إتفضل إمشي انت

انا عايزة أسأل سؤال .. هي المحطة التلفزيونية دي بتاعة أبو المذيع من دول؟ يعني مثلا بيتعامل معاها على إنها عزبة أبوه وبتاعته ومن حقه يستضيف مين ويطرد مين على الهوا؟ الكلام ده بيفكرني برئيس كان فاكر البلد عزبة أبوه برضه وبيعمل فيها اللى هو عايزه ماهي بتاعته بقى .. بعد الثورة الكلام ده لسة موجود وبالصوت والصورة .. عمرو أديب يبدع ويتفوق على نفسه ويكشف نفسه بنفسه .. كيف يطرد ضيف على الهواء؟ وإذا كنت على إستعداد لطرد أي ضيف لماذا تستضيفه من الأساس؟ 

فى قاعدة بتقول الزبون دايما على حق يعني مهما كان تصرف الضيف لازم تحترم وجوده ، ولا أقولك بلاش شغل الأسواق ده خلينا فى كلام الأصول : من جالك بيتك جاب الحق عليك .. والبرامج بتقول على اللى بتستضيفهم ضيوف .. ينفع تطرد ضيفك بالشكل ده مهما عمل؟
-

عمرو أديب .. القناة دي مش بتاعة السيد الوالد ، وكان أحرى بك الإعتراف بخطأ معديين البرنامج اللى اعتمدوا على موقع غير موثوق به مثل ويكيبيديا كمصدر للمعلومات تسبب فى تقرير خاطئ يقول أن الشاعر مصري / قطري فى حين إنه تنازل عن الجنسية القطرية يعني مصري بس  ، ولو هتتجن وتجيب إسم قطر فى جملة مفيدة قول الحقيقة .. كان معاه جنسية قطرية وإتنازل عنها .. شوفت الحقيقة سهلة إزاي؟

مافيش إعلامي محترم بيحترم نفسه ومشاهديه والكرسي اللى قاعد عليه والكلية اللى اتخرج منها والرسالة الإعلامية اللى بينقلها يعمل اللى انت عملته .. ونصيحة مني تتفرج على حلقة يسري فودة مع الدكتور السباعي .. رغم كل الكذب اللى قاله الضيف  لم يقل له المذيع إتفضل إمشي ، لأنه مش إعلام أبوه ده إعلام المشاهد ومش من حق حد يطرد أي ضيف من بيت مش بيته بالأساس!!ا ... وتأكد لو الجمهور عنده نفس القدرة اللى تخليه يقول لأي مذيع إتفضل إمشي .. صدقني كنت سمعتها من زماااااااااااان

ملحوظة: انا لا اتحدث دفاعاً عن عبد الرحمن يوسف على الإطلاق ، رغم إنه إعتذر لجمهوره بعد إنتهاء الحلقة عن رد فعله العنيف وانا رأيي فى رد فعله ده إنه رد فعلي شخصي يختلف من إنسان للتاني ، الله أعلم أنا أو حضرتك لو اتعرضنا لنفس الموقف كنا هنصرف إزاي ، انا بتكلم كمشاهدة ساءها طرد ضيف - أي ضيف - من برنامج على الهواء بهذا الشكل الفج من غير ما يعملوا حساب إنى قاعدة بتفرج حتى