Monday, June 20, 2011

الدبوس هو الحل

ظاهرة التحرش الجنسي زادت وإنتشرت لحد إنها مابقتش ظاهرة ولا حاجة ، دي بقت طبيعة وشئ عادي فى شوارعنا ، بنت ماشية يعني هتتعاكس ، فى المواصلات يبقى هغلس عليها وأحاول ألمسها .. وهكذا 

فى الأول إسمحيلي يا حواء يا حبيبتي أعرفك ع الواد المعفن الزبالة اللى بيتحرش ده ، وهو بالمناسبة مش دايماً ولد .. كتير بيكون حد كبير ، حد كبير مش راجل كبير لإن المتحرش مش راجل أساساً ! ، اللي بيتحرش ده بقى ياستي لا بيهمه شكلك أو لبسك أو سنك أو حتى حالتك أو المكان والزمان اللى انتوا فيه ، يعني ممكن جداً تكوني منقبة أو محجبة أو حتى حامل ويتحرش بيكي ، ممكن كمان فى عز الضهر فى شهر رمضان يتحرش بيكي برضه ، ماهو مش بني آدم بقى

المتحرش ده ممكن جداً تلاقيه فى الشارع أو فى المواصلات أو حتى فى الشغل أو مدرستك أو كليتك أو الصيدلية أو عند البقال ، إختصاراً بيتلاقى فى كل مكان وممكن يتحرش بيكي فى أي مكان من دول ولو بلعتي لسانك تبقى هتفضلي طول عمرك تفتكري اللى حصل وإنتى قلبك بيتعصر من جواكي على إمتهان جسدك بالشكل ده 

أما بقى بالنوسبة للبعض اللى يقولك ماهي تستاهل لابسة ضيق ومحزق أقوله: المبادئ لا تجزأ يا حلاوة ، إفرض هي لابسة وحش وعايزة تتعاكس زي ما بتقول ، وإفرض إن الشباب نفسه يتجوز ومش عارف ( مع إن الحديث الشريف بيقول من إستعفف أعفه الله ) ، لالا إفرض كمان إنها متفقة مع الواد اللى بيتحرش بيها ده وعاجبها الوضع ، هل ده مبرر إنك تشوف مشهد زي ده فى الشارع وتسكت عليه تحت شعار: ماهي اللى عايزة كدة؟ ... من حق الشارع واللى فى الشارع أنهم مايشوفوش مشاهد خارجة عن الآداب العامة على الأقل ، إعتبره مشهد خارج يا سيدي وماينفعش نعديه ، وإلا بقى هنكتب على ناصية كل شارع للكبار فقط!ا
 
نرجع لمرجوعنا يا عزيزتي حواء .. فى طرق كتيرة لحماية نفسنا من التحرش 

أولاً: عمرك فى حياتك ما تركبي مواصلة وتقعدي جمب سواق أبداً أبداً أبداً 

ثانياً: لو ركبتي مواصلات دوري على مكان فيه بنات تقعدي جمبهم وخلي أوبشن القعدة جمب الولاد أوبشن غير مطروح على الساحة إلا فى الضرورة القصوى 

ثالثاً: زمانك بتقولي: أقعد فى المواصلات؟!!! ده انتى متفائلة أوي ، عارفة انه صعب بس إياكي تركبي أتوبيس وتوقفي خصوصاً لو كنتي راكبة لوحدك لأن ماحدش من الذكور اللي قاعدين ع الكراسي عنده شوية دم عشان يقوملك وتقعدي إنتي ، فريحي نفسك من الأول وماتركبيش 

رابعاً: حصل وتم التحرش ، ماتسكوتيش يابت إنتى ، صوتك ده يجلجل ويملى فراغات الكون ويخبط فى دماغ هذا الكائن المتعفن ، إشتميه ، لو تاكسي إفتحي باب التاكسي وهدديه إنك هترمي نفسك لو ماوقفش ، لو ماوقفش إرمي نفسك من العربية ، انا عندي أموت أشرفلي من إنى أعيش بدون كرامة .. لو وقف إنتى ومزاجك بقى يا تبصقي فى وشه يا تشتميه ، إتس أب تو يو يا ولية 

خامساً: فى أفكار لصاعق كهربا ولرشاش سيلف ديفينس وانا صراحة مش بفضلهم ، لأن مثلا همشي بصاعق إزاي وانا معايا طفل؟! مش هينفع ، وبعدين السلف ديفينس ده ماعرفش بيجيبوه منين .. يعني مثلا لو رحت للعطار وقولتله: إديني 2 كيلو سيلف دفينس لو سمحت وإتوصى ! .. هيرد يقولي إجري هلب يور سيلف بعيد عني يا ست إنتى 

فى حل تاني أبسط وأروق وأخبث بكتير ، كتير مننا محجبات وطرحتهم متلغمة دبابيس ، ولو مش محجبات يشيلو دبابيس معاهم فى الشنطة .. قرب منك ، حاول يلمسك ، هوووووووب تشوكيه بالدبووووس ، هتلاقيه إتشال وإتحط وبقى يصوت ومش لاقي اللى ينجده ، وإنتى هتضحكي من كل قلبك بجد

سادساً: ليكن شعارك فى الحياة ياللى إغتصبتوا بنات القُبة هنلسوعكوا برجل الكنبة

9 comments:

  1. نصائح مفيدة :D
    read this
    قلم رصاص: كلمة بقولهالِك : امشى واقلعى ملط !

    http://2alam-rosas.blogspot.com/2011/06/blog-post_20.html

    ReplyDelete
  2. الحل المقبول فى الحلول دى هو الدبوس بقيت الحلول مش اللى كاتبها يعنى مش حتحل حاجه أه وبتاع الصويت بقى عملى لكن بلاش تركبى مشروع وبلاش تركبى أتوبيس شوية شوية بلاش تاكس شوية شوية انا عايزه عربية شوية شوية اصل العربية مش امان وبرده يتعاكس من الشباك هاتلى عربية بأزاز كهرباء وتكييف ويسلام لو بى أم من اللى ازازها متفيم فى بلدها عشان محدش يرخم عليا فى التراخيص ...... ممممم :P

    ReplyDelete
  3. برافو عجبتنى جدا فكره الدبوس
    ربنا يحمينا ويحافظ علينا جميعا ان شاء الله
    الرشاش الواقى موجود فى الصيدليات شفت اعلان عنه فى صيدليه تقريبا جاردن سيتى اللى جنب دار الحكمه شارع القصر العينى

    ReplyDelete
  4. فكرتيني ببوست كتبته زمان ازاي البنات تتصرف في املواصلات العامة :)

    نظرية الدبوس مهمة برافو.. وانا دلوقتي بقيت امشي مسلحة بالرشاش فشاش ^_^

    منهم لله بأه

    ربنا يحفظ البنات

    ***********************

    مها ميهوووو

    ReplyDelete
  5. ممكن كمان موهبة قوية ربنا اداها للبنات
    ::
    الصويييييييييييييييييييط

    ^_^

    ******************************

    مها ميهوووو

    ReplyDelete
  6. ايام الضحك والدموعJune 20, 2011 at 6:39 PM

    السلام عليكم
    دمك عسل وزى السكر
    تحياتى

    ReplyDelete
  7. لا يمكن لقطار الحل ان يسير على قضيب واحد فقط... مينفعش اطالب البنت تلبس اللي هيا عايزاه واقولها لو حد عاملك حاجه شكيه بدبوس .. الافضل اني من ناحية اقوم اخلاق البنات قدر المستطاع واخليهم يلموا جسمهم شوية ويعرفوا ان بعيدا عن الدين وبعيدا حتى عن الاخلاق في حاجه اسمها كرامة المرأة وميصحش انها تهين نفسها وترخصها .. ومن ناحية تانية اقوم الشباب واقوم كمان الناس انها متسكتش عن اي حاجه غلط بتشوفها .. يعني نحل في كل الاتجاهات .. مش اتجاه واحد

    ReplyDelete
  8. حلوة اووووووووووووى بجد :))

    ReplyDelete
  9. no comment ...
    صراحة مبهر .. لو كنت اعيش في مجتمع من هذا النوع تكثر فيه التحرشات .. لن اترك نفسي ابداً من دون
    "" دبوس ""

    ReplyDelete

الكلمـة نـور .. وبعـض الكلمـات قبـور