Sunday, June 12, 2011

عائلة الأستاذ شلش

شكراً للثورة التي رحمتنا من البرامج والمسلسلات التي لا معنى لها وجعلت التليفزيون أخيراً يقوم بإعادة الكنوز التليفزيونية مثل مسلسل عائلة الأستاذ شلش ، بطولة صلاح ذو الفقار - ليلى طاهر ، إنتاج 1985

المسلسل كان مقرر علينا فى الطفولة ، دائما ما يأتي ودائما ما نستمتع ، حتى إننا أصبحنا نعرف أعمارنا وأجيالنا من خلال المرحلة العمرية التي شاهدنا فيها هذا المسلسل ، كنت من موليد 1986 لذلك أتذكر إننى شاهدته فى الطفولة المبكرة جداً ، أولى إبتدائي بالكتير ، وجدت على تويتر من شاهده وهو فى الإبتدائية ومن شاهده وهو فى الإعدادية ومن شاهده وهو فى المرحلة الثانوية !ا 

وكالعادة كلما شاهدت مسلسل قديم تجد أن نظرتك أيام الطفولة مختلفة إختلاف كلي وجزئي عن نظرتك وإنت كبير ، قوت القلوب على سبيل المثال ، سكرتيرة الأستاذ شلش ، كانت فى نظري تجسيد بشري لكلمة ( ست وحشة ) .. ليه وحشة؟ .. عشان قليلة الأدب ، وعندما أشاهد المسلسل هذه الأيام أجد إنها ليست قليلة الأدب على الإطلاق ، بالعكس دي الأدب نفسه مقابل ما شاهدنا فى السنوات الأخيرة على شاشات التلفزة

هو فعلا مسلسل عائلي بمعنى الكلمة ، لا فى إسفاف ، ولا رقاصة وبترقص ، ولا كلمات خارجة ، ولا يعاني من المط والتطويل كما يحدث فى مسلسلات رمضان .. يناقش مشاكل أسرية لا يخلى بيت منها بطريقة بسيطة جدا ومسلية فى نفس الوقت 

لذلك كله شكراً للثورة ، وأتمنى أن تكتمل الثورة حتى يعيدوا إذاعة مسلسل هند والدكتور نعمان ، وكارتون الفواكه والقط فليكس ودلفي وبابارو فيل خرطوموه طويل   

عموماً إن كنت مثلي من جمهور هذا المسلسل العائلي الجميل فأدعوك لمشاهدته مرة أخرى وأنت كبير .. يعرض على قناة النيل كوميدي الساعة 8 مساءاً والإعادة الساعة 3ونص فجراً ، وإن لم تكن تعرف من هو شلش أصلا فأدعوك لتشاهد وتستمتع ، كفاية رغي بقى احسن صوابعي وجعتني ... قطيعة ... ماحدش بياكلها بالسااااااهل

8 comments:

  1. ياااااااااه انا بقى شفته وأنا فى حضانه تقريبا 2 حضانه كده بس تقريبا شفته قبلها ده المسلسل اللى حببنى فى لقمة القاضى رغم إنى مش فاكر منه حاجه غير قطيعه محدش بياكلها بالساهل
    المهم اللى فاجئنى بجد إن المسلسل أنتاج 85 فحين إنى مواليد 87 رغم كده تحسى أنه لما كان بيتعرض كأنه جديد وقتها ده مش بس كده ده فى حاجات تانية كتير كنت وأنا صغير ولغاية فتره قريبة كنت فاكرها بعد 87 اتاريها قبل كده زى مازنجر مثلا طلع سبعيناتى الغريب غن عمرنا مكنا بنحس بده كنا بنحس إن كل حاجه انتاج وقتها فرق الوقت مكنش محسوس دلوقت لو حاجه بعدها بسنه من على لسان الاطفال دى قديمه جدا

    ReplyDelete
  2. سلامو عليكو

    عندك حق جدا.
    انا من مواليد1985 وفكرة المسلسل ده وكانت اكتر حاجة عاجبانى ان بنت الاستاذ شلش كانت عايزة تبنى مستقبلها بشكل مختلف فحاولت تعمل مشروع تقريبا رز بلبن او بليله حاجة كده يعنى
    وكان اخوها معجب بيها لانها بالفعل قدرت تعمل مكسب بس كان بيستنكر اللى اخته عملته

    انى احبك فى الله

    ReplyDelete
  3. انا كمان كنت بحبه جدااا و كنت بتابعه قريب على روتانا زمان تقريبا ، كنت مبسوطة قوى ان لسة الحاجات المحترمة لها متفرجين
    :)

    ReplyDelete
  4. اه انا فاكره المسلسل ده اوى :)
    وفاكره كمان هند والدكتور نعمان
    يمكن مش فاكره تفاصيل الاحداث لانى ماسمعتهمش تانى بس فاكره انى كنت بحبهم:)
    الحاجات القديمة اللى ذكرتيها كلها كنت بحبها جدا وللاسف اتنست من ذاكرة التليفزيون
    فى كمان مسلسل عصفور افندى وكرتون الفواكه بتاع موزى ورولى وشوكى:)

    ميرسى انك فكرتينى بالحاجات دى
    بجد شكرا أوى

    ReplyDelete
  5. مش فاهمه ليه الكومنت مارضيش يتبعت بالاكونت بتاعى
    سورى انى معلقه لاول مرة عندك بغير معرف
    انا نور
    قصاقيص حبيبة

    ReplyDelete
  6. عندك حق طبعا .. بس المشكلة مع المتعة فى أعمال الماضى دى بنتوه فى ذكريات زمان ونعيش معاها وللأسف بنفوق بسرعة على الحاضر واللى فيه.. تخيلى بقيت باخاف افتكر حاجة من الماضى أصل أفضل فية وأفصل وساعتها مش هاارجع تاانى... أو أيه

    ReplyDelete
  7. من اجمل المسلسلات اللى الواحد شافها
    انا بقى من صغرى كانت معلقه معايا بنته اللى بتبيع ساندوتشات
    كان عاجبنى فكرتها انها بتدرس وبتشتغل
    لو الواحد بيشوف المسلسل دلوقتى
    فا بيشوفه عشان يفتكر ايام زمان مش بس عشان المسلسل :)

    ReplyDelete
  8. عائلة شلش وهند والدكتور نعمان
    يااااااااااه

    انا دمعت لما افتكرت الوقت ده

    ليه دايماً الذكريات جميلة حتى لو كانت المعيشة وقتها مستواها اقل بكتير من دلوقتى

    ReplyDelete

الكلمـة نـور .. وبعـض الكلمـات قبـور