Wednesday, January 17, 2007

كلـه فى الكلتـش




طبعاً بعد إعدام صدام حسين لازم الكل يقول كلمته ويقول رأيه


كانوا جايبين النهاردة فى قناة العربية تقرير عن اغنية شعبان عبد الرحيم الجديدة عن إعدام صدام


ولما المراسل سأله عن رأيه


قال : لا بس دول هما اتنين عرب بيتخائوا على شوية معيز وخرفان


عم بوش بقا ماله يحشر نفسه بينهم ليه؟؟؟؟


*****


وكملت النشرة بالإضافة للإيميلات كمالة الموقف البطولى!!! ...شعبولا" يتحدى بوش".. بعد أن جهز أغنية عن إعدام "صدام حسين" باعتبار الحكم ليس نهائيا سارع وألّف أغنية أخرى بعد صدور "الإعدام" تقول كلماتها "مش لاقي كلام أقوله وإن قلت أقول لمين، عملوا فيلم وسيناريو عدموا "صدام حسين"، خلاص مات الكلام وكله في التمام، وأهي القضية خسرت الحكم بالإعدام"


وفي لقاء بنقابة الصحفيين قام "شعبان عبد الرحيم" بغناء الأغنية وأنهى كلمته قائلا: "مش بعيد بوش يحكم عليّ أنا كمان بالإعدام ولن يستطيع أحد وقتها أن يعارضه وإن حدث ذلك.. وصيتكم العيال


!!!!!



خلصت المسرحية


مش لاقي كلام أقوله


وإن قلت أقول لمين


عاملين فيلم وسيناريو


فاكرينا مغفلين


خلاص الكلام مات


وكله في التمام


والمحكمة حكمت


والحكم بالإعدام


ونزلت الستارة


اللعبة اتفبركت


الورقة اتسكلت


والحكم أصدروه


خلاص هاينفذوه


والمسرحية خلصت


قال إيه هايعدموه



بس خلاص

8 comments:

  1. السلام عليكم و رحمة الله و بركاته

    الاول مدونتيك جميله ما شاء الله و بوستاتيك حلوه ثانيا بقي نخش علي البوست ده
    انا الصراحه مش بحب شعبان عبد الرحيم مش علشان الصوت ولا الشكل ولا كدا انا بكره فكرته في السذاجه و انه بيتسهبل انه مش فاهم يعني اي حاجه ولا كلام ده يعني ما هو راجل مشهور و معاه فلوس دلوقتي يقدر يتعلم ما علينا برضه انا بتخنق من فكرة ان كل ما يحصل حاجه يطلعلنا اغنية عليها مش صحافي احنا عايزين نسمع طرب مش حكاية مع ان الصراحه الكلمات لذيذه كقرائه فقط يارب يهديه

    ReplyDelete
  2. السلام عليكم ..حلوه اوى مدونتك بس الصراحه مش عاجبنى شعبوله اصلوا مش فاهم اصلا فى ايه فى بلد بس اهو بيغنى وماشى مع احداث

    ReplyDelete
  3. فعلا

    كله في الكلتش

    ReplyDelete
  4. صباحو قشطة مدونة جامدة
    بس المهم انا حاسس بالغثيان اذا كانت الهبل ده ليه مكان في كل موقف جاد
    و ليه مساحة و قال بيسموه نقد شعبي قال

    ReplyDelete
  5. انا مش هتكلم عن شعبان لأن الكل اتكلم عليه.
    أنا بس هقول ان الكلام فعلا حلو وده مش ميزه لشعبان ده ميزة المؤلف اللي بيكتبله وأعتقد انه ممكن يكتب أحسن من كده لمطربين تانين.

    ReplyDelete
  6. مقدرش انكر ان شعبان صوته حلو
    بس بصراحه سذاجته هتقضى عليه فى يوم من الايام
    والمشكلة مش شعبان والله
    المشكلة فى اللى بيعرضو حواراته ويدخلوه فى كلام اكبر منه
    طالما هو صوته حلو سيبوه يغنى
    لكن تناقشوه فى حاجه بلاش
    بلاش تضحكوا علينا ماوراء البحار
    كل الناس بتغنى مين مش بيغنى
    بس كل الناس متقدرش تخش ف حوار
    واقصد بكلمة حوار الكلمة بمعناها الحقيقى لا ظاهر الكلمة وفقط
    سلامى

    ReplyDelete
  7. copa
    وعليكم السلام ورحمة الله وبركاته
    يارب يهدينا جميعاً
    اهلا بيك لاول مرة عندنا ويارب ماتكونش آخر مرة

    chico
    وعليكم السلام
    فعلا بس اهوه حد بيقول حاجة بدل الصمت الرهيب اللى احنا فيه
    مرسيى ليك ونورتينا


    utopian
    مش كدة برضه ;)

    ReplyDelete
  8. على الألفى
    ما تنساش إن شعار المرحلة دى .. محدش فاهم حاجة يا معلمممم
    شرفت مدونتى المتواضعة
    اهلا بيك
    :)


    esraa
    انا بحس إن ده الكلام اللى كلنا عاوزين نقوله .. بس هو حاطط عليه شوية موسيقى ومسميها اغنية
    مش اختراع يعنى

    masourawy
    ههههههههههه العرب اتنين بيتخنئوا على شوية معيز وخرفان ههههههههه
    لا حول ولا قوة الا بالله
    هنقول ايه بس

    ReplyDelete

الكلمـة نـور .. وبعـض الكلمـات قبـور