Thursday, April 29, 2010

عزيزي القارئ .. على قلبك 30 يوم


هي فكرة عرفتها بالصدفة البحتة

إختلست دقيقة أبص على النت بسرعة فلاقيت الموضوع ده قصادي

تدوين لمدة 30 يوم

كل يوم تدوينة جديدة

حسيت بالمغامرة وحاجة جوايا بتزقني عشان أشترك

مش حتنفخ بقى وآخد راحتي فى الكرسي وأقول أيوة منا جامدة بقى

وبعرف أكتب وتلاتين يوم دول ولا حاجة بالنسبالي

بالعكس ، انا خايفة جدا من التجربة دي

وحاسة إنها تحدي لنفسي ولقلمي ولأيامي

من ناحية القراء ورد فعلهم على قراءة بوست جديد يومياً

وهل ده شئ مقبول بالنسبالهم ولا لأ

وتحدي لحياتي اللى بتثير جوايا كلام كتير أوي نفسي أقوله

وغالباً مش بلاقي حد يسمعه غيري


*****

الفكرة إن شاء الله حتبدأ من أول مايو

تلاتين يوم إن كان ليا عمر وكنت من أهل الدنيا حكون معاكم يومياً

ولو يوم ما قدرتش أكتب لأسباب خارجة عن إرادتي

إن شاء الله أعوضه فى اليوم اللى بعده على طول

أنا مش ضامنة النتيجة النهائية والشكل النهائي للشهر ده حيكون إيه

بس على العموم براحتكوا خالص

إقروا وشوفوا بنفسكم اللى حيطلع

واللي يزهق ويتخنق يقول برضه مش مشكلة

احنا فى مدونة ديموقراطية وفي حرية رأي وتعبير

إرفضوا إني أكمل الشهر كله وإعترضوا فى كل المحافل الإنترنتية

وهاتوا كاميرات برامج التوك شو تيجي تصور الكارثة البشرية

أو حتى إعملوا اعتصامات ومظاهرات ووقفات إحتجاجية على رصيف مجلس الشعب

حتقبل كل ده بكل تفهم وهدوء عادي خالص

وبرضه قاعدة على قلبكم


:D

13 comments:

  1. هههههههه على قلبنا ليه بس ده انتي تنوري
    فكرة كويسة بس انا ما اعرفش انفذها لاني مزاجية جدا في موضوع الكتابة و لو مش حكتب حاجة احس انها هي دي مش حقدر اكتب
    يمكن لان مدونتي بتعتمد على فكرة واحدة و هي مشاكل الازواج!!
    احتمال
    بس ماقولتلناش الجايزة اية؟
    حتاخدي كام و حتدينا كام على صبرنا ههههههه
    ربنا يوفقك يا جميلة

    ReplyDelete
  2. انطلقي يا ياسمين مسنيينيك هنا و ع الفيس بووك كمان
    بس اتوصي بيومين في الشهر ده 1 مايو مش عشان عيد العمال لأ عشان يوم عيد ميلادي
    و يوم 4 مايو انتي عارفه بقا عيد ميلاد مين ههههه

    ReplyDelete
  3. انتى ياقمر عندى ع الفيس بوك وانا معرفش انه انتى صاحبة مدونة انسانه
    ياخبر ابيض
    طيب والله مبسوطه
    ومستنيه بقا الاقى منك بوست كل يوم
    :)))

    ReplyDelete
  4. ده يوم الهنا ، لا يوم ايه ده شهر الهنا والفرح والسرور

    واحنا في ديك الساعه يا جميله اما نقرالك كل يوم

    انتي اسلوبك حلو ويشد

    وانا سخصياً بحب اقرالك وحتى لو كل يوم ، انا متاكده ان كل يوم هيبقى في حاجه حلوة وجديده ومشوقه

    ربنا معاكي يا قمرايه

    بالتوفيق ان شاء الله

    وانا بيتهيئلي انك هتنجحي جداً في الحكايه دي ، والكل هيستمتع ان شاء الله ومش هيزهق ابداً منك


    تـحـيـاتي جداً

    ReplyDelete
  5. هههههههههههههههههههههههههههههه
    يا حبيبتي احنا مستنينك ومش هانقول لا
    يالي احنا معاكي في المغامره دي

    ReplyDelete
  6. قدها وقدود يا جميل

    منتظره اشوف النتيجه وهتابع اكييييد

    تحياتي

    ReplyDelete
  7. أنا شبه متأكد إنك تقدري تكتبي كل يوم موضوع حلو
    بس المشكلة إن أنا مش حأقدر أتابعهم بإنتظام علشان مشغول زيادة اليومين دول
    فكل كام يوم حأبقى اقرأ مجموعة مواضيع مع بعض
    :)

    ReplyDelete
  8. انا معاكم باذن الله كمتابعه مش هينفع كل يوم اكتب بوست لانشغالى
    بس الحمله دى فرصه علشان ارجع اتواصل مع ناس بحبهم وبدأت ابعد عنهم للاسف

    ReplyDelete
  9. تلاتين بوست؟

    كل يوم بوست؟

    طيب مش حرام عليكي القراء؟ ذنبهم ايه في ابموضوع ده؟

    :-))

    لما نشوف هيبقوا 30 وألا لأ

    المهم الكيف مش الكم

    :-)

    ربنا معاكي

    ReplyDelete
  10. طيب عندي حل أحسن

    إيه رأيك تسترجعي أيام وذكريات كاميكاز وتكتبي عنها؟

    في الحالة دي ممكن يكونوا 60 بوست في الشهر كمان

    ReplyDelete
  11. فكرة جيدة جداً ... موفقة اختي العزيزة
    ولكن اتمنى عليك ان لاتكثري في السطور فأغلبنا لايحب قراءة المواضيع الطويلة والسطور الكثيفة .. تحياتي لك

    ReplyDelete
  12. احلي مميزات التدوين اللى حببتني فيه وقربتني وقربت كل الناس منه انه شئ تلقائى وغير مرتب له عشان كده نجح ووصل للناس مش انا بكتب عشان انا لازم اكتب وكأنها مهنة او واجب على ، كده يمكن تبقى شبه المذكرات او اليوميات اللي هنرصد بيها الاحداث والانفعالات اليومية، مش عايزاكى تزعلى منى بس لو اتحولت من هواية و حاله وجدانية بكتب تحت تأثيرها الى مهمة هتفقد عفويتها

    ReplyDelete

الكلمـة نـور .. وبعـض الكلمـات قبـور