عمرى ماكنت اتخيل انى اكتب خبر زى ده عنى من اول ما فتحت المدونة
ورغم عدم قدرتى على التدخل إلا انى فرحانة ومبسوطة انى باخد الخطوة دى دلوقتى
يمكن عشان خلاص زهقت من الاسلوب والوضع والطريقة والسيستم بتاع الشغل
ويمكن عشان حاجات كتير وحسابات كتير اوى فى دماغى
يمكن عشان كدة بضحك ومش هاممنى رغم ان كل اللى فى الشغل زعلانين ومضايقين من القرار ده
رغم ان صاحبة الشغل نفسها استمر ومامشيش
واتبعت تقريبا كل الإغرائات المادية والنفسية على امل انى اكمل
بس خلاص
وصلت لمرحلة زهق فظيعة
وعملت استخارات كتير وخلاص مش قادرة
برغم تعلقهم بيا وتعلقى بيهم
وفى فترة قصيرة جدا بقينا اكتر من الاخوات
نجوى ورحاب وريهام
ومعاذ الشهير بميزو
وفرج الله اللى كان حزين كأن مايتله مايت وهو بيقولى انه قال للدكتورة انى ماشية
والاستاذ سامح اللى كان خلاص حيعيط
وفاروق الشهير بالباز افندى
ومدام عزة الشهيرة بزووزة
ومدام وجدان ام على
ووائل الشهير بالأستاذ معرفش حاجة
وعبد العظيم اللى نحس بورصة مصر وتوغل النحس لحد ما وصل بورصة امريكا ههههههههههههههه
وعبد الله
وحسين
التلاتة اللى عمرى ما صدقت ولو للحظة انهم فعلا دكاترة هههههههههه
ووائل بتاع البوفيه
حتى الألقاب اللى اشتهرت بيها
اللقب الرسمى قشطة و فريسكا ومؤخراً سوكا
الحمد لله تجربة ربنا قدر انها تحصل من خمس شهور
رغم قصر مدتها الا انى ماشية وانا مستفيدة كتير الحمد لله واتعلمت حاجات كتير اوى
يمكن التدوينة مش حتكفى عشان احكيلكم على اللى اتعلمته وشوفته
كفاية الخبرة بطباع البشر
اهم حاجة واحلى حاجة كمان انى ماشية والحمد لله سايبة ذكرى حلوة
والكل بيدعيلي ومش شايل منى ولا فرحان انى ماشية زى ما حصل مع ناس قبلى
ومش على لسانهم غير: حتوحشينا ياياسمين ، حنفتقدك بجد ، هنهون عليكى؟ ،
الحمد لله رب العالمين .. حب الناس نعمة
يارب ارزقنا حسن الخاتمة
واغفرلى لو كنت قصرت فى شغلى
وعوضنى خير يارب وصبرنى اللهم امين
الحمد لله على كل حال
قدر الله وما شاء فعل
لعله خير
اللهم أجرنى فى مصيبتى واخلف لي خيراً منها يارب اللهم امين
ولا تنسونى من صالح دعائكم يا جماعة بالله عليكم
السلام عليكم ورحمة الله وبركاته
ReplyDeleteمتزعليش نفسك قدر الله وماشاء فعل
وان شاء الله ربنا يعوضك بحاجه احسن منها
اهم حاجة انك عملتي كدة وانتي مرتاحة نفسيا او عندك شعور بأن الي عملتيه هو الصح
ReplyDeleteوزي ما حكيتي انك تاركة اثر كويس عند الناس وذكرى طيبة .. هادا اشي كتير منيح
ان شاء الله ربنا بيعوضك خير .. وبيرزقك من حيث لا تعلمين
تحياتي
أختي انسانه
ReplyDeleteقرار الاستقاله ده قرارك انتي
بس الاكيد كل الاعمال واي شغل فيه زهق وقرف وكل الحاجات اللي بتقولي عليها دي
وانتي لسه في بدايه حياتك العمليه
فلازم تصبري شويه
ربنا هيكرمك بشغل أحسن منه وناس احسن من اللي كانوا معاكي
بس أخلصي في الدعاء
يارب ياستى لو كان دا كان سبب الهم والحزن والحيره اللى كنتى فيها ترتاحى بقى وترجعى زى الاول
ReplyDeleteوان شاء الله ربنا هيعوضك بشغل احسن
الحمدلله.. لعله خير
ReplyDeleteودا بقى اللي مخليكي مختفيه ومابتعبريش حد وكمان قافله الموبايل
ReplyDeleteوبعدين مصيبة ايه دي ان شاء الله اللي في سيبانك الشغل انتي عايزه تجنينيني
طب دا على كده ياريت كل المصايب تبقى هينه كده
خلاص ما دام استخرتي و تيقنتي من قرارك
ReplyDeleteيبقى ربنا يوفقك في شغل تاني ان شاء الله
و احسن حاجة انك سايبة ذكرى حلوة في المكان اللي سيبتيه لإن هي دي اللي بتدوم بين الناس
سؤال على جنب بقى إنتي ما بتجيش ليه مش تبقي تيجيي
:)
هااااايل
ReplyDeleteصدقيني بتكلم جد وجد جدا كمان
عارفة
مش أي حد يقدر يقول
لأ ... كفاية
أنت قدرتي تقوليها سواء صح أو غلط مش مهم .. المهم أنك قدرتي تاخدي قرار وعلى استعداد تام لتحمل عواقبه
وإن شاء الله الفيلم الجاي يكون دورك مش مؤثر في الأحداث وبس .. لأ بطولة بإذن الله والمهم إنها تكون بطولة جماعية مش فردية
دومتي بكل خير
وليد
ان شاء الله ربنا هايعوضك خير عنه
ReplyDeleteو الحمد لله انك زى ماقولتى مشيتى وسايبه ذكرى حلوة للكل
ياسو
ReplyDeleteدى اول مرة اشوف مدونتك
واول ما اشوفها الاقى خبر زى دا
انتى مش عارفة انى هزورك النهاردة ولا ايه لالالا .روقى كدا واضحكى!!
انا فعلا مقدرة احساسك مش علشان انتى انسانة وبس لا علشان احنا اخوات فى العالم دا وبنحس بعض وبنقابل نفس الظروف وبنقف قصاد نفس الوجوه وبنعيش وبنحس بنفس الاحساس مع اختلاف الاسامى
مدونتك عجبتنى
وان شاء الله هتابعها من
اليوم
بكرة احلى ان شاء الله يا عزيزتى
اختك
-انسانة غامضة
ياه يا ياسمين
ReplyDeleteالقرار ده معرفتش اخده خاااااالص في حياتي، بس يمكن الامور مختلفةمعايا شوية انا بحب شغلي انا حاسة انى بغير وبتغير بس عملت استخارات يمكن بعدد شعر راسي....وعلشان كده انا لسه في الشغل
اكيد هوده الاصلح لكى مدام استخرتى وربنا يقدر لك الخير حيث كانِ
اهم حاجة انك مستريحة لقرارك ده و ان شاء الله تلاقى شغل احسن و ناس كويسة كمان
ReplyDelete:))
السلام عليكم
ReplyDeleteربنا يكرمك و يجعل الخير في الخطوة اللي أخدتيها
.
بس ليه أكيد كانت فترة و هتعدي إنت ناسية كنتي مستنية الشغل ده إزاي و بتدوري عليه إزاي
.
مش مشكلة خلاص و لا يهمك و ربنا يكرمك بشغل تاني أحسن لو عاوزة تشتغلي و يوفقك في بيتك لو مش عاوزة تشتغلي تاني
.
بالتوفيق إن شاء الله
إنت أخدتي القرار وأكيد عندك أسبابك
ReplyDeleteاللي مقتنعه بها
إن شاء الله خير
وإن شاء الله ربنا يعوضك خير
تحياتي
أعانك الله والحمد لله أن ألهمك الاستخارة
ReplyDeleteربنا يقدملك اللي فيه الخير
ReplyDeleteويرزقكك بغيره
وطالما استخرتي الله ان شاء الله هيكون ليكي حاجه احسن
يا كاميكزاية انتى جميلة والله
ReplyDeleteمش نهاية دي بداية وبداية هتكون زي الفل انشاءالله في المستقبل
ReplyDeleteمتزعليش احنا منعرفش الخير فين
ربنا معاك
سلوى
ReplyDeleteعلى فكره عمر الاستقاله من الشغل ما كانت مشكله
بس زى ما انتى قولتى كافى الصحبه اللى تشكر فيكى بعد ما تمشى
على الاقل احس ما يقولوا كلمه
وانا بحييكى فعلا وبغبطك بسبب حب زمايلك ليكى
وربنا يخليكى على طول محبوبه بين الناس
وربنا يرزقك شغل احسن منه الف مره
والله المستعان على ما تصفون
بس علشان انتى قريبه فاكيد لازم تكونى مستريحه نفسيا
ReplyDeleteالمهم إنك ما إترفتدتيش .. أنا مش عارف كانوا مستحملينك إزاي .. ياللا ربنا لطف بيهم
ReplyDelete:)
ReplyDeleteالمهم انك مستريحة دلوقتى
مش مهم أى حاجة تانية بعد كدة
إدعيلى أقدر أكون شجاعة زيك فى يوم قريب
:)
القرار مادام نابع عن تفكير عميق, مسترشدا باستشارات العاقلين, مستخيرا لرب العالمين.. فهو قرار صائب بإذن الله
ReplyDeleteتوجهي بالحمدلله, أعانك الله
سبحان الله يمكن ربنا مقدرك خير فى مكان تانى احسن
ReplyDeleteياسمين
ReplyDeleteصباح الخير الأول
مش عارف انا لسه ما عرفتش الخبر دا الا النهاردة ازاي
و ازاي ما اقرأش البوست الا النهاردة
انا اسف يا ياسو
بس بجد ربنا يبدلك خيرا منها يارب
انتي تستاهلي كل خير
ويارب تلاقي فرصة جميلة و كويسة في مجال الاقتصاد بتاعك يا ياسمين
خالص تحياتي
مجرد موجة
بقالي سنه و نص بفكر اخد نفس القرار
ReplyDeleteبس متردده .... اولا لأحساسي بالمسؤليه و اني عليه حمل وواجبات صعب اسيب الناس يتدبسوا فيها بعدي
و كمان لأني اتعودت علي دخل معين داخلي
و لأن السوبر فايزر بتاعتي مفيش منها اتنين مش عارفه
لو عملت كده هقولك
ذكرتيني عندما خرجتُ من مكتبي كالمجنونة وذهبتُ إلى مكتب صديقتي لأسحب أول ورقة وقلم وأكتب استقالتي التي خالفت شروط الاستقالة الرسمية
ReplyDeleteولكني عدتُ للبيت وأنا يخلو من كاهلي ذاك الحمل الثقيل وسوء معاملة مديري
بعض القرارات على ثقلها إلا أنها تريح النفس من عبئ كبير
قولي الحمد لله والوظايف كتير والله الرازق يرزقك ما يجبر قلبك وخاطرك
وأرجو أني وأنا أكتب كلماتي تكوني في وظيفتك الجديدة
ماتعرفيش الخير فين
ReplyDeleteولا بيجي من اي مصيبة
أقصد
ما نراه نحن مصائب
قد يكون خير
مش عارف من كتر ما اشتغلت فى شغلانات و استقلت منها بقيت محتار
ReplyDeleteهو انا اللى مبيعجبنيش العجب
و لا فعلا كل الشغل مقرف و لازم تستحمله على وضعه كده زى ما هو
احترت فعلا