Monday, May 03, 2010

182.621099 يوم


182.621099 هما يوم
6 شهور 182.621099= يوم

بناءاً على كلام الأخ العزيز جوجل

النهاردة عدى 6 شهور بالظبط بعد الولادة

مروا كأنهم 6 أيام مش 6 شهور

كنت قرأت أثناء فترة الحمل عن إكتئاب الحمل

وإكتئاب ما بعد الحمل

وعرفت إن الإكتئاب ده ممكن يصيب أي واحدة

حتى لو كان طفلها حي وسليم وأمور وإسمه ميدو

فما بالكم بقى لو الطفل أصلا مش موجود

أكيد الموضوع بيفرق كتير

انا متأكدة إني كنت بعاني من أعراض إكتئاب ما بعد الحمل

حاولت أخرج نفسي منها بأقصى جهدي

والحمد لله ربنا ساعدني كتير

من الأعراض اللي لاحظتها عليا خلال الفترة دي

هي فقدان الرغبة فى أي شئ

أي شئ من مباهج الحياة بيتساوي بعدمه

لاحظت إني بقيت عصبية وأقل حاجة ممكن تخرجني عن شعوري

بقى ينطبق عليا بجد مصطلح الزوجة النكدية عن جدارة

حاجة غريبة كمان لاحظتها إن أكلى بقى طعمه مش حلو زي الأول

كنت ببقى تعبانة وفى أواخر شهور الحمل ومش قادرة أقف

ومع ذلك أكلي طعمه حلو والكل معجب بيه

بعد الولادة بكام شهر كان فعلا بايظ خالص

أحسن تصرف تاخده تجاهه إنك ماتجيش جمبه ولا تبصله

مع تكرار الإخفاقات المطبخية جاتلي عقدة من دخول المطبخ من أساسه

أسهل الأطباق فى التاريخ بقيت بفشل فيها

عمركوا سمعتوا عن حد مايعرفش يعمل مكرونة؟

*****

كنت كل ما أشوف صحابي على الفيس بوك متصورين

وأطفالهم فى أحضانهم احس بحاجة جوايا بتوجعني

بقيت أتحاشى أشوف أي أطفال فى الصور أو فى الحقيقة

لاحظت كمان عزلة إختيارية عملتها لنفسي

حاجة من جوايا تقولي إبعدي لحد ماينسوا

إبعدي عشان ماحدش يفكرك

إبعدي لحد ما ربنا يمن عليكي ويكرمك تاني

كنت بخاف من نظرات الناس والشفقة فى عيونهم

حاولت أقفل المدونة

وطبعا كاميكاز ذهب مع الريح

ولما كنت بكتب موضوع حلو ويجيلي عليه تعليقات كتير معجبة

أحس إن الإعجاب ده ماهو إلا شفقة مقنعة

المفاهيم كلها دخلت فى بعضها

الحلو مع الوحش فى لحظة واحدة ووقت واحد

إستسلام للأمر الواقع مع تمرد عليه

إتمردت على كل شئ

على الأكل والشرب والطبخ وشغل البيت والأدوية وزيارة الأطباء

حتى الحزن نفسه إتمردت عليه

وإنعدم إحساسي بالأطفال تماماً

لدرجة إنى وصلت لمرحلة إعتبرت إن البشر كبار وبس

مافيش حاجة إسمها أطفال خالص

كنت بصحى من النوم عشان الساعات تعدي وانام تاني بالليل

كان ناقص أربي دقني زي المكتئبين فى الأفلام

ههههههههههههههههههه

*****

حاولت أخرج نفسي من اللى انا فيه ده بشتى الطرق

بس كنت بحس إن لسة فى حاجة جوايا مش عارفة تهدى خالص

لحد ما ربنا أراد إني اشوف حلقة فى التليفزيون عن الموت والقبور

والمذيعة دخلت قبر بنفسها

والتربي اتكلم عن مشاهداته عن تحلل الجثث

والمغسلين اتكلموا عن علامات حسن وسؤ الخاتمة اللى شافوها

حسيت بحاجة جوايا كومت الدنيا دي وكرمشتها زي الورقة

ورميتها فى الهوا بعيد عني

من بعد اليوم ده وانا بقيت حد تاني

أهدى وأعقل وأصفى

فعلا الدنيا مش مستاهلة أي حاجة حتى الزعل

كله رايح

بقيت لما أبص لأي حد أبصله من زاوية إنه حيتكفن ويدفن فى يوم من الأيام

حتى أنا ، بقيت أبصلي على إني ذكرى مع الإيقاف المؤقت للتنفيذ

لحد ما أموت وتبدأ الذكرى دي في الحياة

بقيت أحاول على قد ما أقدر أسيب ذكرى كويسة مع كل الناس

وأغفرلهم كلهم حتى اللى أذاني وغلط فيا

انا مسمحاه عشان ربنا يسامحني ويرحمني

وبالله عليكم تسامحوني لو كنت زعلت حد منكم

*****

بعد الـ6 شهور دول حاسة إني أحسن

وبحمد ربنا على اللي حصل

حاجات كتيرة أوي جوايا إتغيرت للأحسن بفضل اللي حصل

قربت من ربنا أكتر

بقيت واقفة على أرض صلبة وعارفة انا عايزة إيه بالظبط

بقيت أقوى من الأول وقربت من حلمي أكتر وأكتر

اللي حصل ده خلاني أعمل إعادة إكتشاف لنفسي وأتعرف عليها من جديد

على قد ما كنت بزعل منها وعليها

على قد ما كنت بنبسط من محاولتها للخروج من الأزمة

*****

بس الشهادة لله والحق يتقال يا جدعان انا فاكرة الـ182 يوم دول كويس جداً

لكن باقي الفكة ( 621099) اللى أشار إليها الأخ جوجل دي

انا ماخدتش بالي منها خاااااالص

:D

18 comments:

  1. أهو ده كده بوست حلو وتستاهلي التصفيق عليه .. قمة التفاؤل والمقاوحة في الحياة .. إيجابية رائعة بكل المقاييس بغض النظر عن الأسباب والدوافع والحوادث


    خليكي على كده واحسن

    ReplyDelete
  2. بجد ربنا يوفقك يارب
    وادعيلي ان انا كمان اتغير من الجسد للاحسن لان انا بحاول اتغير كل يوم وابقي احسن من اليوم الي قبله

    ReplyDelete
  3. جميل جدا البوست

    بس مش بس ان الدنيا متستحقش ان احنا نضيعها فى حزن

    بس متعرفيش برضة حكمت ربنا فين

    السىء اللى انت فاكرة انة سىء ممكن يكون انقذك من حاجة اوحش

    على العموم ربنا يخليكى متفائلة دايما

    شكرا جدا

    ReplyDelete
  4. عارفة
    لما كنت بدخل فى حالات اكتئاب بسبب حاجة كنت عوزاها مثلا او اى نوع من انواع الابتلاءات
    كانت اول فكرة فى دماغى
    ان دة عقاب ربنا ليا
    وان ربنا كارهنى ومش راضى عنى
    وعاوز يعذبنى
    بس مرة قريت جملة عجبتنى ودخلت دماغى وكأنى اول مرة اعرفها
    ان ربنا بيعذب الكافر وبيبتلى المسلم
    يعنى حتى مهما بلغت ذنوبى عنان السماء
    واستغفارى واعمالى مش كافيين
    ربنا يبتلى العبد..لانه ببساطة عاوزة يدخل الجنة وبيحبه وبيرحمه
    حاجة كمان اتعلمتها ..ودى حاجة مش بتيجى بالساهل ابدا
    لاااازم نبكى عشانها ونتئذى ونتجرح ونبتلى بأشد الابتلاءات
    اننا نعرف ربنا
    اكتشفت ان معرفة ربنا وحبه ومعرفة اسماءه وصفاته
    بتيجى من المواقف والابتلاءات اللى الواحد بيتعرض ليها دايما فى حياتة
    وعارفة كمان
    لو معرفة ربنا لازم تيجى بالابتلاءات
    يبقى اهلا وسهلا بيها
    لانى حكسب احلى واجمل احساس ممكن المسلم يحسه
    وهو حب الله
    وحب الله غالى اوى..يبقى اكيد لازم تمنه يبقى غالى
    عارفة كمان
    الانسان كريم اوى عند ربنا
    وربنا عاوز يصفيه وينقيه زى الدهبب كدة ما بيتحط فى النار عشان يبقى نقى
    ربنا عاوز ينقينا من ذنوب القلوب اللى مش بناخد بالنا منها
    يبتلينا عشان ينقينا من الكبر والغرور
    يبتلينا عشان برفعنا درجات عنده
    يبتلينا عشان ينقينا من الحسد والحقد
    لو كل المميزات دى بتيجى من الابتلاءات
    يبقى الحمد لله ..على نعمة الابتلاء والألم
    احبكِ فى الله صدقا يا ياسمين

    ReplyDelete
  5. ايوه كده يا ياسو هو ده الكلام

    بس اهم حاجه الاكل اتظبط ولا لسه
    ..هههههههههه

    ReplyDelete
  6. :)

    المحنه التي لا تكسرني تقربني من الله

    وكنت سمعت كمان ان الست بتحط حبها ومشاعرها في اكلها...فاكيد لو مكتئبه هيبقى وحش

    عموما حمد الله ع السلامه.... وربنا يرزقك حسن الخاتمه

    بوست اكثر من رائع

    تحياتي

    ReplyDelete
  7. الانسان بتقابله لحظات انكسار كتيره
    و بيبقى متخيل انه مش حيقوم منها و انها نهايه العالم
    لكن سبحان الله فى عز الضلمه ربنا بيفتحله طاقه نور تدله و تهديه و تغير حياته و تشده لبره الكآبه اللى هو فيها

    و طبعا ترجع اكله للاحسن
    غالبا ربنا بعتلك الشيف اسامه
    ههههههههههههههههههههه

    ReplyDelete
  8. تدوينة رائعة جداً ...

    ربنا ييسرك الامور و تبقي متفائلة دائماً ...

    زي ما ربنا بيقول ( إن مع العسر يسراً ...إن مع العسر يسراً )
    و الواحد بينسي أي حاجة أثناء تعبه و همه بس بيفتكر حاجة واحدة بس أنه اقوي و أفضل و أحسن بعد المحنة ....

    ReplyDelete
  9. بوست تفائلى كويس جدا نادر الوجود فى التدوين اليومين دول
    بس سؤال صغير اكتئاب الحمل دا بيجى للستات بس اصل الاعراض دى عندى برضه؟
    جميل ان نبص للحياه بالشكل دا ادعى لى اوصل للمرحله دى لان فعلا الدنيا مش مستاهله

    ReplyDelete
  10. مش عارفة اقولك ايه
    ف البداية ربنا يعوضك خير ان شاء الله
    ثانيا عاجبني اوي نظرتك الايجابية والواضحة ف المدونة عموما
    الحمدلله علي كل شئ

    " بحبك فـ الله " ^_^

    ReplyDelete
  11. عارفة السر في ايه؟
    السر انك اتصالحتي مع نفسك
    لما البني ادم بيتصالح مع نفسه.....كل حاجة في الدنيا بتكون حلوة بجد
    ربنا يحلي ايامك

    ReplyDelete
  12. الاخت العزيزة / انسانة

    بوست جميل .. ولن اعيد تكرار كلام لا بد انك سمعتيه مرار وتكرارا .. - وهو حق واحق ان يتبع - من ووجوب الرضا بما قسمته الاقدار .. وان ما حدث هو خير الامور واحسنها .. وما الي ذلك ... ولكن بما ان الله قد انار بصيرتك .. وازال الحزَن عنك فلابد ان اذكرك بامرين هما

    اولا : ان من واجبات الانسان تجاه نفسه ان يعيش سعيدا في هذة الحياة... ولابد ان يبحث عن موطن سعادته .. ويقنع نفسه به .. وصدقيني .. اجد كثيرا ممن حرمتهم الظروف من اشياء كثيرة .. يعيشون في سعادة ورضا .. وذلك لانهم استطاعوا ان يكيفوا انفسهم مع ظروفهم ويستخرجوا ما يجعلهم في حالة من الرضا والسلام النفسي

    ثانيا : بما ان حالة الحزن والاكتئاب قد انقشعت عنك - بحمد الله ومشيئته - فإن عليك دينا يلزم ان تؤديه ... وهو ان تقومي بتعويض من حولك عما قاسوا من ويلات .. وهم يرونك علي هذة الحالة ... فصدقيني لست وحدك التي كنت تتعذبين ... ولكن من حولك تعذبوا بمقدار ربما يزيد عنك .. نظرا لانك لم تكوني تعطينهم فرصة ليخففوا عنك ويلات ما كنت فيه ... فابدأي بدعوتهم علي الطعام تعدين فيه اشهي ما تستطيعين اعداده ... تعويضا عن فشلك السالف في اعداد المكرونة ... ههههههه

    ادام الله عليكي وعلي من حولك متعة الايمان والصحة - اكبر واعظم النعم -وادام عليكم السعادة ... والرضا ... امين ... والسلام عليكم

    ReplyDelete
  13. أنتِ إنسانة جدا

    تحية لقلبك

    ReplyDelete
  14. بارك الله فيكى و عوضك خير لا تيأسى من رحمة الله و ادعى و اذكرى الله كتير و انشاء الله ربنا هيعوضك
    :)

    ReplyDelete
  15. دخلت عشان ارد زيارتك لمدونتي..شوفت عقلية محترمة..ومشاعر انسانية غير مغلفة بورق مزركش..كوني انت كما انت..هذه منحة تستحق الشكر لأن البعض يعجز أن يكون..!
    (:
    دمت بخير

    ReplyDelete
  16. أهم حاجة عندي إنك عارفة وإعترفتي بنفسك إن الأكل بااااااااااااااااااايظ و عايز يتظبط ، بس حتي لو ما إتظبطش يعني مش مهم ، برضه ح ناكله
    :D
    أما الإبتلاء فهو أكيد من فضل الله علينا ، لأننا مش بنعرف الخير فين والإحتمال الأرجح إن الخير ده مش بيكون دايما في اللي إحنا عايزينه ، والذكري اللي أنا لسة فاكرها من كل اللي حصل في الـ 182.621099 يوم دول هي صورتك وإنتي خارجة من أودة العمليات وبتدعي لي
    بالذمة فيه حد أجمل من كدة في الدنيا ؟
    بس لو المكرونة تتظبط ؟؟
    :D:D

    ReplyDelete
  17. و لسوف يعطيك ربك فترضي

    ربنا يعوضيك خير يا ياسمين

    ReplyDelete

الكلمـة نـور .. وبعـض الكلمـات قبـور