Wednesday, February 24, 2010

صعلكـة صباحيـة


خرجت النهاردة الصبح أروح للصيدلية .. كان في لسعة برد خفيفة والمطرة كانت بتندع .. رحت الصيدلية اللى جمب البيت لاقيت الدوا مش موجود ، لفيت عشان أروح للصيدلية التانية البعيدة لعل وعسى آلاقي الحقنة .. الدكتور قالي عليها فى معاد معين وماينفعش ماتتاخدش .. وانا رايحة للصيدلية البعيدة وماسكة سبحتي وبسبح بلساني وبدعي بقلبي يارب آلاقي الحقنة لمحتها بطرف عيني .. واقفة قدام البنزينة .. شامخة ملونة ودافية .. وناس كتير واقفة حواليها ينشدون بعض الدفئ والحنان وهي مش بخلانة على حد .. عربية الفول الجميلة .. تمازج غريب بين رائحة الفول والعيش الطازة مع رائحة بنزين العربيات .. شئ كدة عامل زي ما تسمع موسيقى شرقي متداخلة مع موسيقى الراي .. فكرة مجنونة طاردتني بعد ما شوفت العربية وهي انى أشتريلي سندوتشين وانا راجعة .. طردت الفكرة دي من دماغي بسرعة وقلت اللهم أغزيك يا شوشو

طول عمري مغرمة بعربية الفول ولمة الناس عليها الصبح وهما رايحين شغلهم .. القدرة السخنة والعيش السخن .. الزيت والشطة والطحينة والسلطة والبصل الذيذ وقرون الفلفل الحامية ... أطباق فول صغيرة خالص .. طرشي لفت وجذر ولمون وزيتون مخلل .. كلهم عناصر بسيطة ممكن تحسسك بالبهجة والسعادة اليوم كله .. اتعاملت مع العربية دي كتير بس أكتر فترة كنت بتاكل منها تقريبا كل يوم كان أيام الشغل .. والحمد لله ان موضوع الشغل نفسه ماطولش عشان ماأصبش بحاجة لاقدر الله 


كانت عربية فول جامدة آه بس فى الدقي .. وطبعا انتوا عارفين عربية الفول بتفرق من حي لآخر فرق شاسع ، يعني ماينفعش نقارن عربية فول فى الدقي بعربية فول فى العمرانية مثلا! .. عربية الفول بتاعة الدقي دي كانت لقطة .. جمب الشغل ، بعدي عليه كل يوم وانا رايحة وكمان مش بلحق أفطر فى البيت عشان لازم أوصل فى معادي وشارع فيصل كان يأبى إلا أن يأخرني يومياً .. كنت بحب السندوتشات من عنده أوي .. زمايلي فى الشغل كانه مسمينه حمادة الحرامي لان النص رغيف كان بجنيه .. بس انا كان عندي مرتب والأشة كانت معدن ومافيش مانع أشبرأها على نفسي شوية بقى

رغم تحذيرات المديرة انه كثرته ممكن تسبب أمراض كتيرة ودائما لستة التحذيرات وقائمة الأمراض وأعراضها ومضاعفاتها الخطيرة ماتظهرش إلا وسندوتش الفول فى إيدي وباكل فيه .. بس كنت بعمل نفسي مش سامعة إلا صوت ألحان الفول العظيم فى الرغيف السخن .. بيعزفلي على أوتار معدتي الجائعة جدا أجمل وأعذب الألحان .. إحساس لا يوصف بالصياعة والصعلكة .. مهما كانت شهادتك أو وظيفتك أو مكانتك الإجتماعية .. عربية الفول دي جزء من الشخصية المصرية الصميمة .. يعني تعتبر زي الأهرامات وأبو الهول والسد العالي والقناطر الخيرية كدة .. وآكاد أجزم إنها الوجبة المفضلة عند البشمهندس " مينا موحد القطرين " اللى شاكة إن جذوري العائلية ترجع له شخصياُ .. فاكرينه؟


رحت الصيدلية والحمد لله لاقيت الحقنة وفي دماغي تتابع سريع متوالي لمشاهد لا تنسى .. مشهد أول مرة عملت تحليل وطلع إني حامل .. مشهد السونار اللى كنت بستمتع بيه جدا طول فترة الحمل ، كائن عجيب بيتحرك جوايا والدكتور كل مرة يثني على حسن أدائه الممتاز فى رحم أمه كجنين أمور .. مشهد وانا رايحة للدكتور وفرحانة إنى آخيرا حولد .. والمشهد وانا ببص على السونار وشوفته فى سكون وهدوء على غير العادة وكأنه عايز يقولي الخبر قبل أي حد .. مشهد وانا بفوق من البنج وعندي أمل ان اللى كنت فيه ده كان مجرد كابوس مزعج بعد أكلة تقيلة .. مشهد وانا بفوق وبسأل الدكتور: هو مات بجد يا دكتور؟ .. أيوة يا ياسمين .. الحمد لله .. قول الحمد لله يا دكتور .. الحمد لله يا ياسمين .. مشهد وانا خارجة من المستشفى وابني مش فى إيدي .. وانا باخد الحقنة حسيت بدمعة بتزق نفسها عايزة تطلع من عيني .. قاومتها بعزم مافيا وبصيت فى السما وانا خارجة من الصيدلية وكلمت ربنا

لمحت العربية تاني وانا مروحة واقفة تناديني وتبصلي فى عيني وتقولى تعالى .. بقالك كتير مابتزورنيش .. الفكرة المجنونة فى دماغي تحولت لرغبة ملحة .. يابنتي انتى لابسة شيك وحيبقى شكلك أهبل وانتى رايحة تشتري! .. مش مشكلة محدش حياخد باله .. وبعدين دول كلهم رجالة وانتى بتتكسفي! .. معلهش حعمل نفسي راجل واروح اشتري برده ماليش دعوة وبعدين كلنا أخوات فى الإنسانية يعني هما يستمتعوا بعربية الفول عشان رجالة وانا لأ؟!!!!!! .. طب مانتى ممكن أى حد من الجيران يشوفك وحيبقى شكلك ساعتها وحش أوي! .. مارضتش أرد على البت اللى بتتكلم من جوايا دي وقمت ضارباها على دماغها ودوختها وخدت بعضي وجري على العربية الجميلة اللذيذة

كانت الدنيا زحمة والراجل مش ملاحق ، فضلت واقفة مستمتعة بريحة البصل والسلطة والفول والعيش الموحوح .. خدت السندوتشين فى كيس بلاستك شفاف ودفعت الفلوس .. فتحت الشنطة الجلد الشيك وخبيتهم بسرعة فيها قبل ماحد ياخد باله من هذه الجريمة الشنعاء فى حق البرستيج العام .. طلعت البيت وانا حاسة إحساس غريب أوي .. كنت حاسة إني مش لوحدي .. وان شقتين الفول دول إتنين اصحابي جايين يزوروني ويقعدوا معايا شوية .. تاخدوا حتة؟

13 comments:

  1. بألف هنا و شفا
    تخيلي ان انا عمري ما اكلت من عربية فول
    نفسي اجرب احساس العربية......دايما باشتري ساندوتشات الفول من المحلات
    بس اعتقد ان مذاقها هيكون الذ بكتير لو من عربية
    اكيد هاجربه ان شاء الله

    ReplyDelete
  2. حمد الله عالسلامة
    وإن شاء الله البيبي يتعوض يا قمـــر

    عارفة أنا بموووت في الفــول بس بصراحة
    عمري ماعملت الانقضاض على عربية فووول ههههههه

    لكن بيجني فول وباحب أكله ياربي عالطعامه أوووه فكرتيني والله
    هههههههههههه

    هو فعلاً الفول دة كأنه تراث وحضارة حاجة كدة
    من سمات المصريين اكلة مصر الاولى

    ReplyDelete
  3. كل مره اروح الشغل احلف ما انا واكل اي حاجة من بره بس المشكلة ان محل الفول والطعمية اول الشارع وكل ما امر عليه واشوف الزحمه ومنظر الطعمية السخنه تنهار عزيمتي واول حاجه اعملها ادور علي اي حد يجبلي سندوتشين بسرعة جعان يا ناس هاموت

    ReplyDelete
  4. :)

    كلمات جميلة يا ياسمين :)

    انا بقى ببقى نفسي أقف أتفرج على مشهد عربية الفول ده فعلا .. بس بتكسف الصراحه لان كل الى حواليها بيكونوا رجالة و انا البنت الوحيدة الى واقفة تتفرج عليهم يعنى .. مش لطيفة فى حقى خاااااااااااااالص :)

    بس شكلى فى مرة حتهور و اعملها فعلا :)

    دمت بكل خير يا رب :)

    ReplyDelete
  5. السلام عليكم
    ده أنت شايلة كتير قوي
    ربنا معاكي و يوفقك يارب
    و يرزقك الذرية الصالحة يارب
    .
    مفيش أي دور لكيمكاز هنا خالص:)
    كل سنة و أنت طيبة

    ReplyDelete
  6. النونو رفض ان مامته تكون بتأكل فول من عربيه في الشارع يجب أن تراعي هذا الأمر من أجل مستقبل أفضل لأولادنا وأعملي فول في البيت هيكون طعمه أمور وضيفي للوجبه بصل و ......وزي ما تحبي وربنا يعوضك ويرزقك الخير باذن الله

    ReplyDelete
  7. اكلت عليها مره وهى المره بموت فى احساسها ولمه الناس حواليها وليا ناس حبايبى غوينها وبيقول عليها جامده عارفه ان الطعم هناك مش اكل وبس دى اللمه الخلطه هتلاقى اشال وانواع من البشر على كل شكل ومهنههيا المقتدر واللى بس هيقدر يدفع تمن الطلب بس بجد تستاهل ان اللى مجربش يجرب

    ReplyDelete
  8. وصف جميل لرغبة ملحة تنتاب معظمنا بضرورة اكل ساندوتشات فول و طعمية من المحل او العربية اللي بنعدي عليها و احنا رايحين الشغل او الكلية او المدرسة
    عمري ما كلت من عربية لإنها مش موجودة عندنا و المحلات متوفرة بكثرة
    العربية عندنا بتلف بقدرة الفول و تبيع الفول المدمس في اكياس مش ساندوتشات
    :)
    ربنا يكرمك يا فندم يارب

    ReplyDelete
  9. هاى:
    ربنا يعوض عليك البيبى و يرزقك بآخر قريبا.. و انا مبسوط لأنك عبرتى كويس عن رغبة أكلى من عربية الفول.. و بس ما قولتيش بتحبى الفول مع الزيت الحار و لا الزيت العادى.. حاولى تجربيها بالزيت الحار.. هايجنن

    ReplyDelete
  10. اهم شئ انك لقيتي حقنة الفول في الصيدلية و اخدتي الدوا اللي كنتي بتدوري عليه في العربية

    بالهنا و الشفا على قلبك يا قمر
    ما تبقي تيجي
    اوروفوار

    ReplyDelete
  11. :-)

    آه طبعا ناخد حتة وحتتين كمان

    أصل أنا عمري ما اشتريت من عربية الفول دي ومادام انتي تجرأتي واشتريتي خلاص يبقى وفرتي عليا تبويظ البريستيج

    ههههههه

    ReplyDelete
  12. اللي ما وقفش ياكل من عربية فول و طماطم مقطعه بكمون و مخلل جزر ولفت و لمون و بصل صغير و قرنين فلفل يبقا ما يعرفش يعني ايه حريه انا بحس بالحريه و انا واقف اكل من عربية الفول
    لياسمين تذكري ان الشدائد تصنع الرجال قصدي النساء يا فندم

    ReplyDelete

الكلمـة نـور .. وبعـض الكلمـات قبـور