Tuesday, January 15, 2008

شوية أسئلة


هو انا عايشة؟؟!!ه

طب ليه بالدنيا مانيش حاسة؟

وليه الألوان فى عنيا بقت باهتة؟

وليه كلماتى بقت باردة؟

وليه الحياة نفسها بقت ماسخة؟

وليه حاسة انى تقيلة اوى ع الدنيا؟

وليه حاسة انى تايهة؟

وليه بضبش فى الضلمة ومش شايفة؟

وليه حاسة ان ماليش لازمة؟

وليه كتير ضعيفة وجبانة وخايفة؟

وليه حاسة جوايا بغربة؟

وليه ضحكتى بقت بعيدة؟

وليه كتير ابقى كئيبة؟

وليه حاسة انى وحيدة؟

وليه بسمتى بقت حزينة؟

وليه مش عارفة مالى؟

وليه كل يوم بقا شبه التانى؟

وليه واقفة لسة فى مكانى؟

وليه حاسة انى غرقانة؟

وليه نفسيتى تعبانة؟

وليه دايما زهقانة؟

وليه نظرة عنيا بقت بهتانة؟

وليه حاطة صورة وردة دبلانة؟!!ه

طب ليه دمعتى نازلة دلوقتى؟!ه

وليه بقول الوقت خلاص مش وقتى؟

وليه حاسة ان الدنيا دى مش بتاعتى؟

وليه كل شئ بقا "عادى" و"مش فارقة"؟

وليه بقا دمى تقيل كدة وغلسة؟

وليه كتير ابقى عصبية؟

وليه بقولكوا الكلام ده عليا؟

وليه بقيت كارهة الدنيا ديا؟

وليه محدش حاسس بيا؟

طب ليه حاسة انى مش فاهمة حاجة؟

وليه مبقاش ليا نِفس لحاجة؟

وليه مضايقة من " ولاحاجة " ؟!!ه

39 comments:

  1. وليه متبقيش متفأله ؟؟؟؟
    الدنيا برضه رغم كل ده وكل الليهات دى لسه فيها خير
    طبعا انتى سألتى اسئله بالهبل مين يقدر يجاوب عليها كلها
    لكن
    كلمات جميله جدا وبتمس القلب
    واجاوبك على ليه فيهم
    انتى مش غلسه ولا دمك تقيل ولا حاجه انتى عسوله

    ReplyDelete
  2. عن ابن مسعود قال قال رسول الله صلى الله عليه وسلم ما قال عبد قط إذا أصابه هم أو حزن : اللهم إني عبدك ابن عبدك ابن أمتك ناصيتي بيدك ماض في حكمك عدل في قضاؤك أسألك بكل اسم هو لك سميت به نفسك أو أنزلته في كتابك أو علمته أحدا من خلقك أو استأثرت به في علم الغيب عندك أن تجعل القرآن ربيع قلبي ونور بصري وجلاء حزني وذهاب همي إلا أذهب الله همه وأبدله مكان حزنه فرحا قالوا : يا رسول الله ينبغي لنا أن نتعلم هذه الكلمات ؟ قال : أجل ينبغي لمن سمعهن أن يتعلمهن

    ReplyDelete
  3. بجد انتي انسانة روعة

    ReplyDelete
  4. ممم

    القصيدة بصراحة حلوة جدا و موزونة و السجع بتاعها تحفة دا من اللغوية

    اما باه المعانى و كدا فهيا تنتطبق علينا كلنا

    قلبتى المواجع يا ياسمين :((

    ReplyDelete
  5. معلش تعليقي السابق جاء بالخطأ
    ممكن تمسحيه

    في ظل الصراعات الحياتيه ينتاب الانسان
    يمر الانسان بكل هذه الحالات
    ولكن لابد من التخلص منها سريعا لانه سيقف مكانه والدنيا تسير

    ReplyDelete
  6. احجز أول تعليق بس و ارجع أقرأمن جديد
    عسى اني افهم مالك
    خالص تحياتي

    ReplyDelete
  7. حقيقي مش فاهم
    كل ده يجي مرة واحدة
    طب حاجة حاجة طيب
    أنا والله أعلم إن ده شعور عادي ومبرر باحساس بالخنقة من القعدة في البيت
    انصحك بحاجتين :
    الاولى طبعا اللجوء الى الله خاصة بكرة و بعده و انتي صايمة باذن الله تاسوعاء وعاشوراء
    اكيد القرب من ربنا عامل كويس وهام لاعادة التاوازن النفسي لانسانة كلنا بنعزها و بنحترمها
    ثانيا : يوم 25 يناير انك تروحي معرض الكتاب تلك الدولة التي لا اجد نفسي الا فيها ..
    سعات مش باشتري لكن مجرد جولتي فيه و انا باتفقد الكتب دي و عناوينها و كتابها
    او حتى الجو الجماعي للناس و الاحتكاك بالناس
    انك تسلم على ده
    و تتعرف على ده
    تلاعب طفل صغير
    تداعب بت حلوة ههههههه
    تتعرف على ناس كويسة
    تقعد تطلع في روح بياع في مكتبة و انتا بتفاصل في ام الكتاب اللي مش ناوي تشتريه اصلا
    هههههههههه
    حقيقي دي ممكن تكون فرصة حلوة انك تطلعي من الجو ده
    اتمنالك تلاقي اجابات لكل سؤال سألتيه
    على فكرة
    أنا ممكن أجاوب على سؤال بس اجابته مش بعيدة عني و سهلة و من غير اختيارات او استعانة بصديق او حتى حذف اجابتين
    انتي سألتي وقلتي ليه انتي بتقوليلنا الكلام ده دلوقتي ؟
    انا باقولبك لاننا اخواتك و لو مش تفضفضي معانا حتفضفضي لمين .
    باقي اجابات الاسئلة عندك انتي و بس مش عند اي حد تاني
    خالص تحياتي
    احمد

    ReplyDelete
  8. السلام عليكم ورحمة الله وبركاته

    ايه يا يويو استهدي بالله كده يا ماما واستعيذي من الشيطان

    ليه بتبصي بعين الكآبه لكل حاجه ، حاولي تضحكي للدنيا عشان تضحكلك

    ReplyDelete
  9. على فكرة يا ياسمين
    انا في رأيي المتواضع ان احنا اللي بنصنع دنيتنا
    احنا اللي في ايدينا نشوف الحياة بمبي وزاهية او نشوفها باهتة
    طبعا في عوامل خارجية ومعوقات...بس على فكرة الانسان يا اما يتغلب عليها يا اما يستسلم لها
    تحياتي

    ReplyDelete
  10. ليه بس كده ؟؟؟
    مين قال كده بس ؟؟
    انتى أصلا روحك طيبة و دوجودك جميل ودمك خفيف كمان
    ليه النظرة السوداوية دى ؟؟؟
    الحمد لله على كل شئ
    و فيه غيرنا كتير مش لاقى حاجة من موجوداتنا

    عايزة لما أزورك المرة الجاية ألاقى المدونة مزقططة و بوست بيتنطط !!! :)))

    ReplyDelete
  11. :)
    الكلمات نفسها والمعانى جميلة ورقيقة .. أما الزعل نفسه اللى وراالبوست فمعلهش مسيرها بكرة تبقى أحلى
    just wait

    ReplyDelete
  12. السلام عليكم

    والله يا اختي مش لوحدك

    صدقيني
    اهو شكله فيرس جوي

    ReplyDelete
  13. السلام عليكم
    بيكون في اوقات كتير الانسن بيحس فيها انه مش لاقي نفسه في اي حاجة
    ممكن تكون هناك ضغوط عليه
    او انه حاسس انه مش قادر يحقق هدف معين
    ولكن
    ليه التفائل يروح مننا
    نرجع تاني للتفائل علي الرغم من انه ممكن يتقال انه التفلئل منين
    ولكن نتفائل افضل ما نتشائم ومنقدرش نعمل اي حاجة

    ReplyDelete
  14. لا ملجا ولا منج منك الا اليك

    ReplyDelete
  15. وليه مش بكتبي علي طوال ؟
    وليه مش تعرفي انك بتريح ناس بكتابتم الراقية ديه ؟
    وليه مش تعرفي انه فيه ناس بتحبك ؟
    وليه مش قابلتك من زمان ؟

    ReplyDelete
  16. ليه صحيح يا انسانه ؟!!!




    لالالالا ما هو انا بقولك ايه
    انا مش عايزة كده بجد
    انا عيزاكي علطول فرحانه و سعيده
    عشان تطلعيلنا حاجه حلوه
    زي شيئ منن الحياه
    عجبتني قوي
    و منتظرة حاجه حلوه زيها





    بقولك ايه
    اضحكي بقا يا غلسه
    هجيلك تاني اشوفك بتضحكي ولا لا




    زيزي

    ReplyDelete
  17. على فكره يا انمسانه
    طبعا بغض النظر عن التعليق السابق اللي كتبته


    الوزن والسجع بتاع القصيدة كان حلو جدا
    كان في موسيقى في ودني شداني



    تحياتي
    ايوه كده اضحكي بقا
    زيزي برضه

    ReplyDelete
  18. جميلة قدرتك الشعرية بس استخدميها لبعث الأمل و الحماس

    ReplyDelete
  19. هذا هو حال الدنيا

    ولكن بقليل من العمل .. وكثير من الدعاء يصلح الله الأحوال

    أعانك الله

    ReplyDelete
  20. عزيزتى
    ايه جمال الكلام ده بجد عجبانى قوى
    انتى بتوصفى حالة ناس كتير اللى عايش ومش عايش وفكرتينى بحاجه كتبتها قريب

    بتقول


    قرفان بجد من غير سبب


    هو لازم لما اتخنق أوجد سبب


    ده أنا حتى لو دورت على اى سبب


    مش هلاقى غير للاسف بس مليون سبب

    وانتى اهو جبتى كام سبب من مليون سبب
    احيكى على الكلماتى
    سلام

    ReplyDelete
  21. حأرجع أفكرك بس بالكلام اللي قولتهولك امبارح .. مش "يا رب لي هم كبير" لأ "يا هم لي رب كبير" فاتلم بقى و احترم نفسك:@ (داالهم على فكرة مش انتي ^o)

    فياريت نبطل بقى الأفكار و الكلام اللي يودو في داهية دول و نستغفر و نستعيذ بالله من الشيطان و نستهدى كده و نذكر الله ...

    بصراحة و أنا بأقولك كده دلوقتي حاسيت إني بأقول لنفسي الكلام ده برضو, و كمان في كومنتات قريتها حسيت إن ربنا جعلني أقراها دلوقتي عشان فعلاً كنت محتاجاها أوي :'(

    إيه ده .. أنا داخله أهديكي تقومي إنتي اللي معيطاني :@ ...

    بس بصراحة انا عايزة أعيط فعلاً (و يمكن دا سبب النيك نيم ^o)

    إيه ده .. تاني!!! لأ أنا أمشي أحسن بقى و أبقى أحكيلك بعدين إن شاء الله

    يااا رب ... ربنا موجود .. هو حسبي و نعم الوكيل
    حسبي الله, لا إله إلا هو, عليه توكلت و هو رب العرش العظيم

    ReplyDelete
  22. لا اله الا الله
    محمد رسول الله
    -------------
    ربنا يفك كربك ويفرج همك
    يا اختي يا حبيتي
    كلنا كدة فعلا
    محدش والتاني لا

    :(
    بس لازم نتفائل شوية علشان ربنا يكرمنا و يفرج عننا
    يكفيكي مشاركة الناس دي كلها ليكي
    و ان شاء الله كل شيء هيبقي كويس يا حبيبتي بس متزعليش
    ومين قال انك مالكيش قيمة او لازمة؟؟
    لا طبعا
    انتي اكيد ربنا خلقك لهدف و لمهمة في الحياة
    صدقيني والله
    انا متاكدة ان كل واحد فينا ليه مهمة وهدف ربنا خلقنا علشانهم
    فارجوكي
    جددي نيتك و استغفري و اذكري الله
    و ابدأي اليوم بتفاؤل و بصلاة الفجر
    و هتحسي براحة نفسية
    و اعتبريها بداية
    و انا معاكي ان الايام كلها شبه بعضها
    هي كدة قعدة البيت وانا زيك تمام
    :)
    ربنا يكرمك و يفرج عنك
    بحبك قوي
    :)
    تحياتي

    ReplyDelete
  23. ومال التفاؤل فين

    وحب الله ورسوله فين

    والدعاء والذكر فين

    مع الحاجات دي الدنيا بتكون جميلة جدا على رغم الخوف والقهر

    ربنا معاكي

    ReplyDelete
  24. وفين التفاؤل والدعاة وحب الله ورسوله

    وفين كل حاجه حلوة بنفتكرها في حياتنا

    مش معقول كل حياتنا وحشة

    اكيد في حاجات كتير قوي جميلة ورقيقة

    ربنا يسعدك ويهنيكي

    ReplyDelete
  25. شوية أسئلة هو عمل أدبي جيد وموزون .. لكن يعيبه إن أغلب الناس عارفه وحاسة بإنك تقصدي في الحقيقة كل كلمة فيه .. وبالتالي الكل هيتضايق علشان إنتي متضايقة

    عموما اشعور ده بيحصل كتير وبيمر على أي إنسان لأسباب مختلفة .. وما بيسلمش منه صغير أو كبير

    إن شاء الله هيكون بعد العسر يسر

    ReplyDelete
  26. الكلمات مؤثرة جدا وخارجه من القلب لكن لو كانت هيا دى الحقيه هتكون صعبه

    ReplyDelete
  27. انا متابعك من زمان اوي ومفتكرش انى علقت خالص عندك
    بس جه الوقت اللى لازم اقلك فيه انك بارعة في اختيار الصور
    بتجيبيها منين او ازاي مش عارف
    بس دايما بتبقى مناسبة

    غير كدة
    انا من الناس اللى بيؤمنوا ان التشاؤم بيصل لحد الحرمانية في وجة نظرى

    ReplyDelete
  28. طبيعى ان الانسان بيمر بفترات اكتئاب وفتور وزهق وملل وخنقة وحاجات كتير

    لكن اللى مش طبيعى انه يفضل عايش الفترة دى كتير

    متستلميش للاسئلة دى وغيرها

    وكنت كتبت قبل كده بوست عن الاكتئاب والفتور

    http://tazabit.blogspot.com/2007/06/blog-post_425.html

    ادعوكى ان تقرأيها

    ReplyDelete
  29. شكلك كده كاتبه اللي باحس بيه ساعات
    =================
    أنسانه
    أ،ت
    أحلي أنسانه

    ReplyDelete
  30. تفائلي خير يا إنسانة وتأكدي ان طالما بتعملي اللي عليكي ان شاء الله ربنا مش هيضيع تعبك بلاش
    بس انتي اصبري شوية

    وخلي دي دايما ف بالك

    "وَعَسَى أَن تَكْرَهُواْ شَيْئًا وَهُوَ خَيْرٌ لَّكُمْ وَعَسَى أَن تُحِبُّواْ شَيْئًا وَهُوَ شَرٌّ لَّكُمْ وَاللّهُ يَعْلَمُ وَأَنتُمْ لاَ تَعْلَمُونَ"

    ReplyDelete
  31. يمكن عشان احنا في بلد زبالة؟ أنا دي الحاجة اللي بصبر نفسي بيها حتى لو مش صح 100 فل 100، بس عادي في ناس نتتولد مش في مكانها وبتفضل تدور عليه طول عمرها حتى لو من غير ما يحسوا

    ReplyDelete
  32. مش بقول لك

    انا ابتديت اشك ان احنا فى بينا اتصال روحانى

    حاسه بكل اللى بتقوليه
    وبرضه مش فاهمه ليه

    بقيت بكره الدنيا بس دى عارفه ليه

    ReplyDelete
  33. SMILE, Yassoo....the rainy days will be over..and eventually the sun will rise

    just try to stick to the little smiple things that cause even temporary happiness...they will accumulate and cause massive change..I assure you!

    and this too shall pass my dear!

    ReplyDelete
  34. ربنا يفرج همك يا ستي
    تحياتي

    ReplyDelete
  35. انتى انسانه جميله
    ومش حاسه
    وعمرك ماكنتى غلسه
    بس هى الأيام شبه بعضها
    ومالهاش طعم ده احساس
    متفشى من اللى بيحصل حوالينا
    وعلشان انتى حساسه تعبتى
    بس ان شاء الله الدنيا تبقى بمبى
    لانك تستاهلى تشوفيها كده
    جمال مشاعرك باين من كل بوست
    فى مدونتك
    اسلوبك رائع عشت معاكى نفس الاحساس
    ربنا يسعدك يارب
    تحيات من قلبى

    ReplyDelete
  36. مش حالك لوحدك ..
    كلنا فى الهوى سوا ..

    كل اللي اقدر أقوله لكي ..

    إرمي الدنيا وا ظهرك ..
    إرميها ولا تعبريها ..
    حد واخد منها حاجة ..

    ملناش غير ربنا فيها ..


    وبلاش تبصي لنفسك بنظرة يأس ..
    وتشوفي نفسك بصفات مش فيكي ..

    ده وقت وهيعدي .. واهو كله بيعدي

    ReplyDelete
  37. كلماتك تحاكي القلوب 00
    برذاذ رقيق هادي مشحون بعواطفك 00
    وهمساتك بنفحات عطر عابقه 00
    حينما أحب أن اتامل الأشياء الجميلة
    سابدا من تلك المشاعر وتلك الحروف 00
    , ,
    ,
    لا تحزني
    ولا تدعي الحزن يعرف لكي طريقاً

    فقط افتحي أبوابك للسعادة

    وإن لم تأتي إليك

    فقومي اجري وراها

    انا عن نفسي

    بفضل أجري وأجري وأجري

    لحد ما أخبط في الحيطة
    هههههههه

    لك ودي واحتـــرامي

    شرفيني بالزيارة يا جميلة

    ReplyDelete
  38. مش هقولك انك إحتمال كبير تكونى فى حاله إكتئاب

    أبدا
    كل اللى ممكن أقوله

    أنك أكيد والله اعلم فى مرحله متقدمه من الإكتئاب
    وحقيقى ربنا معاكى بس المهم انك متكونيش من المتواكلين و لكن من المتوكلين على الله ونصيحه من أخ صغنن
    زورى البلوج بتاعى وانت هتبقى أخر هدوء وإسترخاء
    هذا والله ولى التوفيق
    والسلام عليكم

    ReplyDelete

الكلمـة نـور .. وبعـض الكلمـات قبـور