Saturday, May 01, 2010

أنا حغير الواقع


جملة واحدة على أي محرك بحث عن إحصائيات القراءة فى العالم العربي

كفيلة انها تعرفك الواقع العربي بوضوح

إحدى الإحصائيات اللى قرأتها كانت بتقول

إن الأوروبي يقرأ 35 كتاب فى السنة

والإسرائيلي 40 كتاب فى السنة

فى حين إن 80 مواطن عربي يقرأون كتاباً واحداً فى السنة

بمعنى إن ثقافة أوروبي واحد توازي ثقافة 2800 عربي

وثقافة إسرائيلي واحد توازي ثقافة 3200 عربي

طبعاً واضح حجم قتامة وسواد الواقع

بس عشان الواقع ده يتغير مش حينفع ننزل بمكرفونات فى الشوارع

ونحاول نشجع الناس على القراءة

واللي يرفض يقرأ نعمله محضر فى القسم

لأ

عشان الواقع ده يتغير لازم تبدأ بنفسك

ولو كلنا بدأنا بنفسنا بجد الواقع ده حيتغير

*****

من أول سنة 2010 خدت القرار ده

كل أول شهر أكتب قائمة بالكتب اللى لازم أخلصها خلال الشهر

وفى آخر كل شهر لازم أقعد مع القائمة تاني

وأشوف قدرت أخلص كام كتاب فى الشهر

الفكرة غرضها إحصائي أكثر منه إلزامي

بحيث أعرف قرأت كام كتاب فى الشهر

وبالتالي حيسهل عليا أعرف قريت كام كتاب فى السنة

الحمد لله عملت كدة وإلتزمت بيه بفضل الله

وشهر بعد شهر وجدت المحصلة النهائية بتزيد

إحساس رائع بشكل لا يوصف

إحساس بالإنجاز

وإن الشهر اللي راح وعمره ماحيرجع تاني

مشي من عندك وهو مبسوط منك

عشان عرفت تستغله صح

بقت لما اقرأ احصائيات القراءة ماأزعلش قوي

لأن فيه صوت جوايا سامعاه بيقول

أنا حغير الواقع

ومنتظرة آخر السنة إن شاء الله

عشان أشوف خلصت كام كتاب

زي الأوروبي ولا الإسرائيلي ولا أحسن منهم هما الاتنين؟

*****

النهاردة أول الشهر

قعدت مع نفسي وراجعت قائمة قراءة إبريل

وكتبت قائمة قراءة جديدة لشهر مايو

المهم دلوقتي بقى

ناويين تيجوا معايا وانا بأغير الواقع؟

ولا أروح انا لوحدي؟؟؟

18 comments:

  1. أنا معلك .. فكرة رائعة وربنا يقدرني علي تنفيذها ان شاء الله هغير الواقع ...........
    وقدري هيكون رائع

    ReplyDelete
  2. كتــاب لكـل 80 عــربي

    رقم فاجـع بكل تــأكيـد

    يوازي في فجاعته أعداد العناوين المنشورة والمترجمة كل عام مقارنةً بالكيان اللقيط وبأوروبا وأمريكا

    أظن أن الرقم ربما كان أكثر فجاعة لو لم نكن أنا وأنتِ وقلة غيرنا نقرأ بانتظام

    ReplyDelete
  3. فعلا نحتاج لإعادة توزيع اهتماماتنا, وتوجيه اهتمام أكبر للقراءة.

    وهذا هدفي هذه الأيام, أن أقرأ كل ما يتيسر لي قراءته.

    ReplyDelete
  4. معاااااااااكى طبعا سبحان الله كنت وصلت للعدد دا لحد سنة فاتت وبعدها حصل تراجع رهيب في القراية بقى كتاب كل كام شهر بس بقالي مدة بحاول ارجع تاني


    بعد الاحصائية دي بجد فاجعة كبيرة

    معاكى وبفكر ننشر البوست دا :)

    ReplyDelete
  5. وراكي ومعاكي يدا بيد حتى نهاية المشوار :D

    انا بعمل نفس الفكرة وان كنت اقل تشددا بسبب عدك استخدامي لجدول او منظم مواعيد

    وهكذا اظن ان القراءة يجب ان تكون .. بصراحة
    ان نقرأ لأننا نحب القراءة وليس لأنها واجبة او محددة او مفروضة علينا ..

    وان كنت احييك على التحدي الشخصي الي انتي محدداه لنفسك :)

    تحياتي

    ReplyDelete
  6. انا كمان هاغير الواقع وهبدا معاكي من اليوم ان شاء الله
    والمشرووووع دا جميللل بجد

    ReplyDelete
  7. انا بحب الشغل الجامد دة

    انا فعلا حاولت وبدات بالكتب الى بحبها بس بردة لسة محققتش تقدم

    تحياتى لمبادرتك الجميلة وانا كمان معاكى

    ReplyDelete
  8. طبعا معاكى ولازم نبذل اقصى جهد وعلي فكره ده دعوة يوجها كل المثقفين والمفكرين والدعاة ولاحياة لمن تنادي وده مش تشاؤوم بس لازم نبحث عن طرق ايجابية نشجع بيها على القراءة، عمرو خالد مثلا عامل حملة ال10 الاف كتاب شئ جميل بس حتى اللى بيستجيب ويضيف وياخد من عنده هما برضوا اللى اصلا بيقروا كمان فى حاجة مهمة الاطفال الجيل اللى طالع مهم يتعلم يقرا حياتهم تلفزيون وكمبيوتر وبس لازم نركز عليهم ونشوف نعمل ايه معاهم وازاي نعلمه يحب الكتاب

    ReplyDelete
  9. ينهاااار ابيض.... بس...
    ربنا يسعدك في تغيير الواقع...

    ReplyDelete
  10. نغير معاك يا جميل :)

    انا ممكن اقرا اكتر من كتاب بالشهر ...بس اغلبهم بيكونوا من ع النت

    بس الكتب تعدي المتين ورقه وساعات تعدي التلتميه :)

    يا مسهل...معاكي ان شاء الله

    تحياتي

    ReplyDelete
  11. فكره حلوه بس الوقت حتقولوا حجج انا عارف بس الشغل اخد كل الوقت

    ReplyDelete
  12. أرقام الإحصائية دي غريبة شوية .. وخصوصا إني على احتكاك دائم بالأوروبيين والأمريكان

    السنة فيها 52 إسبوع .. وبالنسبة للناس اللي بتشتغل (وهما الغالبية) دايما بيكون فيه أنشطة أخرى كتيرة وراهم غير القراءة .. فصعب انهم يخلصوا طتاب كل اسبوع

    الرقم المنطقي للإنسان اللي هوايته القراءة 25 كتاب في السنة

    بس عموما ياريت العرب يقروا ولو حتى كتاب في الشهر أو كل شهرين حتى .. كان حالنا بقى غير ده خالص

    ReplyDelete
  13. هههههههههههه

    حاسك فى الاول هتكونى متحمسة وبعدين الفتور يبتدى زى اغلبنا فى اى حاجه بنعملها

    ربنا معاكى

    ReplyDelete
  14. معاكى طبعاً :]

    بس افضل انك تحددى بالنسنة وبعدين الشهور عشان تلتزمى بكتب معينة ومتقعديش تدخلى اى كتاب تلاقيه قدامك
    كمان عايزة الفت نظرك لنقطة الكيف اهم من الكم :)

    بعدين ايه اعلان الفرخة الى طلع او مافتحت المدونة
    :(

    ReplyDelete
  15. أنا بأقرأ كتير
    بس مش بأعمل لستة بيهم
    لكن آخر سنتين بقيت ممكن أعد كتير منهم لإنهم
    pdf عندي على الجهاز

    ReplyDelete
  16. الفكرة جميلة اوي يا ياسمين فعلا
    بس مش عارفه ليه
    كل ممسك كتاب بجد ببأه مش مركزة
    يمكن مش عارفه اساسا ابدأ بأسلوب أدبي
    نوعيته ايه
    بحيث أقدر استوعبه
    لأني بأمانة فيه كتب دسمة جدا
    بفكر بجد احاول أعمل زي مبتقولي
    بس أبدأ مثلا أدور على الشعر العامي
    لأني بحبه
    أول الكتب اللي بتناقش قضايا اجتماعية
    بحبها برضوو
    إن شاء الله هبدأ انفذ
    بس بعد الامتحانات
    :D

    ReplyDelete
  17. :) الفكرة جميلة ، شخصيا أعكسها قليلا بحيث أحدد 4 كتب بالشهر دون تحديد أي عنوان وأترك لنفسي حرية الاختيار وحرية القراءة لكن المهم هو أن أكتب في نهاية كل كتاب عن هذا الكتاب حتى لا يتوه في الذاكرة :)
    مدونة جميلة

    ReplyDelete
  18. أنا معاك يا معلم ^_^

    أنسانه ,, فِكره رآئعه هأطبقها إن شاء الله ,,

    مدونتكِ رآئعه بِصدق

    جعلتني أضحك من الأعماق ,, خفة دم بعفويه تامه

    أمتعني القراءه لكِ

    هديل

    ReplyDelete

الكلمـة نـور .. وبعـض الكلمـات قبـور