Friday, December 28, 2007

سنة أولى إنسانة

فاكرة اول مرة اسمع فيها عن المدونات كنت لسة فى الكلية وشوفت حلقة لبرنامج العاشرة مساءا كانت مستضيفة بعض المدونين ومن هنا عرفت التدوين .. خدت بعضي زى الشاطرة وفتحت جوجل وابتديت اكتب اسامي المدونين اللى هيا مستضيفاهم ودخلت مدوناتهم واتصدمت .. اتصدمت من كم النقد اللى بيوجهه المدونين دول من مدوانتهم ، المشكلة بالنسبالى كانت الاسلوب والألفاظ فعلا اتصدمت جامد واتخنقت ومابقتش مصدقة نفسى وقررت مادخولش المدونات دى تاني ابدا - الصدمة اللى كانت عندى من المدونات اللى فاتحاها ع البحرى دى راحت خلاص على فكرة لانى ابتديت اعرف ان فى مدونات تانية اوقع من كدة بكتييييييير وان للأسف كل ده فى الواقع وزى مافي واقع حلو فى واقع منيل بستين نيلة واهو بردو واقع - بعد فترة عرفت بالصدفة مدونة جميلة اوى وابتديت ادخل على المدونات اللى هى ضايفاها عندها .. لاقيت ناس بتتكلم بإسلوب راقي محترم لمسنى وشدنى جدا لدرجة انى بكيت من جمال كلامهم ، قعدت فترة اتابع من بعيد لغاية ما قررت افتح مدونتى
.
فاكرة يوميها دخلت الموقع عشان افتح الحساب على اساس انى بجرب ومتأكدة مليون فى المية ان محدش حيشوف المدونة دى خالص ، تيجى ايه دى اصلا بين الناس الجامدة اوى دى .. مشيت فى الخطوات وانا بفتحها وبعدين لاقيت الموقع بيسألنى حتسمى المدونة ايه؟ .. احترت مافيش حاجة فى بالى وانا اساسا بجرب ومش عارفة حاجة .. قمت كاتبة إنسانة ، مكنتش متخيلة ابدا ان الاسم ده فى يوم من الايام حيبقى جزء مني .. خلصت وكتبت اول بوست فى الفضاء التدوينى واللى كنت متأكدة ان محدش فى الدنيا حيقرا كلمة واحدة بكتبها
.
من اعدادى كدة وانا دايما اكتب خواطر ومصير الخواطر دايما كان الورق الكتير اللى مضايق ماما من كتره ونفسها ترميه وانا نفسى احتفظ بيه لانه من جوايا أوى .. مع دخولي الكلية وانشغالى بالأبحاث والمحاضرات وحاجات كتير اوى بعدت عن الكتابة وقلمى ضاع منى ومبقتش اكتب حاجة خالص ، المدونة شجعتنى انى ارجع اكتب تانى وانى احتفظ بكل حاجة بكتبها وكمان ناس على قدر كبير جدا من الإبداع والإحترام تقرالي وتقيم اللى بكتبه ده ، حبيت المدونة والتدوين اوى وبقيت على طول افكر ايه جديد ممكن اكتبه واعمله إخراج تدوينى ويبقى بوست اهديه لإنسانة .. المدونة خدت خط انسانى مكنتش مخططاله خالص هو طلع لوحده سبحان الله
.
نزلت اول وتانى وتالت ومش فاكرة كام تانى بوست وبعديهم عرفتكم على كاميكاز الشخصية اللى حيرت ناس كتيييييير اوى وكتير جدا سألوا يطلع ايه كاميكاز ده .. كاميكاز ده يا جماعة ولأول مرة اقولها يبقى شخصية كرتونية من وحي خيالي ووظفته الأساسية فى المدونة انه الفراش او البواب او السكرتير بتاعها واى شغلانة تانية ممكن يسد فيها .. اول ظهور لكاميكاز كان من خلال بوست تخاريف كاميكازية ومكنتش متوقعة ابدا ان كاميكاز يعجبكم اوى كدة .. كاميكاز كلفظ اساسا كان بيطلق على القوات الإنتحراية فى الحرب العالمية ، أول مرة اسمع الأسم ده كنت فى عربية صحبتى ولما تلاقى مجموعة كدة بتعدى قدام العربية بشكل مفاجئ كأنهم عايزين ينتحروا كانت تقول عليهم كاميكاز ، فاكرة يومها قعدت اضحك جاااااااااااااامد ع الإسم وعجبنى جداااااااا ومن يوميها بقيت اطلق اللفظ ده على كل حاجة واى حاجة عجيبة او غريبة او مطرقعة
.
مر عليا زوار كتييير فى اللى لسة مواظب على القراية وفيه اللى اختفى فى دوامة الحياة وفى اللى بيفضل الصمت وعدم التعليق .. بجد تحت اى ظروف انا متشكرة ليكم جدا عشان استحملتوا الرغى والهرتلة دى كلها .. بفرح أوى لما الاقى حد متابع كل التدوينات تقريبا ومش بيفوت حاجة وفرحت واستغربت جدا لما لاقيت مدونة صديقتى جدا بتحب ردى ع التعليقات.. يعنى سابت البوست نفسه والمدونة باللى فيها وحبت الرد ع التعليقات هههههههههههه
.
فاكرة لما المدونة ابتدت تتشهر ولما عملت ضجة مبنى الجحيم ولما إذاعة حريتنا استضفاتنى .. فاكرة ساعتها قعدت اشرح واحكى لبابا بالظبط انا بعمل ايه فى المدونة دى .. يومها سرح شوية وبعدين قالي جملة لحد دلوقتى مش قادرة انساها .. سامحونى مش حقدر اقوهالكم بقا .. كمان فاكرة يوم ما اتنشرلى بوست بقايا انسان فى جرنال المصرى اليوم .. فاكرة اللمعة اللى كانت فى عينى يوميها ونظرة الإعجاب اللى كانت فى عين ماما وبابا .. فاكرة لما مسكت الجرنال وقعدت اقول لماما الخاطرة الصغيرة اللى اتنشرتلى .. بصتلى ساعتها وقالتلى: جميل .. مين اللى كاتب الكلام ده بقا؟؟ هههههههههههههههه
.
سبحانك يارب معقول مرت سنة كتبت فيهم 68 تدوينة؟ .. سنة بحالها قضيتها معاكوا هنا ضحكت معاكم كتير من قلبى وكبرت وحزنت وامتحنت وفرحت واتخرجت وقعدت عاطلة لحد ما هيست ، اتحرق قلبى واتكلمت واتجننت وحلمت واتفاجئت ، فضفضت معاكوا كتييييير واكتئبت وبكيت هنا كتييييييير .. كنت لما ابقى ببكى بحرقة جامدة افتح المدونة واكتب اللى جوايا وانشره يمكن استريح ، وكتير من كتر الهم مكنتش بقدر ادخل المدونة واقعد بالكام شهر كدة معرفهاش ، حليت تاجز اما طلع عينى وعين اللى جمبى ، والواد كاميكاز اظهر فيهم مواهبه بردو .. فرحت معاكوا فى مناسبتكم وحسيت بمشاعركم فى كل حرف بتكتبوه فى مدوناتكم ، وحزننا كلنا لما فقدنا اختنا شيكو اون لاين ومدام هدى رحمة الله عليهم يارب
.
بقيتوا ناس غالين عليا اوى ولازم اطمن عليكم من مدوناتكم حتى من غير ما اعلق ، وبحزن جدا لما يرجى لأى حد بعد الشر اى مكروه او حتى يسيب مدونته ويغيب
.
كنت ببقى فى قمة السعادة لما ادخل مدونة لأول مرة وابص ع العداد فى البروفايل الاقي رقم واحد واكيد الواحد ده انا فبكون اول واحدة اشوف المدونة .. بدخل وابارك وببقى فى قمة السعادة ، ولما حد عايز يدخل عالم التدوين واحاول اساعده فى البداية وبعدين الاقي المدونة بقيت مشهورة جدا ما شاء الله ساعتها فرحتى بتبقى لاى توصف بجد
.
عايزة اشكركم كلكم من قلبى بجد استحملتونى كتييييييييييير
.. جميل أوى لما تحس ان فى ناس مستعدة تسمعك من غير ملل واول ماتغيب يسألوا عليك ويدعولك من قلبهم بجد.. كل رأي او تشجيع او نقد كان بيفيدنى جامد جدا ياجماعة حتى لما بكون مخنوقة بلاقيكم بتدعولى .. كمان عايزة اشكر كل حد ساعدنى فى انى اخلى مدونة انسانة كدة .. بجد من سنة قبل مادخل عالم التدوين كان فى حاجات كتيرة جداااااا معرفهاش وبعد سنة لازم اعترف بفضل الناس دى عليا ربنا يكرمكم يارب
.
وعايزة كمان اعتذرلكم على البوستات الطويلة اللى كتير بضايق البعض .. بعتذرلكم ومعلش حاولوا تستحملونى ببقى عايزة افضفض ومبلاقيش حد افضفضله غير هنا ، كمان بتعذرلكم على لون الخفية الاسود ..معلش بقا كيفي كدة .. وبعتذر كمان على عدم الرد على التعليقات انا اسفة بجد .. وعذرى هو انى دايما مع بنت اختى وبكتب البوستات نفسها بطلوع الروح .. عايزة اعتذر كمان لانى حد ضايقته منى بأي شكل من الأشكال بالله عليك تسامحنى
.
مرت سنة وانا بينكم انتوا بس اللى بتقرولي ولسة ولا فرد من افراد اسرتى مهتم يقرالي .. بس مش مشكلة انا بحكيلهم ع اللى بكتبه واصدعهم بيه بردو ، فى الاخر عايزة اشكر إنسانة .. المدونة اللى سمعتنى واستحملتنى واديتنى كتييييييييييير أوى .. اللى لما اكون زهقانة افتح الأرشيف بتاعها واتفرج على نفسى على مدار الايام والشهور حسيت بايه وازاى حزنت وازاى ربنا فك كربى ورجعت فرحت من تانى ، مراية مش بس بتجيب شكلك لأ دى كمان بتجيب ملامح من عمرك ومن ايامك اللى بتعدى عليك .. إنسانة انتى يمكن ماتكونيش احسن مدونة ولا حاجة بس بحبك عشان انتى بتاعتى وبشوف فيكى نفسى .. الحمد لله
.
فى الختام عايزة اقولكم كل سنة وانتوا غاليين عليا اوى كدة وكل سنة وانتوا منورين إنسانة وقلت وحفضل اقول على طول مدونة إنسانة لو اعتبرنها مدونة كويسة تبقى كويسة وحلوة بزوارها .. بجد ربنا يجازيكم كل خير يارب
.
ملحوظة متكمكزة شوية : اى حد عنده اى نقد او اى اقتراح او اى حاجة عايز يقولها عن المدونة او اى حاجة فى التلاجة عايز ياكلها فى المدونة بردو اهلا وسهلا ويا مرحب يا مرحب وهيه هيه هههههه وكاميكاز فى هذه المناسبة الهامة جدا بيضرب طلقتين فى الهوا البلوجرى " طاخ طاخ " ، وسمعنى احلى سلام سيد الحبايب يا ضانايا انت .. تيرا را را .. وزغرطى ياللى اسمك انسانة لولولولولولولولىىىىىىىىىىى

88 comments:

  1. الف الف مبروك
    و تجربة المدونات دى تجربة عجيبة او فريدة
    فيه ناس بتعملها لمجرد التقليد
    و فيه ناس بتعملها علشان عندهم اللى يكتبوه
    و فيه ناس بتعملها علشان ينشروا افكارهم من خلالها و منها طبعا الافكار اللى مش و لا بد
    و من المدونات اللى قلتيها حضرتك كتير منها اقبح من الشارع
    و مدونتك جد متميزة
    ربنا يوفقك

    ReplyDelete
  2. أنا ما عنديش نقد غير إنك تكتفي بهذا القدر وترحمي القراء وتقفلي بقى المدونة دي

    هههههههههههه

    أنا من رأيي إنك تفتحي مدونة مخصوصة عن مغامرات شارع فيصل العجيب .. هأشارك فيها جامد رغم إني زيارتي للشارع العظيم ده مش بتبقى كبيرة

    كل سنة وإنتي طيبة

    ReplyDelete
  3. كل سنة وانتي طيبة يا إنسانة

    وان شاء الله تتوالى السنين وانتي في أحسن حال

    وان شاء الله السنة الجاية تكوني حققتي أحلامك كلها

    مدونة جميلة جداً بجد

    وربنا يخليكي لعالم التدوين وتضيفيله كمان

    ReplyDelete
  4. so nice
    i read it all
    u in som magician way
    remind all of us with first day we r in such fancy world
    so spontonous
    so simple
    ur own words reach heart directly
    hope to be good
    as well as ur kamikaz
    saluta
    ur blog is so good
    i like loooong story &poems
    keep going

    ReplyDelete
  5. كل عام وأنت إنسانة مدونة رائعة

    ReplyDelete
  6. كل سنه وانتي طيبه ومدونتك طيبه
    وعقبال 100 سنه تدوين

    ReplyDelete
  7. ايه دة انا اكبر منك باسبوع بس
    كل سنه وانت بالف خير وبجد الحمد لله انك دخلتى التدوين علشان اتعرف عليك واعرف انسانه جميله زيك
    يارب المدونه تشهد فرحك وزواجك واولادك
    ويارب تفضل مفتوحه كدة على طول لميه سنه لقدام
    بجد انا بحب طريقه تفكيرك ودمك الخفيف فى الكتابه
    وانا استفدت منك كتير قوى
    ربنا يكرمك كمان وكمان اللهم امين يارب العالمين

    ReplyDelete
  8. كل سنة وانسانة طيبة

    بما انه تعليق مفتوح

    مش ينفع تغيرى اللون الاسود عشان الانسانة

    سلاموز

    ReplyDelete
  9. هييييييييييييه
    هييييييييييييييييه

    كل سنة و إنسانة بخير
    كل سنة و إنتي جميلة
    و راقية و متواضعه
    كل سنة و انتي بسمه
    تترسم علي الوشوش
    كل سنة و إنتي وسام
    مجرد رد يرفعنا لفوق
    كل سنة و إنتي ياسمينه
    نقاء و صفاء يدوم
    كل سنة و إنتي معانا
    بفرحك و طرحك
    حتي جرحك
    و هندعي في كل ركعه
    الله يحفظ هالطلة
    الله يحفظ هالطلة

    أحبك في الله
    و لله

    :)

    ReplyDelete
  10. انسانه ( استاذتى العزيزه شكرا ) اولا كل سنه وانتى والمدونه بتعتك بخير تعيشى وتهرتلى على المدونه وتصدعى المدونين ثانيا اذا كان الشى بالشى يذكر
    فيمكن ناس كتير متعرفش انى لما قررت اعمل المدونه بتعتى مكنتش اعرف حاجه عن البلوجات غير الى كان بيتنشر عنها فى الدستور وصيت واحد صحبى عمل ليه الاشتراك او الاكونت بالمعنى الادق والباقى فى موضوع التدوين بكل صوره والى فادنى بعد ربنا فى البلوج من اوله لاخره انتى فبمناسبه عيد البلوج بتاعك
    بقولك شكرا ده فى بدايه الانشاء
    وشكرا تانى لانك كنتى الى وقفتى جنبى بعد التهكير على البلوج القديم ورجعتى ليه الشكل بتاع البلوج بتاعى
    فشكرا مره اخرى وليست اخيره

    ReplyDelete
  11. :)
    يارب 100 سنة وانتي انسانة
    اول مرة شوفت المدونة كنتي منزلة بوست بأسم " شفتوني لما هيست " وكان ظريف بعدها في بوست علق معايا اوي خلاني اتابع المدونة علي طول كان " كلمة شاب مطحون "
    رخم انه كان بيسط اوي ولكن واقعي وعميق جداً ..

    وفعلاً كان من المدونات اللي الواحدبحيب يتابعها حتى وان كنت مش بعلق دايماً ..بس فيها الجانب الطبيعي من حياة الواحد ودا اللي بيعجبني في مدونات مش كتير يعني من غير افورة وشعارات وحروب وهمية في الفضاء التدويني زي ما بتسمية ..

    شيماء وفاتها اثرت فيا رغم اني كنت مجرد متابع لمدونتها بس ان حد تكون متابع لافكارة وانفعلاته وخواطره يموت ..وتزعل عليه ..ربنا يرحمها

    متتنزليش عن أنسانيتك ..وخليكي أنسانة علي طول

    ReplyDelete
  12. ألف مبروك يا إنسانة و كل سنة و حضرتك طيبة

    ReplyDelete
  13. لانك من المدونات المحترمه
    ولانك تحترمي ما تقدميه وتقوليه
    فلكس كل التحيه
    وكل عام وانتي في تقدم واحتراف اكثر واكثر

    ReplyDelete
  14. ياحبيتي..كل سنة وانتي طيبة وكاميكاز طيب..وانا اقول سمعت الاسم ده فين قبل كدة..مكنش غريب على ودني

    المهم
    كل سنة وانتي دايما بتكتبي وبتبدعي..وكل سنة وانتي اجمل انسانة
    ويارب تشتغلي بقى علشان انافعلا تعبتلك
    وبجد بجد انتي لما بتغيبي بتوحشيني

    ReplyDelete
  15. كل سنة وانتي طيبه وبالف خير
    وعقبال السنه الميه ان شاء الله
    وتكون انسانه بخير
    انتي عارفه اني جديد في العالم التدويني
    وان لسه يا دوب متعرف قريب على مدونتك
    ويا دوب اول بوست اقراهولك كان عندما يدمن الكمبيوتر
    بس انسانه بالذات ليها معزة خاصة عندي
    يا رب دايما تكون بخير
    وكل سنة وانتي طيبة وانسانة طيبة

    ReplyDelete
  16. kol sana wenty ensana gameela zy manty :)

    ReplyDelete
  17. كل سنه والمدونه منوره ويارب ف تقدم دايما
    مدونتك بجد مدونه جميله جدا وانت كمان من الناس اللي بأعتز بيهم جدا لانك من اوائل الناس اللي زارتني ف بدايه مدونتي ولغايه دلوقت
    انا متشكر جدا لبلوجر انها عرفتنا بحد كويس جدا زيك
    وكويس قوي اني عرفت مين كاميكاز ده
    بصراحه مش كنت عارف ماهيته
    يعني تكوينه مش مرتبه
    هههههههههه
    عقبال لما تحتفلي بمرور عشر سنين

    ReplyDelete
  18. كل سنه وانت طيبه
    مجموعات التدوين دى زى الحياة
    منها الملتزم مرتبط ببعضه
    ومنها الغير اسوياء وهم مجموعه من النساء والرجال برضه اتفزعت منهم
    واتفزعت كمان من المدونات اللى بيتكلم فيها الناس بالفاظ سوقيه بشكل مريع
    ولا ادخل سوى المدونات النظيفه فقط
    هى كده الدنيا سواء عالم حقيقى او افتراضى

    ReplyDelete
  19. السلام عليكم
    وكل سنه تيجي احلى واحلى باذن الله
    عجباني مدونتك وان كنت مبعلقش لأن ساعات الوقت والظروف بتاخدنا
    وكتيييييييييير بتوه في العالم بتاعكو

    بس بجد انت انسانه بمعنى الكلمه
    ربنا يباركلك ويوفقك

    ReplyDelete
  20. هو برغم ان مواضيعك فعلا احيانا بتكون طويلة شوية
    بس صدقيني مفيهاش ملل خالص
    انا عن نفسي عمري ما مليت وانا بقرالك موضوع
    عندك تدفق رائع ف الكلام واسلوب جميل وجذاب

    ودي مش مجاملة والله دي الحقيقة فعلا
    كل سنة ومدونتك طيبة وانتي دايما متألقة
    وربنا يجعل كل حرف وكل فكرة كتبتيهم في ميزان حسناتك

    وللأمام دائما بإذن الله

    ReplyDelete
  21. انسانة
    اولا كل سنة وانتي طيبة
    ثانيا
    انتي من اجمل الناس اللي قابلتهم في مجال التدوين
    ومن الناس اللي بعمل حسابهم و انا بدون
    و من الناس اللي تعليقهم في مدوناتي بيملاني فخر و شرف
    بجد انتي انسانة فعلا

    انسانة=انسانة

    كل سنة وانتي طيبة
    و عقبال مليون سنة و زي ما رفقة عمر قالت لك بالظبط

    انتي دايما منوراني
    :)))

    ReplyDelete
  22. كل سنة و انت طيبة
    كل سنة وانسانة طيبة
    وكاميكاز كمان علشان ميزعلش
    وعقبال البوست رقم 2093847657439

    تحياتي

    ReplyDelete
  23. مدونتك فعلا تلفت الإنتباه من أسلوب الكتابة ومن واقعية العرض ... والمواضيع كمان

    ReplyDelete
  24. كل عام وانت ومدونتك لله اقرب

    ويؤسفنى حقاً تركيز الأعلام على الصنف الذى نفرك من المدونات

    ReplyDelete
  25. السلام عليكم
    موضوع المدونات موضوع غريب فعلا انا لوا مرة سمعت عنه
    قولت ده اكيد مجرد حاجة ظهرت كده والناس بتجري وراها زي اي موضه مثلا الناس بتحب تعملها وخلاص وبعد كده تنتهي وخلاص
    بس لما قرات اكتر عن التدونين وفهمت بيتكلم عن ايه لاقيته حاجة كويسه فعلا
    علي الرغم من انه ممكن يكون في تجاوزات في الكلامو والالفاظ لمن ده الطبيعي زي مافي الكويس في الوحش
    انا لسه جديد في عالم التدوين يعني لسه بقول يا هادي يارب وحاسس اني ممكن اقدم حاجات كويسه
    انا زيك من زمان بحب الخواطر ولقصص ومكنتش بلاقي حد يمكن يقراها
    لكن دلوقتي بكتب وبلاقي رد واقول الحمد لله
    تحياتي

    ReplyDelete
  26. انا سعيده جدا بانى من قراء
    مدونتك الجميله من اول اسمها معبر
    بالنسبه لى عن انسانه طيبه لما بحب اصف
    حد بالحنيه بقول انسان اوى
    كتابتك كلها مواضعها جميله ودمها خفيف
    وان حسيت نفس شعورك اول ماكتبت كان
    متهيألى ان ماحدش حايقرأ بس كأنى بفضفض
    وبكتب خواطرى بس لمازرت المدونات
    جبروا بخاطرى وبيعلقوا ولقيتها وسيله
    جميله للمعرفه ومسليه ومفيده
    واستفت كتير وشفت ناس موهوبه ومش
    مجامله انتى منهم
    كل سنه وانت طيبه ومتألقه واشوف
    لك مقالات فى جرائد شهيره
    انتى جديره بكده
    وانا كمان عجبنى اوى اسم كميكاز وضحكنى
    كل سنه وانت طيبه وسعيده
    سلااااام

    ReplyDelete
  27. ما قلنا كل سنة وانتي طيبة .. هي سيرة بقا ... دا إيه دا

    حلوة قوي الصورة اللي فوق دي وذوقها عالي .. تسلم الإيد اللي عملتها

    ReplyDelete
  28. كل سنة وانتي بيننا ومعانا وتفضلي تكتبي كدة لحد ميبقو 1000 تدوينة
    وسلميلي علي كاميكاز..

    ReplyDelete
  29. بجد انا بحبك جدا جدا
    كل اما اكون مضايقه اقول اروح لانسانه شويه اقرا خفه دمها وروحها
    الحلوة
    انا اول مرة عرفت المدونه من بوست مبنى الجحيم وبجد كانت بوست جامد وعمل ضجه كبيرة والكليه اتقلبت وعملنا احتجاج يومها ومن وقتها وانا بتابعك على طول
    ربنا يكرمك ان شاء الله ويوفقك ويخليك سولى

    بس عايزة اقولك اننا هنمتحن فى نفس المبنى تانى السنه دى
    كأننا كنا بنكلم روحنا
    لا حياه لمن تنادى
    كل سنه وانسانه حلوة وطيبه
    good luck ya yasso:)

    ReplyDelete
  30. انا برضه من محبي كاميكاز قوييييييييي


    بقولك ايه
    كل سنه و انتي طيبه

    زيزي

    ReplyDelete
  31. كل سنة وانتى طيبة وعقبال
    1000000000000 سنة تدوين

    انا لسة جديدة نوفى بس بحبك جدا وبحب تدوينك مووووووووووووت

    يارب فى إزدهار دائم

    ReplyDelete
  32. السلام عليكم
    كل سنه وانتي طيبة
    واحنا كمان سعداء اننا اصدقائك
    واننا بنقرالك
    وربنا يوفقك يا رب

    وانا شخصيا مفيش نقد الا الغياب والتأخرات بس

    تحياتي

    ReplyDelete
  33. قبل ما اكلم حاخد من التلاجة تفحاية
    :))))))))))))

    أنا سعيدة بالبوست ده لانه عرفنى بحاجات ما كنتش اعرفها عنك لانى لسة عرفاكى من قريب و للأسف لأنشغالى ما قرتش بوستاتك القديمة ، و أنا ما انسلكيش ابدا موقفك معيا لما قلت انى حسيب التدوين انتى فعلا اسم على مسمى و اضح من كلامك عن اصدقاءك المدونين و حلو موضوع كاميكاز ده دا انتى مبدعة بأة ... بس قوليلى فى ودنى من غير ما حد يسمع الكلمة الى قلهالك باباكى

    أن شاء الله دايما نسمعك فى الأذاعة و نشوفك فى التليفزيون منورة ، بس أبقى أعرفينا

    انا ليا ملحوطة واحدة بس التلاجة ما بتسقعش الفاكهة كويس :)))))))))

    ReplyDelete
  34. كل سنة وانتي ومدونتك وكاميكاز بخير ياياسمينة

    وتفضلي منورة الفضاء البلوجري وحياتنا علي طول ياااااااااااارب

    ReplyDelete
  35. مش انسانة بس اللي هاتستحملك

    ممكن احنا كمان

    لكن عاوزين نشوف جديد ومفيد على طول

    عرض جميل لسنة أولى تدوين

    واسلوب رايق لداخلك

    دمت بكل الخير

    ReplyDelete
  36. كل سنة وانتى طيبة

    وكل سنة وانتى انسانة

    وكل سنة وانتى وكمكوووز بخييير

    ودايما ممتعانا ببلوجك الجميل الراقى


    :)

    ReplyDelete
  37. كل سنة وانتي طيبة يا انسانة

    ومنتظرين الجديد من الابداع

    دمت بكل الخير

    ReplyDelete
  38. بما أنك بتقولى اللى عايز يقول نقد وكدة .. ابقى هاتى تلاجة كبيرة شوية بدل التلاجة النونو دى .. والا الناس اللى جاية متأخر مالهاش نصيب .. دى حاجة .. الحاجة التانية , لازم تعرفى أن كوكو أو كاميكاز دة خدمك كتير فى المدونة ؛ فلا أقل يعنى من أنه كان يكتب كلمتين فى البوست دة .. الحاجة الاخيرة ممنوع ضرب النار فى سماء المدونات

    فيه بقة حاجة مهمة جدا كنت عايز أقولها .. ايه هيا .. ايه هيا .. ايوة افتكرت .. كل سنة والتدوين جميل وإنسانى بالمدونات اللى زى مدونتك .. وكل سنة ومدونتك تصدح بأجمل أغاريد الانسانية الرقيقة العذبة

    السنة الجاية اجى الاقى تلاجة تانية غير دى

    ReplyDelete
  39. ____0000000000______0000000000_____
    __000________000__000________000___
    _000___________0000___________000__
    000_____________00_____________000_
    000________Happy New Year______000_
    000_____________FOR____________000_
    _000____________ALL___________000__
    __000________________________000___
    ___000___Ahmed Al-Sabbagh___000____
    _____000__________________000______
    _______000______________000________
    _________000__________000__________
    ____________000____000_____________
    ______________00__00_______________
    ________________00_________________
    ________________ 0 ________________

    ReplyDelete
  40. اخيرا عرفت مين كاميكاز دة

    كل سنة وانتي طيبة

    بجد فضفضة جميلة في البوست دة

    حسيت انها ملخص صغير لحجات كتير عنك وعن المدونة

    ReplyDelete
  41. كل سنة وانتى انسانة ومنورانا ومصداعنا وكل حاجة قشطة يعنى ههههههههه ربنا يكرمك تستاهلى كل خير

    ReplyDelete
  42. ياااااااااه
    إيه امدونة الجامدة دي
    تؤ تؤ ..
    نسيت أسلم
    السلام عليكم ورحمة الله
    بجد أنا زعلان لاني أول مرة اكتشف المدونة دي
    عالعموم ما خسرتش كتير
    لالا خسرت طبعا

    بجد كلام جميل
    كلام معقول
    ما أقدرش اقول حاجة عنه
    ..
    جزاكم الله خيرا
    دي أول زيارة ومش هتكون آخر زيارة إن شاء الله

    سلامي واحترامي

    ReplyDelete
  43. ____0000000000______0000000000_____
    __000________000__000________000___
    _000___________0000___________000__
    000_____________00_____________000_
    000____________________________000_
    000________Happy New Year______000_
    _000____________FOR___________000__
    __000___________ALL__________000___
    ___000_____________________000____
    _____000__________________000______
    _______000______________000________
    _________000__________000__________
    ____________000____000_____________
    ______________00__00_______________
    ________________00_________________
    ________________ 0 ________________

    ReplyDelete
  44. مبروك علي عيد ميلاد المدونه
    و عقبال الف سنه
    و عيد ميلاد سعيد
    و اخيرا اشكرك علي الكاميكاز اللي حيرني و فشلت في معرفة معناها للدرجه اللي جعلتني ابحث عن معناها علي النت و عرفتها
    و كنت فاكرك مطنشاني في الاجابه
    تحياتي

    ReplyDelete
  45. كل سنة و انت طيبة بمناسبة مرور عام علي بدئك التدوين و بمناسبة العام الجديد

    و كل سنة و كاميكاز بخير

    عقبال 198 سنة تدوين
    و انت دايما انسانة رقيقة و راقية و مبدعة - ده زي مدرستي نظيفة جميلة و متطورة-ههه
    :P

    ReplyDelete
  46. السلام عليكم ورحمة الله وبركاته

    كل سنةو انت طيبه يا يويو ويارب كده عقبال ميت سنة تدوين
    ربنا يخلينا ليكي ومايحرمكيش مننا ولا من كاميكاز ابدا
    هههههههههههه
    ابقي اتوصي بيه شويه وزوديله المرتب اصله يا عيني بيتعب اوي

    مره علي الفيس بوك كان فيه اسئله عن انواع الشراب والطعام المفضلين وكان من ضمن انواع الشراب الكاميكاز "اه والله "افتكرتك علي طول
    هادور علي اللينك وابعتهولك

    ReplyDelete
  47. السلام عليكم ورحمة الله وبركاته
    ...........................
    التعليقات الى قبلى قالت كل حاجة ممكن تتقال ...
    كل سنة وانتى طيبة وعام جديد سعيد عليكى وعلى كل المسلمين

    أجمل شىء انك فعلا انسانة :)

    تحياتى

    ReplyDelete
  48. يا ستى كل سنة و انت طيبة و عقبال القرن التدوينى الأول

    اللهم اجعل كلماتك كلها نورا

    ReplyDelete
  49. كل عام والفرح يشعل شموعة بدنيتك...... كل عام والهنا تزهر ورودة ببسمتك ......... كل سنة وانتى طيبة .وياريت تبقى تزورينى فى دنيتى الجميلة

    ReplyDelete
  50. كل سنه وانتى طيبه ويارب تكون سنه سعيده على الكل
    تحياتى

    ReplyDelete
  51. هابى نيو يير ... وحاجات حلوة وطراطير .... وجاتوه وفطير....والأهلي خطير ..... والريس لسه قدامه كتير

    ReplyDelete
  52. Happy new year, wish for u the best isa :)

    ReplyDelete
  53. كل سنة والمدونة مفتوحة وبتسعدنا
    كل سنة وانتى طيبة السنة الجديدة

    ReplyDelete
  54. ايه الكلام الجامد دا

    واحلى حاجة اننا اخيراااا عرفنا سر كاميكاز.. اهلين كاميكو انا سارة وبقلك كل سنة وانت طيب قبل انسانة:P

    وعلى فكرة لون الخلفية الاسود مع الكتابة بالابيض بيدى بريق كدا واضاءة جميلة

    يعنى كله تمام اهو يافندم

    وربنا دايما يسعدك ويوفقك وتكونى معانا ومنورانا دايمااا


    __??_??
    _??___??
    _??___??_________????
    _??___??_______??___???? H
    _??__??_______?___??___??
    __??__?______?__??__???__?? A
    ___??__?____?__??_____??__?_____
    ____??_??__??_??________??
    ____??___??__??
    ___?___________? P
    __?_____________?
    _?____?_____?____? P
    _?____/___@__\\___?
    _?____\\__/?\\__/___? Y
    ___?_____W_____?
    _____??_____??
    _______????? NEW
    YEAR 2008

    ReplyDelete
  55. أول مره ادخل هنا
    الاقي البيان الختامي لسنه 2007
    ومنه ادركت ان فاتني كتير
    لكن الي جي اجمل ان شاء الله
    كل سنه وانت طيبه
    كل سنه وكلنا طيبين
    حقيقي اجمل ما في الانترنت التواصل
    وانه ربط شباب مصر ببعضه
    بدل الياس اللي اتمكن من الواحد لما حس ان كل الشباب و البنات زي اللي بيشوفهم في الشارع يامخدرين ياعريانين
    الحمد لله فيه ناس لسه محترمه ومثقفه
    يعني فيه امل

    ReplyDelete
  56. عزيزتى
    كل سنة وانتى طيبة وبخير ويا رب المدونة تكبر وتكبر بس متعجزش تفضل شباب دايمن بافكارك وشقاوتك
    سلام

    ReplyDelete
  57. كل سنة و انتي طيبة يا ياسمين
    كل سنة و مدونتك في احسن حال
    طبعا انسانة دي مش اي مدونة و السلام
    على الاقل بالنسبة ليا
    طبعا انسانة دي
    هي مصدر الهامي لمدونتي موجة
    فموجة خرجت من رحم انسانة
    من غير مبالغة
    فانسانة كانت مرشدي في عالم التدوين
    من خلالها تعرفت على هذا العالم الغامض
    و ولجت اليه بسهولة و يسر
    فلقد أخذت بيدي حتى بدات اسير فيه على قدمين ثابتتين
    شكرا لانسانة
    خالص تحياتي
    أحمد توفيق

    ReplyDelete
  58. كل سنة وانت طيبة
    وعقبال اربعتاشر سنة



    هابي نيو يير

    ReplyDelete
  59. حلو اوييي البلوج والاحلى البوست الجميل ده و بزات ازاي عرفت المداونات و كمان حلو لاني بتفرج مع بابا على العاشرة مساء انا كمان وانا اسفة عشان مكتشفتش البلوج ده من زمان و انا زعلانة اوي عشان فتتني حجات كتير

    بجد مش مجاملة و خلاس البلوج حلو اوييي

    كل سنة وانت طيبة

    يا احلى انسانة

    ReplyDelete
  60. ما شاء الله

    كل عام وأنت بخير

    أسعدني متابعة مدونتك

    :)

    ReplyDelete
  61. السلام عليكم

    ازيك ياانسانة ياقمر
    كل سنة ومدونتك بخير وطيبة يااااااااارب

    عيد ميلاد مدونتك مع عيد ميلاد مدونتى تقريبا نفس التوقيت
    بيتنا الجميل اللى عشنا فيه احلى واجمل الايام
    اشتكينا للمدونة كتيروسمعتنا وقولنا كل اللى بنحس بيه من فرح وحزن ومشاكل ومواضيع كتير وبرضه فى بيتنا المدونة

    كل سنة وانتى ومدونتك بألف خير ياااااااااارب

    ReplyDelete
  62. يمكن أكون ضيف جديد في هذا العالم الغريب .. قتصادفت بمدونتك الرائعه وقرأت الموضوع الرائع بقلبي فوضّح مكانة المدونه التى هي سجلا لكل حاله تقررين البوح عنها بالكتابه وربما تنسينها وتسترجعين الحاله حين تقرأين ما دونته يداك ..

    فكم هي رائعه هذه الوسيله لنشر مالا نستطيع نشره ..
    تحياتي لمدونتك الجميله ولتدويناتك الرائعه ..
    وأتمنى أن تكوني أول معلق على مدونتي وقصيدتي ..
    جل تحياتي ..
    http://ma7laky-yabaladna.blogspot.com/

    ReplyDelete
  63. صراحة

    دى أول مرة أدخل مدونتك

    بعد سنة من تدوينك

    داخل متأخر يعنى

    حقيقى انبسطت بالروح اللى انتى عايشة بيها

    و الأسرة اللى المدونين مكونينها

    بل مجتمع كامل مرتبط ببعضه

    ------------------

    هى سنة من عمر انسانة ...

    تعنى الكثير بالنسبة للبشر السنة دى

    لأنها واحد على 80 أو على 70 أو على 60

    و يمكن واحد على 50 أو 40 أو 30

    أو حتى واحد على ....... 25 ؟؟؟

    من ايه ؟؟

    من حياته طبعا

    أووووووووو

    الله أعلم

    -------------

    و لأن عمر الانسان قليل جدا

    فالسنة تعنى بالنسبة له شئ قيم جدا

    لذلك

    و نحن نتذكر ما قد تم منا فى السنة

    يجب أن نقيم هذه الأعمال

    و نصنفها .. أيها أرضى الله و أيها أسخطه

    و نقرر فى المستقبل ما الذى سنستمر عليه
    و مال الذى سنتخلى عنه

    أسأل الله أن يجعل اعمالنا كلها فى رضاه

    ------------

    و يا ستى تعيشى و تفتكرى


    جزاكم الله خيرا


    د.حمــــــاس

    ReplyDelete
  64. ازيك يا ياسمين
    كل سنة وانتى طيبة وانت إنسانة دايما متتغيريش بالظروف والأحوال ولا تهزك أى هزات ابدا
    عمرى ما انسى يا ياسمين وانتى قاعدة تحاولى تشرحيلى ازاى أعمل لينكات عندى فى المدونة وأنا كاننى واخد جايزة نوبل فى عدم الفهم.. بس الحمد لله قدرتى تساعدينى وعملتها رغم إنى قلت ف سرى مش هاخليلك جميلة عليا فرحت حذفتها بعد شوية
    ههههههه
    ربنا يكرمك يا إنسانة.. ويويدك من نعيمه وفضله
    وكل سنة وانتى طيبة

    ReplyDelete
  65. انا شفت مداونات ولاهي دي احسن مداونة شفتها من المداونات التانية

    ReplyDelete
  66. أنسانة وبجد أنسانة , بنت طبيعية من بنات مصر الى كل ما الواحد يعرفهم أكتر يلاقى الجمال جواهم أكتر بكتير مما يتصور و هما عاملين زى منجم الدهب , كل ما تحفر فى الصخر أكتر تطلع دهب أكتر , انا لسة مدرستش مدونتك بس صدقينى من أول ما أبتديت أقراها وأنا حاسس بأن واحدة صديقة قاعدة تحكى لى فى ودنى بصوت رقيق عن همسات خواطرها لما ادرس كدونتك كويس حبقى أعلقك على الى بتكتبية بس لية ملحوظة الاخطاء الهجائية ممكن نتجنبها .واهلا بيكى وأنا على طول عايز أسمعك يلا أرغى وطلعى كل الى جواكى ولا يهمك سلام

    ReplyDelete
  67. ياااااه ع الذكريات لما تنور حياتنا وتدينا دفعة للامام
    بتبقى فعلا ايام جميلة

    كل سنة وانتي طيبة يا انسانة
    ودايما كده منورانا ومفضفضة معانا

    انا بجد بستمتتع جدا بمدونتك
    كل سنة وانتي طيبة
    محمد سمير

    ReplyDelete
  68. السلام عليكم
    الف مبروك على دخولك عالم المدونين
    ومدونتك حلوه
    وانا برضه لسه جديد فى العالم ده
    يشرفنى زيارتك لمدونتى المتواضعه
    الدعوه عامه يا جدعان
    وكما قال الشاعر
    لن تندموا

    ReplyDelete
  69. ياااااااااااااااه ده انا كان فاتنى كتير

    مدونتك جميلة و خفة دمك جميلة و الله
    و ربنا يحميكى دايما و يحقق أحلامك

    ياللا بقى قولى ( و إياكم ) !!!! ههههههه
    أطيب تحياتى ليكى

    ReplyDelete
  70. كل سنه وانتي طيبه يا ياسمين
    بجد فكرتيني ببدايه التدوين
    بدايه عالم بجد عرفنا فيه ناس بجد جميله
    ناس عاوزه تبقي احسن
    اول حد ساعدنا
    او حد ساعدناه
    اول مشكله قابلتنا واول شخصيه غبيه نلاقيها في العالم ده وتصرفنا ساعتها

    اه فاكر بوست مبني الجحيم
    كان اول مره اجي عندك المدونه تقريبا

    عقبال مليون سنه مع مدونتك
    وعقبال مليون فرحه معاها
    تحياتي يا انسانه

    ReplyDelete
  71. ياااااااااااااه

    عارفة .., انا مش متخيل ن كل اللى حصل ده كان فى سنة واحدة بس

    انا حاسس ان مدوناتنا موجودة من قبل ما احنا نتولد

    كل التفاصيل اللى بتحكيها محفورة جوانا بجد ومفيش حاجة اتنست

    كاميكاز العزيز ولعبه فى شعرى كل ما ادخل وتنطيطه فوق كتافى ومد ايده فى جيبى علشان ياخد العيدية

    كل سنة وهوا طيب

    وكل سنة وانتى طيبة

    ويا رب دايما مدوناتنا موجودة

    ويا رب دايما اصحاب

    :)

    ReplyDelete
  72. كل عام وكل لحظة وانت بألف خير
    وعقبال ما نحتفل بالعيد المائة للمدونة
    لقد استمتعت جدا بقراءة الكثير من بوستاتك الهادفة والانسانية والدسمة
    الى الأمام دائما ووفقك الله وسدد خطاكى

    خالص مودتى اختى العزيزة

    ReplyDelete
  73. مبروك عليكي وعلينا سنة اولى تدوين
    مدونة اكتر من روعة
    تحياتي واحتراماتي

    ReplyDelete
  74. مدونتك جميلة فعلا واحنا عندك عشان اكيد عجبانا مش مجرد مجاملة ليكى
    تحياتى

    ReplyDelete
  75. ياااااااااااااااااه كل ده كاتبااه فى البوست

    حقك

    :p

    كل سنة وانسانه طيبة وبتدون كمان وكمان

    صحيح..

    شفتى مبنى الجحيم لما بقى مبنى الجنة دلوقتى

    ههههههههههههههههههههههههههههه

    ReplyDelete
  76. كل سنة وانتى طيبة يا جميل
    وعقبال ميت سنة تدوين

    التدوين دا من احلى الحاجات اللى حصلت فى تاريخ الانسانية

    انا عرفته بالصدفة من السيرش ومبقتش مصدقة فكرة ان الناس هتتفاعل معايا ير لما شفت التعليقات بعنيا ولقيت ناس بتحب بعض بجد

    انا عارفة مدونتك من زمان

    حضرتك معاكى البوست التحفة بتاع التخرج .. والبوست الجميل بتاع فواتير التليفون
    مش بيروحوا من بالى البوستن دول خالص

    تحياتى وكل سنة وانتى منورة مدونتك وملياها شقاوة ولحظات جميلة

    :)

    ReplyDelete
  77. مبروك يا إنسانه و بإذن اله دايما منوره التدوين
    تحياتي

    ReplyDelete
  78. تحددالافتتاح لدار الكتب الخاصه بي يوم الخميس القادم - 10 يناير - الساعة 6 مساءا في مكتبه البلد , ندعو الجميع لكي نقص سوياً شريط افتتاح الموقع ونطلق شراره انطلاقه نحو خدمه كل المثقفين والمهتمين بالقراءة

    العنوان / مكتبه البلد - ميدان التحرير بوسط البلد - 31 ش محمد محمود أمام الجامعة الأمريكيه

    تليفون مكتبه البلد / 27922768

    نتمني منكم أن تشاركونا هذه اللحظات والتي لن تنجح إلا بوجودكم

    ReplyDelete
  79. عزيزي صاحب المدونة
    عزيزتي صاحبة المدونة
    ========================
    نتشرف بدعوتك لافتتاح
    دار الكتب
    هي حلم صاحب البوابة الذي تحقق
    طريقة مبتكرة لتوثيق الكتب العربية و نشرها بين الناس بكل سهولة و يسر والدمج بين دور النشر المختلفة لسهولة البحث لاي قارىءوالنشر لاي كاتب
    الافتتاح يوم الخميس 10-1-2008
    في مكتبة البلد 31 شارع محمد محمود امام الجامعة الامريكية
    الساعة السادسة مساءا
    يلا نشارك مصطفى فرحته بتحقيق الحلم

    ReplyDelete
  80. أحم ..أحم
    يارب ياساتر ..أنتم هنا يا أهل الدار
    الحمد لله مفيش حد خالص .. أصل الحقيقة أنا مكسوف خالص مالص.. وحاسس أني في تمن هدومي من الكسوف
    عارف حتقولي أنت فين ..وغبت لية من غير أسباب
    وعارف أني حكدب وحقول غصب عني هيييي والله الدنيا مشغال
    لكن بصراحة أنا مش عايز أكدب
    حتسأليني كنت فين وغبت لية حقولك مش عارف أنا نفسي بسأل نفسي السؤال ده ومش لاقي أجابة
    بس الغريبة أني مش بس بطلت أكتب كمان بطلت أتابع دأنا مدخلتش مدونتي الشخصية من أربع شهور
    تقدري تقولي أنشغال تقدري تقولي سدة نفس بعيد عنك أو تقدري تقولي أن الحبر قد جف من أقلامي وهرب الفكر من عقلي
    تقدري تقولي أني مكتئب أكتر من اللازم أو مشغول أكتر من اللازم أو ممتلأ أكتر من اللازم
    المهم أني هنا لأني عرفت أنك سألتي عني وأنا إنسان كثير العيوب لكن ليس من بينها نسيان الأصدقاء
    علي العموم ألف ألف ألف مبروك يا أنسانة هانم
    وبعوده الأيام
    الإنسان اللذي أخيرا طابق أسمه كلامة
    سكتم بكتم

    ReplyDelete
  81. كل سنه و انتي طيبه انسانه جميله رقيقه
    علي الدوام
    تحياتي

    ReplyDelete
  82. السلام عليكم

    كل سنة و انت طيبة
    و يارب التوفيق دايما
    كيمكاز طلع وهم
    لاااااااااااااااااااااا

    بس أرحمينا من البوستات الطويلة دي
    :)
    بجد فخور إني أتشرفت بمعرفتك

    ReplyDelete
  83. انا عارف انها متأخرة
    بس حقيقي مبروك عليكي سنة من التدوين
    ومبروك علينا مدونة رائعة زيك
    حقيقي من المدونات الجميلة
    وقريبة من الناس

    ReplyDelete
  84. تصدقي
    أنا حسيت و أنا بأقرا لك إنك انسانة رقيقة بجد
    انسانة بمعنى الكلمة
    أنا ما لفيتش في المدونة بتاعتك لسه
    بس ان شاء الله متابع الجديد دايماً
    :)

    ReplyDelete

الكلمـة نـور .. وبعـض الكلمـات قبـور