقى نفسى وارجعلها إن شاء الله .. وسبحان الله جاتلى سفارية مصيف وكدة فى وقتها الحمد لله ..نفسى اعمل ريستارت لنفسى شوية
.
الله ماتزقش ياواد يا كوكو مستعجل على ايه .. مش حاخدك معايا طبعا انت هنا مكانك المدونة دى امانة فى رقابتك انت .. عبيط ده ولا ايه
.
المهم اما احكى معاكوا شوية بقا قبل ما اقوم اعمل كام مشاور كدة ، امبارح بعد الغدا قعدت قدام التلفزيون اتفرج شوية ونعست فنمت حبة ، حلمت حلم جمييييييييييييييييييييل ، ماخبيش عليكوا كنت بحلم بفارس أحلامى وكان بيفسحنى تقريبا وكنت مبسوطة اوييييييييي ، لاقيت مرة واحدة الحلم اتقلب كابوس وزعيق وشخط ونطر من جارنا ومراته
.
هى: انت فوضوى ومالكش فى النضافة

هو: احترمى نفسك بقولك

هى: احترم ايه انت خليت فيها احترام .. حد يفتح باب التلاجة ويسيبه مفتوح فى الدنيا

هو: لمى نفسك بدل ماجى الطشك بالقلم

هى: انا مش عارفة اخرتها ايه معاك مش عارفة

هو: اخرتها سودا إن شاء الله
.
يا فتاح ياعليم يا رزاق ياكريم .. بقا هو ده الجواز؟؟ بقا هو ده الحب؟؟ .. لا حول ولا قوة الا بالله
نفسى اتسدت اوى ساعتها وحسيت ان الحلم الجميل اللى كنت بحلم بيه عبارة عن طُعم عشان ادخل القفص ده برجلى وبمزاجى ... خدعة يعنى من الآخر كدة
.
شوية نزلت عشان اقيس الضغط اصلى كنت تعبانة شوية بعيد عنكم لاقيت البت بنت الجيران اللى فى اعدادى راكبة معايا ..هى اطول منى صحيح بس هى فى اعدادى الحق يتقال يعنى ، بس الاسانسير عندنا فيه مراية عقبال عندكم فقعدت اظبط فى الطرحة لاقيتها بتبصى وتبرقلى جاااااااامد كدة وتقولى: انتى لسة متخطبتيش؟؟؟!!!!ه

جاتلى صدمة الصراحة .. هو فى ايه يا جدعان؟ .. قلتلها بإستنكار: هه .. انا؟؟ .. لا لسة متخطبتش

هى: انتى فى سنة كام السنة دى؟

إنسانة: اتخرجت خلاص

هى: بجد؟؟ يعنى عندك 21 سنة؟؟؟

اللهم طولك ياروح: ايوة عندى 21 سنة
.
كدة بقا كتيييييييييييييير اوى بجد .. وانا مش مكبرة الموضوع ولا حاجة ومش طبيعى ابدا ان اى مكان اى البنت تكون فيه لازم تتسأل اتجوزتى ولا اتخطبتى .. لا حول ولا قوة الا بالله
.
الموقف الخنيق ده فكرنى بموقف تانى اخنق منه كنت راجعة فى يوم من كتب كتاب صحبتى وكنت فرحنالها اوى .. ربنا يتمم بخير يارب .. وقفت اطلب الاسانسير "تقريبا الاسانسير ده هو اللى جايبلى الكافية انا بعد كدة حستخدم السلم واريح دماغى" ... لاقيت جارنا عارفينه من زمان متجوز وعنده عيلين لذاذ كدة سلم عليا وسلمت عليه ولاقيته بحلقلى واذبهل وانشكح فجأة كدة وقالى: إنتى تجوزتى؟؟!!!!ه
إنسانة: هه.. انا؟؟؟ .. لا
هو بنفس الإنبهاجة ياربى سبحان الله: إتخطبتى؟؟؟!!!ه
ابتديت اقلق على نفسى بقا شوية شوية يقولى وشك اصفر ولونك مخطوف قلتله : لأ
قام سايبنى وكمل اذبهاله ومشى
.
لا حول ولا قوة الا بالله .. هو انا حلاقيها من عمو وطنط ولا الواد جارنا ولا البت جارتنا .. شكلى كدة حرفع قضية ع العمارة كلها بما فيهم الأسنانسير كمان .. ناس غريبة صحيح
.
المهم بقا حسيبكم عشان الحق ارتب حاجتى عشان اسافر ان شاء الله .. اسبوع حغيبه كدة بإذن الله وسايبة الواد كوكو هنا يا جماعة واى تقصير فى ايوتها حاجة قولولى بس لما اجى .. عايزة الاقى تقارير كدة مهببة عن البلاوى السودا اللى بيعملها الواد كوكو وانا مش فى المدونة، وكمان عايزة لما ارجع ان شاء الله اكلمكم عن حملة يلا ننضف مصر وعن الشاب بتاع هونج كونج واحتمال انزل بوست راديو ياسمين ولو منفعش حنزله بعد رمضان ان شاء الله .. المهم اشوفكم على خير يارب والاعمار بيد الله زى مانتوا عارفين فأوصيكم ونفسى بتقوى الله فى السر والعلن وربنا يجعلنا من المتقين
.
استودع الله دينكم وأمانتكم وخواتيم اعمالكم
السلام عليكم

39 comments:

  1. تروحي وترجعي بألف سلامة
    :)

    ReplyDelete
  2. من الحاجات اللي الواحد اتعلمها انه ما يسألش حد اذا كان بيشتغل ولا لسة..وما يسألش واحدة انتي اتخطبتي ولا لسة..وما يسألش واحدة متجوزة هي حامل في الشهر الكام

    عادة بعد الاسئلة دي الواحد بيلبس في حيطة..هههه

    سفرية سعيدة انشاء الله :)

    ReplyDelete
  3. ـروحى و ترجعى بالف سلامة

    اه صحيح انتى متخطبتيش ليه لغاية دلوقتى؟؟

    بصى يا بنتى اول راجل يخبط على بابك شيلى ان شاء الله البوااااااب

    ReplyDelete
  4. تروحى و تيجى بالسلامة يا سيمووووووووووووووو

    ReplyDelete
  5. إذا تقدم الرجل لفتاة في العشرين تسأل كيف هو ؟؟

    وإذا كانت في الثلاثين تسأل
    من هو ؟؟

    وإذا كانت قاربت الأربعين تسأل

    أين هو ؟؟

    ياتري أنت حتسألي أزاي

    ترجعيلنا بالسلامة وأوعي تكوني جاية تصيفي عندنا قوليلنا نقوم بالواجب

    ReplyDelete
  6. تروحي وترجعي بالسلامة يا اجمل انسانة
    الا صحيح هو انتي مش متجوزة ولا مخطوبة؟؟؟؟

    رحلة سعيدة
    محمد سمير

    ReplyDelete
  7. السلام عليكم
    كل سنة و أنت طيبة
    ترجعي بألف سلامة و خير و تكوني عملتي فورمات و نزلتي نسخة جديدة كمان من روحك السابقة اللي بتتمني ترجعي لها
    بس ياريت تكوني سعيدة من برة و من جوة يعني أنت في الأول كنتي بتضحكي بالرغمن من وجود حزن بداخلك مش عاوزين حزن و لا يأس و لا خوف
    المهم مصيف سعيد و ترجعي بألف سلامة بصراحة مش هأقدر أفتن علي كيمكاز علشان أنا مرتاح له

    ReplyDelete
  8. بسم الله الرحمن الرحيم
    السلام عليكم ورحمه الله وبركاته

    متقلقيش بعدم زواجك او خطبتك ولا انت متاخره ولا حاجه
    انا اعرف ناس مش لسه متخرجين زي حضرتك لا ده معاهم ماجيستر ومشين في الدكتوره ولسه متجوزوش
    ربنا يكتبهالك (الجواز يعني)في اقرب مما تتصورين يارب امين مع شاب يخاف الله ويرعي اهله

    بس هي العمليه رزق وابتلاء من الله فنسال الله الصبر

    ReplyDelete
  9. انسانة ازيك
    انا سمر
    تخيلى والله نفس السؤال ده كتير بيتسألى
    انتى لسة ماتخطبتيش
    زى ماكون ماشية بعكاز وطقم سنان مدلدل منى
    حاجة مملة والله
    بس مش مشكلة
    بلوج جميل ياقمر

    ReplyDelete
  10. الاول تروحي وترجعي بالسلامة وخدي بالك من نفسك

    بعد كده بقى ده العادي متخافيش على نفسك

    هي دي مصر يا ياسمين:)

    المهم خليكي مع نفسك واعادة اكتشافك

    ReplyDelete
  11. ننتظر عودتك قريبا ان شاء الله

    تحياتي

    ReplyDelete
  12. ترجعى بالسلامة يا انسانة مستنياكى تيجى مدونتى .....كويس اوى ترتيب الاولويات ده

    وعلى فكرة كاميكاز امووور خالص وبيسمع الكلام

    مستنياكى ..ترجعى تنورى المدونة

    ReplyDelete
  13. تروحي و ترجعي بالسلامه
    بس بمناسبة خناقة التلاجه
    هي حاجه تشل ان الواحد يبقي بيظبط و ينضف و يرتب و يجي حد باهمال يبوظله الدنيا
    هتوحشييينا

    ReplyDelete
  14. إن الكيميائي الذي يستطيع أن يستخلص من عناصر قلبه الرحمة والاحترام واللهفة والصبر والندم والدهشة والعفو ويدمج هذه العناصر في عنصر واحد يمكن أن يخترع هذه الذرة التي تسمى الحب .... جبران خليل جبران

    مش اول مره اجي المدونه عندك
    بس اول مره اشوف الكلمتين دول
    :)يمكن علشان احلام الحب اللي ماليه البوست
    بجد كلمتين حلوين

    بالنسبه للبوست

    جميل التفكير في النصف الممتلئ من الكوب
    قريت اعترافات اللي تحت والحمد لله ان الفتره دي انتهت

    بالنسبه لفارس الاحلام
    انتي انسانه تستاهلي كل خير فاصبري شويه لغايه ما تلاقي اللي يستاهلك

    بالنسبه للسفر
    بيفيد قوي فتره من تنقيه الذهن لتعيدي تقييم الحياه من حولك
    وعليكم السلام وتروحي وترجعي بالسلامه

    ReplyDelete
  15. تروحى وترجعى بالسلامة

    يا حبيبة قلبى

    وتأكدى دايما ان ربنا سبحانه وتعالى

    عاوزلك الافضل وجايز لسه محصلش نصيب

    وعلى فكرة انا اعرف 3 بنات واحده عندها 26 سنه وواحده25 وواحده22 وكلهم لسه متحطبوش يعنى ده شئ عادى جدا

    ReplyDelete
  16. عزيزتى
    سنه 21وبيسألوكى اتجوزتى ولا اتخطبتى هما مش من هنا
    خلاص دلوقتى سن الجواز مفتوح
    ولو شوفتى عريس 40سنه ولا عرسوسه 30سنه بقا عادى وطبيعى
    كويس ان نفسيتك ابتديت ترتاح كده وتهدى اصل لازم نريح اعصابنا ومنحرقش فيها وفى الزمن ده توقعى اى شئ وكل شئ من اى حد وفى اى وقت
    يبقا استعدى من دلوقتى من اولها تتعبى وتكتئبى
    اتمنالك مصيف سعيد
    تحياتى
    سلام

    ReplyDelete
  17. تروحى وترجعى بالســلامة يااااااااااااارب آمــــــــين
    و21 سنة ومطلعين عينك ههههههههههههههه
    هههههههههههههههه
    هههههههههههههه
    هههههههههههههههه
    اصلهم دقة قديمة اووووووى لما هما أصلآ يتعدوا على الصوابع اللى بتتجوز على 21 او 22 حتى لو مخطوبة اصل الظروف هى اللى بتحكم على العموم متخافيـش ومستعجليش كــل شـئ بأمر الله
    ومالكيش دعوة بيهم سيبك منهم

    ReplyDelete
  18. ترجعى بالف سلامه ياسمين

    ReplyDelete
  19. سكر والله يا انسانة

    اظاهر شكلك في اليوم ده كنتي زي القمر و زي العروسة كدة
    عشان كدة الكل خد باله

    تروحي و ترجعي بالسلامة ان شاء الله

    متغيبيش و ان عرفتي تردي علينا اثناء الاجازة يبقى زادنا شرف يا انسانة و اطمنا عليكي


    سلام مؤقت

    ReplyDelete
  20. السلام عليكم
    اولا وحشتينى جدا
    ثانيا الف سلامه عليكى من الحزن يا قمر يارب اللى يكرهك يارب
    ثالثا بئا سيبك يابنتى من الناس اللى عايشه وهم ان البنت تتجوز من 20 سنه و 21 سنه دى هو فى ناس لسه بتفكر كدا اصلا
    الجواز قسمه ونصيب وهييلك ان شاله عندك 40 سنه
    رابعا يارب ترجعى بالف سلامه وريستارت موفق ان شاء الله

    ReplyDelete
  21. ترجعي بالسلامة يا بنوتة

    اليومين اللي فاتوا كانوا احراج ع الاخر بقي.. امه لا اله الا الله عرفت ان في حاجة ..تسرع من عيلتي انا مالي انا

    حبه وخير تلقي ناس متعرفيهاش بتتصل هاه ايه الاخبار عاملين ايه مع بعض

    تبقي مش عارفه تضحكي ولا تعيطي ولا تدعي علي اللي مسك الميكروفون ونشر الهبل ده
    :)
    سيبك سيبك انا جتلي فوبيا الاسانسيرات من شوية

    ReplyDelete
  22. تيجي بالسلامه مستنيينك
    تحياتي

    ReplyDelete
  23. السلام عليكم ورحمة الله وبركاته

    اهو دا الكلام يا احلي انسانه

    تروحي وترجعي بالف سلامه

    خالص التحية

    ReplyDelete
  24. السلام عليكم
    ولا يا كميكاز مش محتاج حاجة عندك أكل و لا سابتك من غير أكل
    علي العموم لو رجعت أو أتصلت بك من هناك سلم عليها
    لو محتاجة حاجة ادخل عندي و خد اللي أنت عاوز

    ReplyDelete
  25. ههههههههه

    انت لسه متخطبتيش؟!!!!!
    (وجه مذبهل لابراهيم)

    ههههههههه
    ترجعي بالسلامة

    ReplyDelete
  26. مش عارفة
    حاسة اني أعرفك بجد..
    تفتكري نكون اتقابلنا قبل كدة؟

    ReplyDelete

  27. ناااااااااااااااااس

    معندهاش دم

    ReplyDelete
  28. ترجعيلنا بالسلامه ياقمر

    سيبك من جيرانكم دول
    بكره تاخدي اللي يستاهلك بجد ;)

    ReplyDelete
  29. ana awel mra agy modawantek
    3la fekra ana kman esmo yasmin w bardo kan 3andy 7alet ekte2ab men el donia w bardo el7amdolelah rabena 5aragny menaha b3d ma karrart a3'ayar taree2et tafkeery w bardo kont 3la tool bad7ak w bada7ak el nas
    ana 7set enk betetklmy 3anena bas anna mafish 7ad byes2alnyy enty et5atabty wla lesa 3shan el nas asln mefakarany lesa so3'ayara bey2ololoy en ana lesa fy e3dady m3a el 3elm en ana lesans el sanady
    hhhhhhhhhhhhhhhhhhhh
    ma 3lena forsa sa3eeda awy w tero7y w terga3y bel salama

    ReplyDelete
  30. ترجعى بالسلامه ان شاء الله

    ReplyDelete

  31. تروحي وتيجي بالسلامة يا رب ويا رب نطمن عليكي دايما

    تحياتي لك من ماناساس البلد

    ReplyDelete
  32. تروحي وترجعي بالف مليون سلامه يا قمر

    رحله سعيده وموفقه ان شاء الله يا حجميله


    تحياتي

    ReplyDelete
  33. ههههههههه يعنى ايه كاميكاز

    ههههههههه انا مش قدارة ابطل ضحك عارفة احسن حاجة اننا فى الدور الاول فمش بضطر انى اركب الاسنسير وحتى لما اركبه علشان اطلع احفظ قران فوق مش ببقى عارفة حد اصل احنا ملناش علاقة بالناس هنا اوى


    عامة تروحى وتيجى بالسلامة , بس صحيح كان فى سؤال كده


    انتى اتخطبتى ولا لسه؟ ههههههه

    ReplyDelete
  34. اه نسيت اقولك مش ينفع احنا الاتنين نكون انسانة لازم واحدة قينا تتخلى عن انسانيتها ههههه

    اقولك خلاص انا انسانة صغننة وانتى انسانة كبيرة ماشى

    ReplyDelete
  35. تروحي و ترجعي بالف سلامه
    هم الناس كده حشرين جدا و يتدخلوا فيما لا يعنيهم
    معلش يا انسانه ناس معندهش دم
    اجازه سعيده ان شاء الله

    ReplyDelete
  36. هاتوحشيني يا ياسو بجد

    عندما تبلبطين فى الماء..........تذكريني

    عندما تلعبين فى الرمال..........تذكريني

    عندما العيال الصغيرين اللكاكين اللى مالهمش لازمة خاااااالص يقرفوكى........... ارجوكى لا تتذكرينى


    هاتوحشيني يا قمر

    طيب احمدى ربنا انك بيقولوا لك كده وانتى عندك واحد وعشرين سنة اممال انا عندى 18 اولع فيهم بقى ولا ايه كل خطوتين عقبة لك عقبة لك لما حاجة تموت

    ياللا عقبة لك يا قمر عن قريب ونفرح بالجميل كده وهازغردلك لما صرصور ودنك يون بس ياللا انتى

    ReplyDelete
  37. اظن كفايه كدة
    وبطلى تقل علينا
    كميكاز زمانه مات من قله الكلام
    حرام عليكى كدة ارحميه شويه
    منتظراينك
    كل سنه وانتى طيبه

    ReplyDelete
  38. والله عندك حق
    ناس غريبه
    تتنفس أسئلة أغرب
    وتنحشر في اللي مالهاش فيه

    ReplyDelete
  39. اكتر سؤال بكرهه فى حياتى
    "انتى اتخطبتى ولا لسه؟انتى مرتبطه ولا لا؟"
    مش فاهمه بجد مال الناس انى اتخطب ولا اعنس مين هيفرح غيرى بالخطوبه
    بس تقولى ايه محدش بيريح روحه بعيد عنك

    على فكرة بحسدك انك خلصتى ومشيتى من فيبس ادعيلى اخلص على خير بقى انا كمان

    ReplyDelete

الكلمـة نـور .. وبعـض الكلمـات قبـور