Thursday, March 17, 2011

صوتي يا إنشراح


مش عاوزة أدفعك فى إتجاه صوت معين سواء بالرفض أو القبول للتعديلات الدستورية .. لأني ببساطة لسة ماحددتش هصوت بإيه ، بس الأكيد إني هصوت إن شاء الله وده المهم 

انا عارفة انك هتصوت لإنك بتدخل الإنترنت وبتقرا الأخبار وعارف ضرورة المشاركة فى الإستفتاء ده ، المشكلة إن مش كل الشعب المصري مهتم بالتعديلات الدستورية او بالتصويت من أساسه وهنا بيجي دورك الذى لا يقل أهمية عن التصويت نفسه ، وهو التسويق للتصويت .. بمعنى إنك ماتنزلش تصوت لوحدك أبداً .. خد حد معاك ، صاحبك اللى مالوش فى السياسة ، زوجتك اللى مش فارق معاها ، جارك اللى مكبر دماغه .. خد أي حد وفهمه أهمية التصويت والمشاركة وفهمه آه يعني إيه ولا يعني ايه ، إشرحله إن الدنيا إتغيرت بعد الثورة ودلوقتي صوتنا بقى له معنى وهيأثر فى مستقبل بلدنا ، وذكره بالحكمة اللى بتقول: ليس هناك من هو أكثر بؤساً من المرء الذي أصبح اللا قرار هو عادته الوحيدة

الأهم بقى إنك ماتحاولش تأثر عليه بصوت معين ، لإن الديموقراطية تساوي الحرية وهو حر فى قراره ومش المفروض أبداً إنك تأثر عليه ، ولا تسمح لحد إنه يجبرك بالتصويت زي ماهو عاوز أو حتى يأثر عليك برأيه ، مهم جدا كمان إنك تاخد ولادك معاك وتحاول تشرحلهم إحنا بنصوت ليه وبنستفتي على ايه ويعني ايه ديموقراطية وايه اللى بيحصل بالظبط ، صدقني مهم يشوفوا أبوهم وأمهم إيجابيين وهاممهم مستقبل بلدهم وبيشاركوا في تحديده بصوتهم ، تجربة زي دي هتأثر معاهم وهتفرق فى تفكيرهم ونظرتهم للبلد وللحياة  

لو مقطوع من شجرة زي حالاتي وساكن بعيد عن أهلك إتصل بيهم وحثهم على التصويت والمشاركة ، لو فى بلد تانية خالص ومش من حقك تصوت كلم أهلك وصحابك وجيرانك وقرايبك اللى فى مصر وفهمهم ايه الحوار وخليهم يصوتوا 

بس الله يسترك حدد موقفك قبل يوم الإستفتاء بدل ما تروح لجنة التصويت بالمصلية عشان تستخير تقول آه ولا لأ ، إحتارت أوي وضربت أخماس فى أسداس إعمل قرعة ، أو إعمل عبيط  وروح صوت برضه ، ماتنساش إن ده أول إستفتاء فى حياتنا مانبقاش عارفين مسبقاً النتيجة هتكون آه ولا لأ ، محدثين ديموقراطية بقى 

مهم كمان أقولك إنك إذا كنت من فريق لا والنبي يا عبده ، أو من فريق نعم يا حبيبي نعم وجت نتيجة الإستفتاء على غير رغبتك فمن الضروري جداً جداً جداً إن مايكونش فى نفسك أي غضاضة من رأي الأغلبية لأن هي دي الديموقراطية ، يعني الأهم من نتيجة الإستفتاء سواء بلا أو بنعم هي نسبة المشاركة فى الإستفتاء و اللى هتنجح التجربة الديموقراطية فى مصر ، بس خلاص  

3 comments:

  1. ولله رأي الاغلبيه هو اللي قائم في النهايه
    وفيه ناس كتير جدا ليس لهم اي اتجاه او ميول سياسي لأي احد وهؤلاء سيكونوا قوه كبيره جدا في التصويت

    ReplyDelete
  2. هذا الاستفتاء هو أول خطوة على أعتاب الديمقراطية ياترى هاننجح فى الاختبار؟؟؟؟؟؟؟؟

    ReplyDelete
  3. حاجة محيرة فعلاً
    بس شئ جميل إن أخيراً صوتنا حيكون ليه لازمة

    ReplyDelete

الكلمـة نـور .. وبعـض الكلمـات قبـور