Sunday, November 11, 2007

جربت مواصلاتها؟؟؟؟


قبل ما اقول الكلمتين اللى واقفين فى زورى وجاية اصدعكم بيهم احب اضيف لمعلومات حضراتكم هذه المعلومة الصغيرة واعلن لكم عن هذا النبأ الهام .. لقد قامت الإدارة الفيسبوكية الغاشمة بغلق الحساب الإنسانى الكاميكازي بتاعى مساء يوم الجمعة اللى فات بدون اى اسباب واضحة ... هذا وقد تباينت ردود افعال الكثير من الأصدقاء فأنقسموا بين المستغربين والمحتجين والغاضبين والزعلانين والفرحانين والشمتانين والغائظين والكاميكازيين ، على اى حال بقولهم كلهم جزاكم الله خيرا .. الحمد لله على كل حال .. وجارى فتح حساب جديد بنفس الإسم القديم بإذن الله مع انى مكسلة اعمل كدة بس يلا مش مشكلة

المهم دلوقتى نرجع للبوست .. كنت حتتكلمى على ايه يابت ياسيمو؟ على ايه ؟ على ايه ؟ على ايه ؟؟ مممم!!!!..اه افتكرت


متغرب عن بلدك؟
وحشاك مصر؟
بجد؟؟!!!ا
إشطــــــــــة

قرررررب جرب قررررررب .. هنا مش بنهرج .. شوارعنا بقت بقت سيرك .. واللى مايشترى يتفرررررررج


كان عندى معاد مهم مع صحبتى فى الجامعة وبما انه معاد مهم فلازم اصحى بدرى عشان اروح لانى ايام الكلية كنت بنزل قبل المحاضرة بنص ساعة .. استعباط يعنى .. قولت فى نفسى لأ لازم اروح فى معادى المرة دى ، فنزلت قبل المعاد بساعتين كدة على تمانية إلا كمان

وبكدة بقا تبقى بدأت بجد لعنة شارع فيصل تشتغل يا حضرات .. المهم نزلت وهاتك يا مشى .. الشارع واقف كالعادة ولازم اروح امشى محطة قدام يمكن الاقيلى اى حاجة .. بعد ماتمشى محطة حتلاقى ناس كتييييير واقفين عايزين يركبوا .. الناس دول واقفين فييييين ياترى؟؟؟ .. واقفين فى الملف ياجماعة ، ايوة الملف بتاع العربيات مش بتاع البنى آدمين .. مية واقفين عند الملف ومية تانين ع الناحية اللى رايحة ومية غيرهم ع الناحية اللى جاية وصوتى ياللى اسمك إنسانة .. يالهووووووووووووى

تقف بقا ابقى قابلنى لو حاجة عبرتك ووقفت ولو فرضنا يعنى جه ميكروباص شارد كدة وعدى كلهم بيهجموا عليه ولو فكرت مجرد التفكير انك تطلع وتحارب عشان تركب انت كمان تبقى هزأت نفسك جامد اوى اوى اوى يامعلم

يالهوى وانا حستناهم ؟!.. مشيت يجى محطة كدة كمان يعنى قول كيلو كدة ده غير الكيلو الأولانى .. السبب فى المشى ده كله ان العربيات مش بتشمى الشارع كله لأ دى بتلف عشان المسافة تبقى اقصر وتاخد فلوس اكتر .. بس ومشيت ورحت وقفت فى الملف التانى اللى بعد كيلو ..كان الوضع اهدى شوية الصراحة يعنى خمسين واحد فى الملف وخمسين ع الناحية اللى رايحة وخمسين ع الناحية اللى جاية وبس

فضلنا واقفين نستنى .. نستنى .. نستنى .. إن اى حاجة تقف لنا ؟ ابدااااااااااااااا .. لما الشمس كلت نفوخى ..ناحية الشارع فيها فاضى وبينش ولا عربية عايزة تعدى وتاخدنا والناحية التانية اللى رايحة ناحية الكوبرى واااااااااااااااقفة

المهم بقا فييييين وفيييييين لما عرفت اركب مينى باص ، اخر مكان كان موجود اخدته سيدة فاضلة ركبت قبلى على طول ، مش مشكلة اقف انا والحمد لله كل اللى حواليا كانوا بنات فالأمن مستتب بفضل الله

بدل ما كنا واقفين فى الشمس بقينا واقفين فى العربية والشارع وااااااااااااااااااقف .. يعنى عشان الميكروباص يمشى خطوتين كدة يقعدله بتاع تلت ساعة مثلا ، كل ده الساعة تمانية ونص يعنى عز اشغال الناس وكدة .. المهم فضلت واقفة وفى ناس كانت قاعدة والمينى باص زحم ع الاخر ده غير الشارع اللى حينفجر من كتر الناس ..
والوقت يعدى ويعدى ويعدى ويعدىىىىىى ولاقيت مرة واحدة الست اللى واقفة جمب جوزها بتقوله: بقولك ايييييه انت تعزلنى من الشارع المنيل ده انا مش قادرة !ا

سمعنا وسكتنا عادى ماحنا ياما بنسمع .. عادى يعنى

ومرة واحدة سمعنا صوت واحدة ست بتزعقققققققققققق وبتبهدل بكرامة واحد راكب بردو الأرض ، شتمته جامد جدا وراسها والف بتاع لاالسواق ينزله من الميكروباص .. ياستى معملتش حاجة ..اخرس يا تيييييييييييت لا اوديك البوليس انت عارف انت عملت ايه كويس !!!!!! لا حول ولا قوة الا بالله الموضوع دخل فى الغريق باين عليه .. الغريب ان الراجل نزل فعلا من الميكروباص وهو بيقول ربنا ع المفترى

فى اثناء فترة الإذبهلال اللى كنت فيها دى لاقيت الست الفاضلة اللى قعدت على اخر كرسى كان فاضى بتميل عليا وتقولى هامسة ً:لو مكنش غلطان مكنش نزل ! .. قلتلها عندك حق بس كويس انه نزل اساسا اصل البجاحة زادت اليومين دول وتلاقى اللى يقول انا معلمتش حاجة ويطلعوها هى الغلطانة فى الاخر

الشارع لسة واقف زى ماقلتلكوا والتباع بتاع البتاع - اللى هو المينى باص يعنى - نزل يلمع فيه اهو يستغل وقته واللى نام ياعينى من طول الوقفة واللى مش فاهم حاجة واللى حيتجنن وبيتصلوا بيه يستعجلوه فى الشغل واللى قاعدين ومش معبرين البنات اللى واقفة دى عشان يقعدوا

بس والاقيلك بقا واحد ماشى فى الشارع فى قلب الطريق وسط زحمة العربيات عمال يتفرج على كل عربية باللى فيها والاقايهولك بيعاكس فى البنات اللى راكبين فى اى مواصلة لدرجة انه غمزلى انا كمان .. لا حول ولا قوة الا بالله يعنى نازل من بيتكوا الساعة تمانية الصبح وقالق منامك عشان تعاكس؟!!! ا

شوية تانية كمان كان المينى باص مشي يجى نص كيلو كدة ومرة واحدة لاقيناه فرمل فرملة جامدة اوىىىىى لدرجة ان الست اللى كانت واقفة جمبى انتطرت قدام من شدتها ورجعت تزعق وتدعى ع السواق : روح ياشيخ الله يهدك

بس يا جماعة فضلت واقفة يجى بتاع ساعة كدة لحد مارجليا وجعتنى وفيييييييين وفييييييييييين لما وصلت للمترو اللى فى شارع السودان .. ساعتين بجد عشان نوصل ياجماعة ، ده الواحد لو مشيها على رجلوا يوصل فى نص ساعة اساسا .. بقالى فى العذاب ده اكتر من سبع سنين كدة .. يلا حسبى الله ونعم الوكيل

المهم قبل ما انزل واتشاهد انى اخيرا وصلت كانت نطت الكلمتين دول فى دماغى خدوا عندكوا

مشربتش من نيلها؟؟؟
طب جربت مواصلاتها؟؟
جربت فى عز الزحمة تمشى فى شوارعها وتبكيلها؟!ا
مامشتش فى ضواحيها؟؟ طيب متخنقتش فيها؟؟
ولا ليك صورة فى المترو زى ماتكون واقف فى علبة صلصة
****
دور جواك تلاقاها ملهاش لزمة وحرقة دم
مواصلات بلدى بتبقى تقبلها ياناس مش سهل
يمكن ناسى لانك مش فيها!ا
او عندك عربية ومقضيها !ا
بس اللى مجرب وركبها قال فى الجحيم مافيش زييها
إن غبت بحمد ربنا وابيع الدنيا ولا اركابها
وان جيت انسى تفكرنى بمليون مواطن مستنى مواصلة
****
دور جواك تلاقاها ملهاش لزمة وحرقة دم
مواصلات بلدى بتبقى تقبلها ياناس مش سهل
يمكن ناسى لانك مش فيها!ا
او عندك عربية ومقضيها !ا
بس اللى مجرب وركبها قال فى الجحيم مافيش زييها
****
مشربتش من نيلها؟؟
طب مغسلتش مواعينها؟؟!!ا
جربت كل ماتشترى حاجة يقولوا لامؤاخذة يابيه بقت غالية؟!ا


واقعدوا بالعافية .. فى مصر

45 comments:

  1. ههههههههههه
    ينهار زحمة وحرقة دم

    معلش يا انسانة بقى الحمد لله انك خلصتي م المشوار الكئيب ده

    بس حلوة الاغنية اللي عملتيها
    لا تنفعي بجد
    :D

    الهم والغلب ياما بيطلعو مواهب
    :S

    ReplyDelete
  2. و الله العظيم بوست زى العسل زى صاحبته

    بصراحة الفيس بوك ده أنا ماليش فيه المدونة أحسن منه بنتنتقش فى موضوع معين لكن هناك بنقول ايه ؟ انا شايفة ان الشات أظرف منه

    موضوع الزحمة عمره ما حينتهى و ليه أسباب كتير منها زيادة النسل و عدم التنظيم الجيد للمرور

    بس حلوة أغنية شيرين اعتقد دى كانت كلماتها الأصلية و هما غيروها

    ReplyDelete
  3. قديما قالوا الحاجه ام الاختراع

    و طبقا لتدوينتك الجميله

    نصحح و نقول

    الزحمه ام اظهار المواهب

    تقبلي مروري

    ReplyDelete
  4. جمييله ياسمين قوى
    وزعلت قوى
    انا جربت الموقف دة كنا فى شارع الهرم الرئيسى وكنا من غير عربيه
    قلنا نعتمد على نفسنا انا ومرات اخويا المهم وقفنا من 8.5 لغايه 11.5 والله ياسمين علشان نركب تاكسى نروح بيه المريوطيه وكله رافض اتصلنا باخويا يجى ياخدنا قال مش ينفع المريوطيه واقفه انتم حاولوا تلاقوا تاكسى فين وفين لما جه تاكسى صاحبه رجل عجوز راف بحالنا
    واخد 15 جنيه تمن التوصيله ومش كان عاجبه كمان تخيلى
    رضينا بالهم والهم مع الاسف مش راضى بينا
    كلاماتك معبره وجميله

    ReplyDelete
  5. ههههههههههه
    جميل يا انسانه بجد
    ضحتيني يتا بنتي والله

    بصي انا الاسبوع اللي قضيته في مصر و انا راجعه من اسكندرية
    طلعععععععععععت روحي بجد
    المواصلات عندكو فعلا جامده جدا
    وحشه قويييييي

    ربنا يعينك بقا


    و حلو البوقين دول يا قمر
    يالله ربنا يعينك مره تانيه

    زيزي

    ReplyDelete
  6. السلام عليكم

    كتبنا نحن مهند المصري موضوع اسمه مشربتش من نيلها عن نفس الموضوع ده
    في شهر سبعه الماضي
    http://a-researcher-from-the-truth.blogspot.com/2007/07/blog-post_946.html

    بس تصدقي

    كلامك يوجع رغم انه بمأخذ الهزار
    بس هنعمل ايه
    بلدنا امانه في ايدينا
    نعليها ما دام عايشين
    متخفيش مش هنعيش كتير

    ReplyDelete
  7. ههههههههههههههههههه

    هذا حال الشوارع في المدن الكبرى
    اسكندريه بقت كده برضه على فكره
    ربنا يعين
    ويقويكي

    ReplyDelete
  8. اولا بالغ التعازى فى الفيس بوك بتاعك وعملوها قبلى فى تلاته ربنا على المفترى بجد
    ثانيا هى دى مصر بجد مستنيه ايه منها
    على فكره مفكرتيش تكتببى اغانى انا ااقولك الطرلايقه الى بيعملوها المولفين انتى تدورى المحطه على اى اذاعات اغانى اجنبيه تحفظى اللحن وتركبى عليه كلمات ماهو عمرو مطفى ومحمد رحيم شغلين كده عادى يعنى

    ReplyDelete
  9. الحمد لله على نعمة البعد عن القاهرة والحمد لله استخدامي خفيف في الفيس بوك يعني لو لغوا الحساب أو حتى لغوا الموقع مش حازعل

    ReplyDelete
  10. السلام عليكم ورحمة الله وبركاته

    هههههههه
    الحمد لله اني مش في القاهره

    بصراحه مش عارفه انتم بتستحملوا المواصلات دي ازاي ولا خنقة العربيات والزحمه

    ياخبر ابيييييييييييييض دا انا لو كنت في القاهره كان زماني مت من زماااااان اوي
    الحمد لله علي نعمة الاقاليم


    :-D

    تحياتي

    ReplyDelete
  11. هههههههههههههههههه

    عااااااااااااادى جدا

    أودى

    ReplyDelete
  12. القاهره الصبح بشعه من مواصلاتها
    بس بالليل اهدى بكتيييير

    ReplyDelete

  13. هههههههههههههههههههههههههههههه

    عادي جدا
    طبيعي جدا
    البلد الي كل مصالحها تتعطل عشان رائيسها رايح ست اكتوبر بالطائره
    توقعي منها اكتر من كده

    بس انتي عارفه اكتر حاجة عجبتني
    الواد الي غمزلك
    هو ده النشاط
    لازم الواحد يكون اسبورتيف
    وينزل يتريض كل يوم ويعاكس في بنات الناس

    ويريت بعد كده تخلي بالك وتنزلي قبل ميعادك بيومين
    ده انتي غريبه والله

    ReplyDelete
  14. يا بنتي
    امشي امشي امشي

    يعني مثلا تعالي الشرقية عندنا مشي
    ريااااااااااضة
    الله اومال المودام بتقول ايه
    كل يوم

    افهموووها بأه


    رغم مواصلااااتك
    بحبك يا مصر

    :D

    ********************

    مس هتكلم علي الاسلوب بتاعك
    اللي اعدت اضحك من امبارح لحد دلوقتي
    بجد انتي سكرة
    ربنا يحميكي يارب
    و يسعدك

    سلاموز بالحليب و الموووووووز
    :)

    ReplyDelete
  15. تعيشى وتاخدى غيرها يا انسانه
    "المجاهدون فى الارض"

    ReplyDelete
  16. بوست رائع ومدونه اروع
    الحقيقة يا اخت انسانة
    انتى فكرتينى من خمس سنين اول يوم أروح فيه الى الكليه فى جامعة الازهر
    من المواصلات والله دا كان السبب الوحيد من تحويلى من الكلية الى كلية أخرى بسبب زحمة المواصلات

    الله يكون فى عونكم وفى عون الطلابة بالذات والموظفين الغلابة

    تحياتى لكى

    ReplyDelete
  17. يا عيني عليكي يا بنتي
    دايما متبهدلة كدة

    امتي ربنا يفك زنقتك بقي

    مش تخافي ربنا كبير

    بس اول مرة اعرف انك فنانة
    وبتالفي اغاني وطنية

    طول عمرك جامدة يا بنتي

    وحشاني يا مضروبة

    ReplyDelete
  18. ايه ده ايه ده

    كمان شاعره

    الأخت شرين عبد الوهاب هترفع عليكي قضيه عشان هتخاف تاخدي الزباين منها

    بس تصدقي عندك حق

    موصلات القاهره دي قطعه من الجحيم

    ReplyDelete
  19. ههههههه يخرب عقلك يا بنت انتى
    مع انها من الاغانى القلة اللى بحبها لشرين..
    ح نعمل ايه بقى.. ادى مصر.. يعنى ح نتبرى منها؟

    ReplyDelete
  20. انسانه ح-بيبتى وح-شتينى اوى اوى اوى عامله ايه يارب تكونى بخير يارب انا بقالى فتره كده مبدخلش وقولت اطمن عليكى وعايزه اقولك ان هى دى مصر هههههههه سلام ياحبيبتى

    ReplyDelete
  21. مراتي هي اللي قالتلي على البوست ده .. أصل إحنا من قدامى فيصل .. وعزلنا بسبب العزف المنفرد اللي سمعيتهولنا ده .. لكن هي لما بتنزل مصر لوحدها بتقعد في فيصل وبتتجنن من اللي بتحكيه ده .. رغم إنها بتركب تاكسيات

    ولأني من معاصري تاريخ الشارع ده فأحب أقولك إن الإمتداد العرضي يمين شارع فيصل واللي وصل لحد الطريق الدائري كان غير متوقع ولا مخطط ولا محسوب ليه أي بنية أساسية وأولها الطرق اللي تستوعب الحركة المرورة الرهيبة دي

    وده من أهم الدلائل على جودة التخطيط عندنا طبعا

    عزلي أحسن لك

    ReplyDelete
  22. موضوع فعلا بيفكرني بذكريااااااات

    مدونه جميله
    وكلماتها رقيقه

    دي مدونتي منتظر زيارتك

    http://mrcalm.blogspot.com/

    وإن شاء الله أكون من المتابعين لهذه المدونه الرائعه

    ReplyDelete
  23. يالهوي
    بالك يا انسانه .. انتي لو رحتي منطقة شق التعبان .. ودي مش وكر عصابات ولا حاجه لا سمح الله
    دي منطقه صناعية عالاتوستراد وانتي رايحه طريق حلوان
    لو رحتي هناك وشفتي الميكروباصات الرمسيس القديمه والميكروباصات الاالترامكو المتفككه ولو شفتي الطيارات .. واللي هي عباره عن عربيات نص نقل من غير اي حاجه .. هو يادوبك شاسيه العربية وفيه موتور وكنبه على قد السواق
    لو شفتي الكلام ده جنبا الى جنب مع العربيات الشبح والدبانه والمش عارف ايه من العربيات بتاعة حيتان المصانع في المنطقه دي
    هتلاقي انك فعلا فعلا فعلا
    ماشربتيش من نيلها

    بوست جميل وتناول هااااايل



    سلاموووووووووز

    ReplyDelete
  24. يا خرااااااااابي
    انتي جستدي معاناتي في المواصلات
    والله الي ماعهوش عربيه والي معاه بيتمرمط
    مترو مش مترو
    برضه بيطمرمط
    والله الواحد مش عارف يعمل ايه
    بس فعلا انتي خلتيني اسخسخ من الضحك
    وبعدين الحاجه شرين
    بتمشي في شوارعها بالشروكي
    فا بتفضفض بمزاج
    انما احنا بنتفض بمزاك
    ومكروباص يقولك الجيزه ب 1.5
    ولاتاني ب 1
    والحكومه بتاخد فلوس الزباله
    الي راكنا في الشارع
    وحاجات زي الفل

    ReplyDelete
  25. ههههههههههههه

    انا شايف انك تستاهلى

    :p


    هش يا واد يا كاميكاز انا لسه مخلصتش كلام

    لما هخلص هديك حسنتك

    المهم نكمل يا ياسمين

    انا كنت بهزر طبعا

    انا هحللك المشكلة دى واشوفلك الشغلانة الجامدة فى البنك الجامد اللى هبنيهولك مخصوص

    واكيد البنك هيديكى عربية جامدة

    منا هوصيهم عليكى بقى

    مش بنكى

    واكيد البنك هيشوفلك شقة جامدة جنب البنك على طول

    وفى الحالة دى هخليهم يسحبو منك العربية

    منا مش اهبل وبوزع فلوسى يمين وشمال يعنى
    بعد كده اكيد انتى عارفة ان البنك مش هيبقى فى القاهرة

    انتى عارفة انا عايز اريحك

    ولو حصل وكان فى القاهرة مش هيبقى فى فيصل يا ستى

    بيتهيالى بقى مفيش راحة اكتر من كده

    انا مش هطلب منك حاجة

    طلباتى مش كتيير يعنى

    يعنى شوفى هيا لستة الطلبات مش متعبة اوى

    اقولك انتى تمضى هناا

    ايووووووووووة

    وهنا كمان

    ايووووووووة

    لا هنا بقى تبصمى

    تمااااااااااااااام

    انتظرى منى اخبار حلوة وزى الفل

    مش عايزك تقلقى خاااااااااااالص

    :p


    حلوة الاغنية اللى فى الاخر دى

    :D

    ReplyDelete
  26. ههههههههههههه
    و طول مانتى فى مصر هاتستنى
    ماهى طوابير
    اذا الشغلو اللا افران العيش و اللا الجامعه
    و اللا أللأوبرا و غيره كتير
    استحملى و أقلمى نفسك على الاستحمال
    يعنى استسلام

    ReplyDelete
  27. ههههه

    المهم وصلتي الجامعة بعد ده كله ولا لأ!؟

    :D

    ReplyDelete

  28. :)

    حبيت بس أسلم

    ربنا يحفظك ويسلمك

    وفاكرك يا ناسيني

    تحياتي من ماناساس البلد

    ReplyDelete
  29. انا جربت ارفها
    اقصد مواصلاتها
    بس قلبة الاغنية بتاعة الحزب الوطني
    لذيذة قوي

    ReplyDelete
  30. عماااااااااااااااااااااااااااار يا مصر
    و أخترنااااااااااااااااااااااااااااااااااه

    ReplyDelete
  31. حمله شرسه علي شركه موبينيل وصاحبها نجيب ساويرس
    إلي كل غيييييييييييييوووووووور علي الإسلام
    إترك موبينيل حلا مش حتي بالتدريج
    لإنه حيعمل محطه علي الفضائيه بسبب إنتشار الحجاب والقنوات الإسلاميه ..وعشان يلغي الرقابه منها...ودي كانت تصريحاته

    ReplyDelete
  32. ههههههههه

    معلشى ياانسانة

    كلنا لها

    بس احلى حاجة الكلمتين الحلوين اللى فى الاخر

    تحياتى

    ReplyDelete
  33. لأ زعلانه
    انا مش عارفه حتى ايه اللى دخلنى هنا
    بس يلا المسامح كريم
    بقى كده يعنى لو مسألتش ... متسأليش انتى
    لأ زعلانه
    بعدين ايه الكلام الجامد ده
    كل ده فى قلبك
    لألألألألألألألألألألألأ
    بس برده زعلانه

    ReplyDelete
  34. أعتقد أني أكتشفت طريقه أتغلب بيها علي هم إنتظار الموصلات ده ألا وهي الأم بي ثري حاله غريبه تلك التي تنتابني وأنا أنظر للناس وهي تسير بينما أنا أسمع لصوت مختلف عن صوت ضجيجهم المزعج أحيانا أشعر أني مخرج فيديو كليب وأنا في هذه الحاله

    ReplyDelete
  35. الحمد لله انا مش منها
    الله يكون فى عونكم قاطنى العاصمة
    سلام

    ReplyDelete
  36. طب و اية ذنب مصر في الموضوع دة؟

    عندك حلين يا تستني زلزال يقلل نسبة السكان في مصر
    يا تعزلي

    الحل التاني حيريحك انت
    الحل الاول حيريح ناس كتيييييييير

    تحياتي

    ReplyDelete
  37. انا مررتلك تاج ياكوكو (:

    ReplyDelete
  38. ايه ده يابنتى سبع سنين مستحمله


    ده انا مواصلاتى لما تكون متنيله اوى بتاخد ساعه وببقى خلاص مش طايقه نفسى


    ربنا يكون فى عونك

    ReplyDelete
  39. لالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالا

    لاااااااااااااازم نتفق يا سيمو يا حبيبتى

    تؤ تؤ تؤ تؤ

    ما ينفعش كل ما افكر فى حاجة الاقى كتبتيها بجد كده حاجة مووووووووووش تشبيعية خااااالص

    هههههههههههههههههه


    على فكرة فعلا كنت ناوية اتكلم فى الموضوع ده بس كنت هاتناولة من وجهة نظر تانية مشابهة بس برضه مختلفة


    هافك لك الطلاسم بعدين عندى امتحانات ادعى لى

    ReplyDelete
  40. أخر حاجة في مصر بنفكر فيها الانسان
    فعلا معاناه بنعيشها بس بيني وبينك الاغنية جامده حقيقي
    انا من بدري بقول ان اغنية شيرين فيها حاجة غلط بس لقيت الصح عندك
    تحياتي

    ReplyDelete
  41. جامدة يا سمسة

    لا جااااااامدة

    والحمد لله على نعمة الزكازيك اللي مش حاسين بيها

    انا ساكنة بعيد الى حد ما عن الجامعة ويوم لما ما ابقاش عايزة اتاخر بنزل قبل الميعاد ب 15 دقيقة وغالبا 10 دقايق واخد تاكسي اقعد فيه لوحدي ادفعله جنيه ونص ثابتين وما يستجراش يطلب زيادة
    طبعا لو في حتة ابعد هياخد اكتر لكن في حدود المعقول

    سبحان الله

    ماتقولي لباباكي يعزلكوا من الشارع دا

    ههههههههه

    ReplyDelete
  42. ياه انتي هتقوليلي علي فيصل و الهرم و قرفهم و زحمتهم انا ساعات ببقي هعيط بجد من الزحمه و احساسي بالقهر و انا واقفه فوق النص ساعه استني حاجه اركبها

    ReplyDelete
  43. هههههههه ربنا يكون ف عونكم بجد
    احنا عندنا في الأقاليم موال تاني خالص
    بس لما الواحد بيروح القاهرة بيطلع عينه
    ---------------
    وأنا مع الحل اللذيذ بتاع ال
    mp3
    بجد أحلى روقان
    ومن موقعي هذا بوجه نداء محمد صبحي اللي في آخر الفيلم بتاع سنوسي وصابرين
    --------------
    كلام جميل يا إنسانة
    Gooooooo on

    ReplyDelete
  44. جربت فعلا مواصلاتها .. بس احنا بقى مكناش بنمشي مسافات طويلة علشان نركب
    كان الميكروباص من دول يجي بس ويبان عليه خير اللهم اجعلو خير .. انو حيحمل ناس
    ارمي نفسي قدام الباب .. والناس بتعمل الباقي
    بس بيكون محفظتي وموبايلي ومادليتي وحاجتي كلها ماسكها في ايدي ورافعها فوووووووووق زي المستسلم
    وبقدرة قدار .. تلاقيني قاعد .. او مش قاعد .. لان احيانا ببقى محموووووول

    ReplyDelete

الكلمـة نـور .. وبعـض الكلمـات قبـور