Thursday, June 23, 2011

إتفضل إمشي انت


انا عايزة أسأل سؤال .. هي المحطة التلفزيونية دي بتاعة أبو المذيع من دول؟ يعني مثلا بيتعامل معاها على إنها عزبة أبوه وبتاعته ومن حقه يستضيف مين ويطرد مين على الهوا؟ الكلام ده بيفكرني برئيس كان فاكر البلد عزبة أبوه برضه وبيعمل فيها اللى هو عايزه ماهي بتاعته بقى .. بعد الثورة الكلام ده لسة موجود وبالصوت والصورة .. عمرو أديب يبدع ويتفوق على نفسه ويكشف نفسه بنفسه .. كيف يطرد ضيف على الهواء؟ وإذا كنت على إستعداد لطرد أي ضيف لماذا تستضيفه من الأساس؟ 

فى قاعدة بتقول الزبون دايما على حق يعني مهما كان تصرف الضيف لازم تحترم وجوده ، ولا أقولك بلاش شغل الأسواق ده خلينا فى كلام الأصول : من جالك بيتك جاب الحق عليك .. والبرامج بتقول على اللى بتستضيفهم ضيوف .. ينفع تطرد ضيفك بالشكل ده مهما عمل؟
-
عمرو أديب .. القناة دي مش بتاعة السيد الوالد ، وكان أحرى بك الإعتراف بخطأ معديين البرنامج اللى اعتمدوا على موقع غير موثوق به مثل ويكيبيديا كمصدر للمعلومات تسبب فى تقرير خاطئ يقول أن الشاعر مصري / قطري فى حين إنه تنازل عن الجنسية القطرية يعني مصري بس  ، ولو هتتجن وتجيب إسم قطر فى جملة مفيدة قول الحقيقة .. كان معاه جنسية قطرية وإتنازل عنها .. شوفت الحقيقة سهلة إزاي؟

مافيش إعلامي محترم بيحترم نفسه ومشاهديه والكرسي اللى قاعد عليه والكلية اللى اتخرج منها والرسالة الإعلامية اللى بينقلها يعمل اللى انت عملته .. ونصيحة مني تتفرج على حلقة يسري فودة مع الدكتور السباعي .. رغم كل الكذب اللى قاله الضيف  لم يقل له المذيع إتفضل إمشي ، لأنه مش إعلام أبوه ده إعلام المشاهد ومش من حق حد يطرد أي ضيف من بيت مش بيته بالأساس!!ا ... وتأكد لو الجمهور عنده نفس القدرة اللى تخليه يقول لأي مذيع إتفضل إمشي .. صدقني كنت سمعتها من زماااااااااااان

ملحوظة: انا لا اتحدث دفاعاً عن عبد الرحمن يوسف على الإطلاق ، رغم إنه إعتذر لجمهوره بعد إنتهاء الحلقة عن رد فعله العنيف وانا رأيي فى رد فعله ده إنه رد فعلي شخصي يختلف من إنسان للتاني ، الله أعلم أنا أو حضرتك لو اتعرضنا لنفس الموقف كنا هنصرف إزاي ، انا بتكلم كمشاهدة ساءها طرد ضيف - أي ضيف - من برنامج على الهواء بهذا الشكل الفج من غير ما يعملوا حساب إنى قاعدة بتفرج حتى    

8 comments:

  1. تقريبا وجهة نظرى متقاربة لحد كبير مع ما كتبتيه
    فالموضوع هو عبارة عن ردود أفعال شخصية تختلف من شخص لاخر

    ReplyDelete
  2. صباح الخير يا ياسمينا

    بصى انا اتفرجت النهاردة ع اللينك ف موقع م المواقع وحسيت انه رد فعل عبدالرحمن يوسف تلقائى وطبيعى جداااااو كان المفروض بصراحة يقعد يسمعهم كلمتين انقح من كدا ..
    بس طلع راجل مهذب

    التقرير اللى اتعمل دا كأن اللى عمله واحد ف تانية اعدادى مش برنامج كبير بقاله سنين والمفروض فيه محترفين
    طريقة القاء اللى بيقرى التقرير فيها استهانة
    وعدم ترحيب
    وكلمة مصرى / قطرى دى فيها تلميح مقصود
    و بداية القصيدة كان كفر
    عشان كدا رد فعله انا شيفاه عادى
    وكان المفروض يكون أشد

    اما عمرو أديب بقى
    فماذا تتوقعين من واحد
    أراجوز زيه يا سمسمة
    ؟!!!؟

    تانى

    صباح الورد

    ReplyDelete
  3. كان ممكن يسجل اعتراض او تصحيح لما ورد في التقرير بشكل أكثر تهذيبا دون ان يتطاول على معدي البرنامج الذي يستضيفه وخاصة ان مقدم البرنامج قال في حقه كل ما هو خير ولم يتطاول عليه، لكن الواضح اننا لا نحسن التحكم في ردود افعالنا

    ReplyDelete
  4. لا القناه بتاعت اخوه مش ابوه :)

    والله انتم بتتعاملوا مع عمرو عى انه اعلامي جد وهو مجرد مهرج

    ReplyDelete
  5. يستاهل الطرد لان طريقة كلامه تدل على انه مغرور ومتعالي

    ReplyDelete
  6. معاكى حق جدا والله ..
    الموضوع كان غاية فى الإستفزاز

    ReplyDelete
  7. عدم الامؤاخذة كدة يا جماعة ... بس هو مين عمرو أديب دا أساسا .. مش ده المناقف اللى كان بيبوس فى تراب جزمة النظام القديم و اللى قعد يهلل أيام الثورة أن باب حسنى و ماما سوزى و أونكل علاء و جيمى دول حبايبنا ... و ان لما الثورة وصلت لهدف ان المخلوع بقى فعلا مخلوع .. طلع يعيط و يقول دول تعبونا و فقعوا مرارتنا- وحاجات تانية- و اهانونا و ان المذيعين شافوا الذل معاهم ؟؟؟ واحد بالعقلية المرضية دى المفروض ان اى ضيف فى الدنيا - ولا أعنى بكلامى الأستاذ عبد الرحمن يوسف فقط -مايعبروش اساسا ... واحد زى دة يترمى فى السجن ... ولا بخسارة العيش ة العدس اللى هياكلة ... واحد زية يترمى فى الشارع علشان انا بصراحة بحس ان الأشكال دى أشكا متعفنة و وصولية ... دا غير ان عمرو اديب دا اساسا مش واجهة مذيع ولا يعرف حاجة عن الاعلام غير علو الصوت و شوية الحركات اللى بيعملها اللى لا بتقدم ولا بتأخر ... المفروض لو فى عنده شوية كرامة ولا اذا كان بنى ادم اساسا ... يقدم استقالتة و يقعد فى البيت يقشر بصل ... ولا بخسارة البصل

    ReplyDelete
  8. انا فعلا استاءت جدا من اللى حصل ومهما كان رد فعل الشاعر مكنش يجب اهانتة بالشكل ده لان زى ماقلتى ده ضيف
    ___________________________
    وباحييكى جدا على المدونة

    ReplyDelete

الكلمـة نـور .. وبعـض الكلمـات قبـور