Thursday, January 11, 2007

تخاريـف كاميكـازيـة



بعد ما دماغى وقفت وحسيت إنى مش فاهمة حاجة خالص

وبدأت الفيوزات اللى فى نافوخى تضرب

لاقيت النور مرة واحدة اتقفل فى دماغى

والدخان طالع من ودانى

وحالتى بقت صعبة خالص

لدرجة إنى صوعبت على كاميكاز

اللى قعد يهدى فيا ويقولى معلش يابنتى

ما الدنيا إلا كاميكاااااز كبير

هنعمل ايه بس؟

خلاص يا كوكو مش قادرة خلاااااااااص

البعيرُ هلك

البعيرُ هلك

البعيرُ هلك

.

حد يسألنى مين البعيرُ هلك دول

اجاوبه بكل فخر واقوله مرة تانية هبقى احكيلك قصة الملك هاموشير وعبدوس الوزير عشان مش وقته

.


ووسطت هذا الجو الملبد بغيوم الحزن والكآبة

من هذه المادة الهبابة

فوجئت بحبل الافكار نازلى من سحابة

وأصحبت أكثر خيابة

كاميكاز: ياعينى عليكى فى الفصيح

مريسى يارافع معنوياتى

.
المهم لاقينا مرة واحدة الكتاب وقف وطلع لنا لسانه

وقعد يغنى ويقول

ورااااك انا والزمن طويل .. انا مش هسيييييبك مستحيييييييييييييل

قول عليا مهبووول قول عليا مهطووول

خدها كلمة منى ومن الآخر هتذاكرنى فى يوووووووم

.

طبعا أوغمن عليا على طول انا وكوكى فى نفس ذات اللحظة
.

***فاصل من الأغانى الكاميكازية المبهجة***

مع كامكوزة عجرم

.

إحساس جديد



فى قلبى بيزيد



بحسه كل ما بدخل اللجنة



إنى على طول



عقلى مشغول



كتير بتلخبط



ومش فاكرة ولا كلمة

***

انا ما بدى اكتب كلام



يصدع قلمى ويجيبله زكام



بيكفينى



يقولوا نجحتى



هايدى الكلمة بتقتلنىىىىىىىىى



***

.

صاحب هذه الاغنية الرائعة رقص وطبل وتنطيط من كاميكاز افندى حبيب الجماهير



واحد من الشعب يسألنى مين كاميكاز ده؟



هزعل منه جدا أولا عشان السؤال ده كتر أوى اليومين دول

وثانيا عشان مش مثقف ومش عارف مين هو كاميكاز حبيب الجماهير

وثالثا وده الاهم مش هرد لانى انا شخصيا معرفش مين كاميكاز ده


.

*** فاصل آخر ***

ولا ليلة ولا أجمل من دى ليلة

بين إيديا كتابى بقاله سنين طويييييييييييييييلة.......................... أكمل الفراغ وعلل أسبابه واذكر إسم مؤلف الكتاب وموقفه من التجنيد.


.

طبعا اول ما كاميكاز سمع إن فيها اسئلة غنى اغنيته المفضلة

كدة كفاية كدة تجريييح .. كدة كفاية ... كدة كفاية

ياعينى عليك فى الحزين يا كوكي

ثااا.. ثااا..ثاااانك يوووووووووو

يرحمكم الله

.

.
**الفقرة الرياضية من نادى كاميكاز الرياضى**

أعزائى المشاهدين معاكم المذيع كاميكازى أفندى أبو نسمة ، وطبعا بعد فرحتنا اليوم بفوز الأهلى الساحق الماحق 5-1

والذى رد بجدارة على كل الاقاويل المغرضة التى طعنت فى قدرات مثل هذا النادى العريييق

والذى وضع خمس أهداف عشان كل اللعيبة تفرح والكل يجيب اجوان وخلى الشعب يعيش

على فكرة كاميكاز وهو معدى جمب الإستاد اتحايلوا عليه ينزل يجيب جون وهو قالهم انا عندى شغل .. اعطل نفسى يعنى.. ايه الناس دى

وكما تسمعون الان اعزائى المشاهدين هتاف الجماهير الكاميكازيين فرحاً بفوز ناديهم المفضل

او ممكن يكون من كبت الامتحانات

لا ادرى بالظبط

ولكن هناك شخص قصير وشكله غريب مهيج كل الجماهير بالهتفات الرنانة

والزنانة ايضا

هذا الشخص يدعى كاميكاز

وإنه حقاً لكاميكاز

وياله من كاميكاز

مرعب

شنيع

مريع

فظيع

رقيع

رائيع

بديع

.

هنيئاً لكم ايها الكاميكازيون الموعودون بالنجاح دائماً

.

update

**مئوية الأهلـى الكاميكازية**

يا أهلى

ياحبيبى ياأهلى

يانور عينى ياأهلى

يا فضحيتنا قدام العالم كله يا أهلى

حد كاميكازى بقا يفهمنى ايه اللى حصل يوم التلات ده بقا؟؟؟؟

اربع اجوان؟؟؟

يعنى مش 1 ولا 2 ولا 3 حتى

يانهار ابيض

اول جون افتكرت إن الكاميرا جابت مشهد من ماتش تانى

والا الجون التانى بتاع الواد اللى ابو 19 سنة

والرابع اللى فى الوقت اللى بدل الضائع

يانهااااااااااااااارى

وضجة إعلامية

وإعلانات

ومئويات

وحركات

والتعلب فات فات فى ديله سبع لفات

فين اللعيبة

ابص عند الجون بتاعنا اقول يمكن بيحاولوا يحافظوا على شباكنا الزهبية

الاقى الحضرى ياعينى واقف لوحده وضغطه عالى من الشخط فى اللعيبة

ابص عند الجون بتاع برشلونة اقول يمكن بيحاولوا يجبوا جون الاقيه فاضى ومهوى

ادور عليهم فى نص الملعب بيمكن بيسخنوا ولا حاجة مالقيش حد بردو

فين لعبية الأهلى ياجدعان

فين ابو تريكة اللاعيب

ولا متعب!!!!ه

ولا فلافيو!!!!ه

يلا هنقول ايه بس

اللى حصل حصل بقا وخلاص

واللى لعب لعب من زمان

واتفضحنا واللى كان كان

كنت منورنا ياعم رونالدينهو

ومتشكرين على الكام توقيع اللى على الكاميرات دول

وعلى الاربع صواريخ اللى دخلوا فى شبكتنا

عااااااااااااااااااااااااااااااااا
يا شماتة أبلة ظاظا فياااااااااا

.

**إنتهت الفقرة**

.

.

وبعد إشفاقى على كل من وصل لنهاية البوست اللى مالوش موقع من الإعراب ده ومش فاهمة فيه ولا كلمة

اقولكم كلكم بالله عليكم إدعولنا

ومانجلكوش فى حاجة وحشة

مين يفعل خير بيداه يلتقاه

وهنيالك يا فاعل الخير والثواب
إهئ إهئ إهئ

انا عاوز كوكاكولاااااااا

بطل شحاتة بقا.



اسيبكوا بقا عشان كاميكاز دماغه ضربت زيي بالظبط وعامل دوشة ودخل جوا الكمبيوتر واتكعبل على العتبة بتاعة التوول بار وعمال يلعب فى الإن بوكس بتاعى

.

يلا تصبحوا على خيييير

كاميكاز: مع السلاااااااامة

خش نام بقا صدعتنى

66 comments:

  1. ههههههههههههههه
    كاميكاز كان قاعد جنبي وانا بقرا البوست ده
    انتي بتجيبي المواهب دي منين يا حاجة ؟؟
    ادي التهييس ولا بلاش

    مبروك مقدما انضمامك لجماعة شباب من اجل التهييس

    http://shabab4tahyes.blogspot.com/

    ReplyDelete
  2. الكاميكازيووون يتكلموووون:

    على العموم يا جماعة ده إذا كان بيدل على شئ فهو يدل على مرحلة التهييييس الجامدة اللى بيوصلها الممتحنووون و الممتحنااات و دى حاجة غير صحية بالمرة زى ما انتم شايفيين


    و عشان كدا أنا من منبر سيمو هذا أناشد جميع المسؤليين بإلغاء خطوة الامتحانات دى و تأهيل الطلاب مباشرة للسنة اللى بعدها فى سلام نفسى و عقلى...و السلام ختااام

    ReplyDelete
  3. لا حول ولا قوة إلا بالله ...
    والله والواحد فاكر أيام الامتحانات دي بس الحمد لله ما وصلتش للمرحلة الجامدة دي ... كان الله في العون
    شدة وتزووول

    ReplyDelete
  4. هههههههههههه
    الظاهر أنى جيت فى وقت مش مناسب!! اسيبك أنتى وكاميكاز بقى
    :)

    ايه ده يا بنتى؟ بقى أنا اول مرة اجى عندك البلوج الاقيكى مهيسة كده؟

    أنتى هتقوليلى عالامتحانات وسنينها السودا والهبل اللى بتعمله فى الدماغ؟.. أنا لحد دلوقتى لسه شاكة فى قدراتى العقلية
    ههههههه

    خلى كاميكاز يقوم يعملى كوباية عصير بقى بدل ما هو قاعد كده
    :)

    manal

    ReplyDelete
  5. ههههههههههههههههه

    انتى تشربى ليمون سخن وتدشى بصلتين وتاكليهم ومعلقتين عسل على الريق وانتى تبقى كويسة ان شاء الله
    :D

    ربنا معاكى فى الامتحانات
    :))

    ReplyDelete
  6. صباح التهييس

    يا بنتي صحتك مش كده

    ربنا يوفقك ان شاء الله و تجيبي خمس اجوان زي الاهلي كمان :)

    ReplyDelete
  7. :))
    بالراحة حبة احنا فين واخر امتحان فين لما تبتدي تهزي راسك بس وماتتكلميش ولا تاكلي ولا تضحكي والسؤال البايخ بعد كل امتحان .. هاة عملتي اية
    تردي بهدوء .. مـعـرفـش
    ربنا معاكي
    ثانية واحدة البعير هلك دي قديمة عليكي اوي جبتيها من فين دي..الامتحانات تعمل اكتر من كده

    ReplyDelete
  8. هههههههههههههههههه يابنت انتى اتجننتى ربنا معاكى ياقمر والله بدعيلك والله

    ReplyDelete
  9. هههههههههههههههه
    مسخرة

    ;)

    ReplyDelete
  10. يا بنتي حرام

    هيبقي دراما وجرامر وصوتيات

    وانتي

    ايه اللي انتي بتقوليه ده
    دانتي لخبطتيني خالص

    مين بيروح فين بكام

    اما افوق ابقي اشرحيلي
    ربنا معاكي ومعانا

    ReplyDelete
  11. ده اخرت شرب الميا
    مش قلنا يناس ابعدو عن الميه من الحنفية
    سبحان الله
    ادى ضهرك للورقة عمر ماالكاميكزة فى ددتنا مترعى

    يلا بالتوفيق وايام وهتعدى زى اللى قبليها
    يعنى كانت وال مرة

    ReplyDelete
  12. السلام عليكم
    إحنا هنقلد نشرة الأخبار و لا أية
    المهم
    ماشي مبروك للأهلي و للإسماعيلي كمان و للزمالك زعيم الكل
    أنت حالتك بتكون وحشة قوي في الإمتحانات الحقيقة
    ربنا معاكي و يوفقك يارب دايما

    ReplyDelete
  13. ايه التهييس ده
    بصراحه مت من الصضحك
    الله يجزيكي

    ReplyDelete
  14. بوست لذيذ


    ربنا يوفقك فى الامتحانات

    ان شاء الله اعلى الدرجات

    تحياتى

    ReplyDelete
  15. لاحول ولا قوة الا بالله
    :(

    عادي،
    ابقي طمنينا عليكي لما تخلصي

    ReplyDelete
  16. هههههههههههههه
    طب مين فينا بقي اللي مدونته زي العسل
    والله انتي الي عسل
    بس خلي كاميكاز يسخنلك جزمتني جرجير علي النار
    واضربيلك دوا كحة
    واقمطي القمطة علي راسك ونامي تلات واربع وتبقي علي الجمعه كدة زي الفل
    ربنا معاكي يا قمر
    مش تقلقي كلنا لها
    وشدة وتزول

    ReplyDelete
  17. لذيذه جدا و ان عكست تعكس جو من النكد مش طبيعي بسخريه رائعه
    انا هضيفك للفيفرت عندي
    استمري

    ReplyDelete
  18. ايه ده

    اول مرة اجى ازورك الاقى كده

    تهييس تهييس

    عموما يا قمر عادى

    هيا الامتحانات كده

    ربنا معاكى

    سلامنا لكوكو


    واشوفك البوست الجاى

    ReplyDelete
  19. هههههههههههه

    ما شاء الله

    انا بكتبلك دلوقتى فى مساء كاميكازاوى معتدل..., الطقس 22 درجة كاميكازاوية
    لابس تى شيرت لونه كاميكازى

    بقرى البوست بتاعك .., بضحك بشكل كاميكازى عالاخر

    ايه ده

    ايه الحلاوة دى

    هييييييييييه .., بتقووول ايه

    بس سؤال اخير

    هو مين كاميكاز ده

    زى متكاظى بتاعنا كده

    ReplyDelete
  20. أنا ماكنتش أعرف ان الامتحانات واصله كده وتأثيرها علي كل الناس, أنا نفسي ألاقي حد الامتحانات مش بتهمه ولا بيعملها اعتبار , بس للأسف مش لاقيه
    ماتنسيش تسلميلي علي كاميكاز(:

    ReplyDelete
  21. ربنا يوفقك فى امتحانتك ان شاء الله
    وهم كام اسبوع بيبقى الواحد فيهم كائن فضائي وبعدين بيرجع تانى

    ReplyDelete
  22. مرة واحد كاميكاز لعب شطرنج مع واحد كاميكاز زيه ، الملك مات مشلول .

    ReplyDelete
  23. ده فعلا الفيوزات عندك ضاربه خاااااااااالص
    ربنا يهديكي
    وعلى فكره الكاميكاز بيسلم عليكي

    ReplyDelete
  24. علي فكرة بقي ساعة مكنتي بتتكلمي كان الكاميكاز قاعد معايا انا وبيلعب معايا عشرة جوكر ..حتي كان في 3 كاميكاز كمان كانو لسة مخلصين الحرب العالمية بس اللي فاكره ان واحد فيهم كان راسه مقطوعة..تقريبا ملحقش يجري بعد مفجر نفسه في ال..ايه ده..مين اللي جابني هنا؟

    ReplyDelete
  25. واحـد من الناس
    ربنا يكرمك مواهب ايه بس
    دى حاجة كاميكاز كدة على القد
    :)

    ReplyDelete
  26. نوووووووسة زميلة الكفاح
    منا بقول كدة من وانا فى اعدادى والله يابنتى
    ليه مايبقاش فى ثقة
    الدكتور : مذاكرين يا جماعة
    إحنا: ايوة يافندىىىىىىى
    الدكتور : شاطرين .. دخلوهم السنة اللى بعدها
    والموضوع ينتهى بكل بساطة

    منورانى فى اول تعليق ليكى عندى يا نونو

    ReplyDelete
  27. ma_3alina
    يارب تزووووول يارب على خير
    إدعلينا الله يكرمك


    albida
    ههههههههه معلش بعيد عنك وعن السامعين كان يوم غريب والكلام مش عاوز يدخل فى دماغى ولا حتى بالزق
    لالالا .. كاميكاز مش فاضى .. بيغسل المواعين
    ونورتينى لاول مرة وان شاء الله ماتكونش آخر مرة
    :)


    m_elsewedy
    هههههههه
    دى وصفة سهلة دى وصفة هايلة
    ايوة كدة ادعيلنا ربنا يكرمك


    utopian
    ايوة كدة إستمر فى الدعااااااااء

    ReplyDelete
  28. saso
    لا ماهى من اولها بتبهدلنا يا ساسو والله
    بس انا لما حد بيسألنى من وانا صغيرة بجاوب إجابة واحدة بس .. الحمد لله
    لما دخلت الكلية وابتديت اطحن بقيت اقول .. ربنا يستر

    البعيرُ هلك دول تراث يابنتى .. ناس جامدة يعنى مش اى كلام
    بس هما غالباً ماتوا مش عارفة
    :(
    نورتينى وادعيلىىىى بالله عليكى


    chico
    ايه النور بتاع المدونة الجديدة ده
    منورة يارورو والله
    عارفة انك بتدعى واستمرى فى الدعاء ربنا يكرمك يااااااااااااارب


    شوق الياسمين
    ههههههههههه
    كاميكاز بيسلم عليكى وبيقول منورانا
    :D

    ReplyDelete
  29. amr ahmed
    ماهو اصلى انا كمان مش فاهمة
    نشوف حد ثالث يفهمنا كلنا
    واكيد مش هيكون كاميكاز لانه مش بيفهم اساساً
    اهلا بيك لاول مرة عندنا وإن شاء الله ماتبقاش اخر مرة

    mansourawy
    فعلا انا يوميها كنت عشطانة .. يمكن برضه
    ماهى مش أول مرة بس خلاص تعبتتتتتتتتتتتتتتتتت
    حاجة تخنق بجد
    الحمد لله على كل حال
    وادعولناااااااااااا


    no fear
    وعليكم السلام ورحمة الله وبركاته
    يا نهار ابيض .. ايش جاب لجاب
    لا نشرتك تكسب طبعا
    الله يبارك فيك
    واهلا بيك لاول مرة عندنا وإن شاء الله ماتبقاش اخر مرة
    وادعيلناااااااا


    محمد مفيد
    ادعلينا بالله عليك ومتنساش تسلم على عبد الله ومامته
    اهلا بيك لاول مرة عندنا
    ويارب مش تبقى آخر مرة


    Abdou Basha
    :( إدعيلنا الله يكرمك
    اهلا بيك لاول مرة عندنا ويارب ماتبقاش آخر مرة

    ReplyDelete
  30. tamer
    امين يارب
    ربنا يسامحك عشان مدونتك المرعبة دى
    ونورتنا فى مدونتى المتواضعة
    وادعيلنااااااااا

    سمراء النيل
    هههههههههههههه
    ايه جو التزيق ده
    خلاص تبقى انتى اللى عسسسسسل
    نورتينى لاول مرة عندى ويارب ماتبقاش اخر مرة يا سكر... ماتقطعوش الجوابات بقا
    وادعيلىىىىىىى


    memo
    ربنا يكرمك ادعيلى
    ومرسى لكلامك اوى
    نورتينى بجد


    carmen
    كوكو بيسلم عليكى وبيقولك تدعيلى
    اسمعى كلامه بقا وادعيلىىىىىىى
    نورتينى وان شاء الله اعمل بوستات تعجبك ومش تهيييس
    :)


    zordeak
    ايه الكلام ده ... ده قاعد جامبى من ساعتها ماتحركش .. خرج من ورايا ولا ايه؟
    متكاظى وكاميكازى ....... زى هناء وشرين كدة


    esraa
    وليه تدورى مانا عندى اخويا اهوه
    ابقى انا هيجرالى حاجة من كتر القلق وهو عااااااااااادى ومش بيذاكر اساسا
    مقضيها زى ناس كتير ماهى مقضياها
    كوكى بيسلم عليكى
    :)

    ReplyDelete
  31. كريم يوسف
    ربنا يكرمك
    اهلا بيك لاول مرة عندنا ويارب المدونة تعجبك وماتبقاش اخر مرة
    وبالله عليك بجد ادعيلناااااا


    أخف دم
    ههههههههههههههههههه
    كاميكاز مأهور
    كدة تشكك فى قدراته العقلية؟؟؟


    انتهى المشوار
    ايوة ضربت خلاص
    اهلا بيك لاول مرة عندنا وان شاء الله المدونة تعجبك وماتبقاش اخر مرة


    احمد عيسى
    هههههههههههههههه
    اديك طلعت منهم اهوه
    كاميكاز اللى هنا بيقولك روح وهو هيحصلك

    ReplyDelete
  32. يا جماعه العلاج الامثل هو شريط محمود عبد العزيز ( مزجانجي ) بتاع الكميكمي كا الكميكمي كية

    ReplyDelete
  33. king a.s.r
    والله احسن حاجة
    اصل الكميا دى غدارة اللى يبسبها يشتغل فى الاحياء
    هههههههههههههه
    نورت المدونة لأول مرة وإن شاء الله ماتكونش آخر مرة

    ReplyDelete
  34. ايوه طب انتى كويس انك كتبتى كده مودنتك جميله اوى بجد ...ثم الحبايب كللهم بيجو هنا كانتمفاجأه والله

    ReplyDelete
  35. camera_girl
    ياستى ولا تزعلى اهو الحبايب زادوا واحد
    منورة المدونة لاول مرة وياريت تكررى الزيارة

    ReplyDelete
  36. لا حول ولا قوة الا بالله

    بت يا ياسمين
    انتي بتحطي بوستاتك القديمة ليه يا بت

    انا اقول برضه انا قريت الكلام دة قبل كدة فين

    لا وكمان معلقة

    ليه كدة بس

    ReplyDelete
  37. السلام عليكم
    الاخت ياسمين
    الاخ كاميكاز

    مدونتكم جميلة جدا
    ومختلفة فعلا
    وفيها شغل فنى كبير
    دى اول مرة ادخل عليها
    طبعا لسه مقرتش كتير بس ان شاء الله يحصل

    انا عارف ان الايام دى مشحونة
    لانى مريت بنفس التجربة قبلك يا ياسمين
    من 5سنين لانى كنت فى نفس الكلية
    وعارف يعنى اية مشروع تخرج
    وبكالوريوس

    واتمنى انكم تزرروا
    مدونتى المتواضعة جدا
    we can

    على فكرة انا هضيف مدونتكم عندى لوسمحتوا طبعا

    ReplyDelete
  38. هى الحاله ايه يا ياسمين؟

    ReplyDelete
  39. ياعيني عليكي يامينو
    بس الامتحانات بتعمل أكتر من كده والله
    ربنا معاكي ومعانا ومع كل الناس اللي بيمتحنو يارب
    سلميلي علي كاميكاز كتييييييييير

    ReplyDelete
  40. انا اشترك معاكى فى الراى الواحد مل من الكلية والتعليم وروتينة دة قرف قبل الامتحانات بشهر نتبتدى نصور ورق ونرمية فى الاخر كل دة علشان نحفظ كلمتين وبعدين نرصهم فى الامتحان ونخرج مش عارفين احنا كاتبين اية والدكاترة كمان مبيشرحوش حاجة طب نعمل اية نسقط؟

    ReplyDelete
  41. بجد دماغك دى تحفة
    ما شاء الله طبعا
    بس خدى بالك لحسن كاميكاز
    يدخل جوا دماغك يلعب فى الفيوزات
    و يحرمنا من الابداع الجميل ده

    ...تحياتى

    ReplyDelete
  42. ولو إن شكلك نسيتيني أصلاً ، إلا إني هرجع وأقوووول لك ... إزيـك يا ياسمين ، يا إنســانـة ........
    .
    .
    .
    حلوووة قوووي التخاريف الكاميكازية :) ...
    وفكرتيني بأيااام التعب و الضنا ، والامنتحانات و الذي منه
    .
    .
    تحياااااتي برضووو

    ReplyDelete
  43. لا اجيد فن التعليق و هذا كثيرا ما يسبب لي الكثير من المواقف المحرجة مع الاصدقاء
    و لكن خلاصة القول اني ارى بوضوح جهد مبذول و رؤية فنية جيدة
    بس انا ليا اقتراح بسيط فيها ايه لو تجربي نفسك في العربية الفصحى
    انا عارف ان الموضوع مش سهل بس مين عارف يمكن تضرب معاك

    ebadentist

    ReplyDelete
  44. السلام عليكم
    هاااااااا

    ReplyDelete
  45. جميل قوي اسلوبك وجميل انك شايفة الدنيا والاحداث اللي فيها برؤيتك ام دم خفيف ... الاسلوب اللي بتكتبي بيه بيشد برغم الحسرة والالم اللي فيه من ذكر لهزيمة الاهلي والمذاكرة كمان... اتمنالك التوفيق والتركيز في تحليل أحداثنا اليومية لعالم جميل مليان ابتسامات

    ReplyDelete
  46. تسلمى ضحكتينى والله
    هههههههه
    وكل كاميكزية وانتى طيبة :D

    ReplyDelete
  47. ههههههههههههههه
    يخربعقلك كل ده تهييس
    يابنتى ده انتى دماغك ضربت خلاص
    وكل ده عشان الامتحانات ... يابنتى خديها كلمه حكمه
    من نام وارتاح جاء له النجاح
    if you want to be happy
    ارمي الكتاب وصلي على النبي

    ReplyDelete
  48. ايه ياجميل كل ده من الامتحانات والاهلى كمان انا عرفت السبب مش بس الامتحانات معلش تعيشوا وتاخدوا غيرها
    ربـــنا يوفقــك ياااااارب امين

    ReplyDelete
  49. صباح الدماغ الاسعه
    كل ده من المذاكره
    واغاني عجرميه وبتاع
    :)ربنا يعديلك السنه دي علي خير يابنتي

    اما حكايه الاهلي والبارسا
    في كام لعيب لعبوا الي حد ما
    حسن مصطفي ووائل جمعه وابو تريكه حاول برضه والحضري كان اسد برغم الاتنين بريزه
    العيب كان في الخطه الغبيه اللي نزل بيها المعلم جوزيه في الشوط الاول
    كنت حاسس ان برشلونه بيلاعب مركز شباب الحبانيه
    واحد فيهم يمسك كوره يلاقي 4 حواليه ويسيبوا باقي الملعب
    طبعا رونالدينهو حتي ماحاولش يلعب
    تقريبا صعبنا عليه
    عموما كان فيه فضيحه تانيه قبل الماتش في التذاكر اللي نزلت علي السوق السودا عدل في سابقه هي الاولي (ماحصلتش حتي في مركز شباب الحبانيه)
    يلا منه لله اللي كان السبب

    شدي حيلك يا انسانه وكلنا في الهوا سوا

    ReplyDelete
  50. تخارررريف ولا انا الى بخرف
    تكوكظت الكمكاظرات تتهركزكات لأن الهكزتيرنيا حاجه كده مش مفهومه
    ودمتم مكيمكزين

    ReplyDelete
  51. ههههههههههههههههههههه

    ايه يا بنتي ده

    انتي متكمكزه كماكيز علي الآخر

    بجد عسل

    تحياتي

    ReplyDelete
  52. تكمكز الكاميكاز متكمكزا

    ReplyDelete
  53. ازيك يا ياسمين
    ربنا يوفقك وينجحك ان شاء الله يا ياسمين رغم انى زعلان منك يعنى .. بس مش مشكلة .. الأهم انك الحمد لله صحتك كويسة ويكون مزاجك احلى .. بالتوفيق ان شاء الله

    ReplyDelete
  54. ههههههههههههههههههههههههه

    دي احلي مدونه دخلتها من شهور

    في انتظار المزيد

    ReplyDelete
  55. ازيك ياسمين اخبارك ايه
    سامحينى على تقصيرى بس خالى بالك انا عملت اللى عليا وكلمتك بس انتى بقى ربنا يعينك على المذاكرة هاقنع نفسى انك كنتى مشغوله فى المذاكرة

    ReplyDelete
  56. لا لا لا واضح فعلاً كدا ان الفيوزات كلها ضربت خلاص و بعدين انتي زعلانة ان احنا اتغلبنا 4 قولي الحمد لله انهم مش أكتر من كدا.

    بيني و بينك لو الماتش كان انتهى بالتعادل و لا بفوز الأهلي كنت هزعل لانهم ساعتها يبقوا بيستخفوا بعقليتنا و ذكائنا و تمثيليتهم كانت هتبقى مفقوسة قوييييييييييي.

    و أبو تريكة أبو تريكة تا تا تا تا تا على رأي سعد الصغير.

    على فكرة أبو تريكة أكثر حد زعلني في الماتش دا لانه و على الرغم من رفضه لفكرة الاحتراف بره مصر الا انه لعب في الماتش دا بفردية بشعة و كأنه كان بيحاول يشتهر بس على مين يا أبو تريكة دول برشلونة و سلم لي على رونالدينهو.

    ReplyDelete

الكلمـة نـور .. وبعـض الكلمـات قبـور