Monday, May 17, 2010

رشدنيّ ... شكراً


من أول ما بدأ الكلام عن أزمة نهر النيل ومجرد التفكير فى الموضوع بيرعبني

يعني ايه مايبقاش عندنا ماية؟!!!ا

يعني حنموت من العطش؟

يعني حيبقى عندنا مجاعة وحننقرض؟

الذعر اللى جوايا إبتدا يزيد مع تفاقم الأزمة

يوم توقيع الاتفاقية من غير مصر كان يوم حزين جداً

كنت عايزة أعيط أوي

حد عزيز عليا وحيروح مني

تاريخي وحضارتي وأرضي وبلدي

مستقبل عيالي وأهلي

شئ بشع بجد

والأبشع منه إن محدش حاسس ببشاعته دي وخطورة الوضع

مش حطول عليكوا .. قولوا طولي

نوارة حبيبتي طلبت إننا نكتب مقتراحتنا عن حل أزمة المياه بنفسنا

مع التركيز على دور المواطن فى ترشيد المياه

أنا قعدت أمخمخ وطلعتلكوا بشوية المقترحات المتواضعة دي

أولاً

غسيل المواعين بياخد ماية كتير أوي

فى فكرة جميلة ممكن توفر الماية فى غسيل المواعين

نملى طبق كبير ونحط فيه الصابون وكل المواعين

وندعكهم واحد واحد ونبدأ نشطفهم فى طبق تاني كبير بماية جارية

سرسوب صغير مش كبير

بكدة نبقى وفرنا فى الماية اللى بتفضل تروح أثناء ما بنكون بندعك فى الحلل

ثانياً

غسيل الأسنان مأساة

الواحد من دول يفضل يدعك فى سنانه ولا كأنه ماسك فرشة بلاط

وياريتها بتبيض فى الآخر

المهم إن الدعك ده كله بيكون أثناء فتح الحنفية

فياريت تقفلوا الحنفية وانتوا بتغسلوا سنانكوا

ثالثاً

شرب الشاي والقهوة والحاجات الساقعة

طبعاً مش محتاجة أقول إن المكيفات كلها بتستهلك كمية ماية رهيبة يومياً

في ناس بتشرب شاي بكميات كبيرة بجد

بلاش نشرب شاي

أو قهوة

خدوا برشام منبه

أو يخترعوا برشام فيه نفس نسبة الكافيين اللى فيهم

أما الحاجات الساقعة فياريت نقفل شركات الحاجة الساقعة

عشان نوفر الماية

مش يبقى فقر وعنطزة

مش لاقيين الماية وبنشرب فى شويبس وبيبسي

وكوكاكولا تطلع تغيظنا فى الإعلانات

العطشانين بيشجعوا مصر وإحنا معاهم

رابعاً

المصايف

المصايف مشكلتها تكمن فى الإستحمام بعد الخروج من البحر

يعني مش كفاية ماية البحر اللى رطبت على قلبه

لا كمان يخلصلنا فى ماية النيل

فى إمتزاج لوزعي مرعب بين مياه النيل والبحر على جتت أخونا المصيف

يااخوانا بالله عليكم

اللى عايز ينزل البحر يستحمل الملح ومايخلصلناش النيل بتاعنا بقى

خامساً

حمامات السباحة والنوافير

ياريت يختفوا خالص توفيراً للمياه .. والكلور طبعاً

سادساً

غسل سلالم العمارات بخرطوم المياه

والماية مفتوحة على الآخر لغسل سلم عمارة قد تصل أدوارها لأكتر من 15 دور .. تخيلوا؟

سابعاً

غسيل السجاجيد طبعاً متعة عند البعض

بلبطة بقى وحنفية مفتوحة أو خرطوم

خصوصاً لو فوق السطح فى عز الحر

لا ياست الكل وفري الماية بكرة ممكن تعطشي

والسجاجيد ساعتها مش حتنفعك

ثامناً

إلغاء هذا المبدأ المدمر

إديها ماية تديك طراوة

فيجتهد البعض فى الرشرشة قدام المحل بخروطوم الماية

عشان الحر

يوم توقيع الاتفاقية المنيلة بنيلة لاقيت صبي قهوة

ماسك خرطوم وهاااااااااتك يارش

بجد قلبي وجعني أوي

كان نفسي جداً أنزل أتخانق معاه

أو أجري على حنافية المية أقفلها

تاسعاً

أزايز الماية المعدنية المترشقة فى أي ندوة أو مؤتمر

دايماً محدش بيشرب

وفي الغالب الماية دي مهدرة

عاشراً

لما حد يجي يزورنا فى البيت نحول السؤال الأزلي من

تحب تشرب ايه؟

إلى: تحب تاكل ايه؟ ولا عامل ريجيم؟

حداشراً

إلغاء الحموم بالدوش والعودة لزمن الحموم الجميل

زمن الأصالة

وإستخدام الطشت والكوز

إتناشراً

بدل شد السيفون كل شوية وعمال على بطال

نشده مرة واحدة بس فى اليوم

والأسرة كلها تتجمع بمناسبة شد السيفون

كأحد الطقوس اليومية الأسرية الطبيعية

تلاتاشراً

الوضوء

انا أعرف ناس بتخلص حصة مصر كلها فى الوضوء الواحد

جبتلكم فيديو رائع عن إختراع عجيب جداً

إسمه

جهاز الوضوء الأوتوماتيكي


طبعاً ده درب من الخيال بالنسبة لنا

بس أضعف الإيمان ما تزروطتش الدنيا أوي حواليك وانت بتتوضى

سرسوب ماية حلو أوي

وبعد ما تفرد السجادة وتصلي تدعي

إن ربنا يحمي لمصر نيلها والموضوع مايوصلش للحرب

أربعتاشراً

بقترح على مصر لحل الأزمة بشكل نهائي خالص

إنها تبعت لدول منابع النيل أهل النوبة وأسوان

كمبعوثين من مصر لحل الأزمة وتصفية الحسابات

وعمل جلسة عرب أفارقة

يمكن لما يشوفهم سمر زيهم الدم يحن

ونصعب عليهم

ويسيبولنا بق ماية
:(

18 comments:

  1. ولا ياكل معانا الكلام ده ..
    بدل ما مصر تبيع لاسرائيل المياة الجوفية لسيناء ..
    تستثمر المياة الجوفية .
    بدل منحارب الدول دي نثتسمر معاها نبعلت ليها ناس يصلحوا بلادهم .. ويبعتوا ناس يشتغلوا عندنا طبعا احنا بالنسبة ليهم كدول الخليج بالنسبة لينا ..
    افكارك حلوة ... بس لو فكرنا ان بكره المية تتقطع هنفكر الف مرة قبل ما نفرشح فيها

    ReplyDelete
  2. طيب فى حل اسرع واوفر
    بالا ضافاه لحلولك

    يبطلوا فشخرة وهبل ويوقفوا ملاعب الجولف والحدائق اللى بتسحب ميه من الناس علشان الاستهبال بتاعهم
    بالاضافه إلى ما قاله متير بيرزدنت

    ياسمين الخيبه خيبتنا مش خيبة منابع النيل
    لما هيبتك تضيه ..كل كلاب السكك تنبح عليك

    وعدوك ذكى

    ReplyDelete
  3. ما تزعليش منى الكلام اللمكتوب موحة للاقلية للاغنيلء والمستورين شوفتى فيلم الكيت كات 8 عائلات عايشين فى شقة يحمام واحد دة كويس غبة حمام ومية .اكثر من 60 فى المائة من الشعب المصرى لا يوجد مواسير مياة فى منازلهم واكتر من 80 فى المائة لايوجد صرف صحى ,الفلاحات ما زلن يغسلون الملابس على الترعة ويملئون المباة من الحنفية العمومية فى الزلع والبلاليص والاسلامين عاوزين الستات تقعد فى البيت طبعا بيتكلموا زى ما انتى وباقى الشباب المهتمبن بهذا الموضوع للظيقة الوس
    طى
    اغلبية المصرين لا عندهم سيفون علشان يشدوة ولا ساكنين فى غمارات علشان يمسحوا السلالم ولا عندهم غسالات وما يقدروش يمسحوا بيوتهم لان مافيش سراميك ولا حتى بلاط لو نزلت شوية مية على الارض بقت وحلة ولا حتى بيغسلوا سنانهم دول غلابة فوى
    طولت تحياتى

    ReplyDelete
  4. انسانة

    الحوار دة كلة من التربية

    لو ان الولد او البت تشوف الأهل يحفظو على المية

    يعرف ان دة تصرف طبيعى ولازم

    المشكلة تكلم دة يقولك هى جت عليا

    صح هى جت عليك

    لنا اللة

    وفكرة الوضؤ دى جميلة جدا طبعا

    بس على رايك درب من دروب الخيال

    شكرا

    ReplyDelete
  5. http://www.sharmlifeblog.com/2010/05/blog-post_17.html#comments

    ReplyDelete
  6. السودان أرض مصرية


    لم يعد مخطط تقسيم السودان إلى دويلات – بالأمر السري الذي تتداوله أجهزة مخابرات الدول الكبرى بل أصبح متداول فى وسائل الأعلام الأوروبية و الأمريكية . فالسودان سيتم تقسيمه إلى خمسة دويلات هي : دارفور ، جبال النوبة ، الشرق ، السودان الجديد ، السودان الشمالي والمقصود بالسودان الجديد – بداهةً – جنوب السودان. ويهدف هذا المخطط لخدمة "إسرائيل" أولاً وأخيراً، وحرمان العرب من أن يكون السودان الغني بأراضيه الخصبة وموارد المياه "سلة الغذاء العربية"، ومحاصرة واستهداف مصر، بالتحكم في مصدر حياتها، أي مياه النيل، ودفعها لأن تضطر إلى شراء مياه النيل بعد اجتراح قوانين جديدة بتقنين حصص الدول المتشاطئة القديمة والدويلات الجديدة.

    فى تصريحات صحفية عام 2008 قال أستاذ الموارد المائية بمركز بحوث الصحراء، الدكتور أحمد فوزي دياب، “إن الولايات المتحدة تحاول طرح فكرة نقل تخرين المياه من بحيرة ناصر إلى أثيوبيا مع تشجيع مخطط قديم يقضي بمحاولة تحويل مجرى نهر النيل في أثيوبيا...

    باقى المقال ضمن مقالات ثقافة الهزيمة بالرابط التالى www.ouregypt.us

    ReplyDelete
  7. الاخت الفاضلة
    السلام عليكم ورحمة الله وبركاته
    لقد اعجبني المقال جدا وتصادف وانا اقيم جروب علي الفيس بوك اسمه يلا نحافظ علي الميه وارجو وارجو ان تشاركينا فية او ان تأذني لنا بنسخ هذا المقال داخل الجروب
    هذا هو عنوان الجروب
    http://www.facebook.com/topic.php?topic=117&uid=138372932845000#!/group.php?gid=138372932845000
    وهذا هو البريد الالكتروني لمن اراد المالمشاركة
    mostafa_ahmed90@hotmail.com

    ReplyDelete
  8. الكلام ده زى عدمه
    الفعل الفعل الفعل
    قولوا للمسئولين اذا كان هناك مسئول
    تقوم الدوله باصلاح عدادات الميه ( ولا تقوم يالعكس )
    حتى يقوم المواطن بدفع قيمة استهلاكه الفعلى
    وقتها المواطن هيوفر ويرشد لانه هيعمل كده لنفسه اولا
    انما تبوظوا العدادات عشان تاخدوا قيمة اعلى استهلاك
    وتقول لى ترشيد
    ياخى .....

    ReplyDelete
  9. يقول...

    انا ضد ترشيد الاستهلاك
    والحنفيات اللى فى البيت لو شفت حد قفل حنفية بعاقبه
    لانى بادفع الحد الاعلى للاستهلاك
    عايزنى استهلك قليل وافع كتير دا يبقى حرام عليا
    دى دولة لصوص يابا
    06 يوليو, 2010 01:46 م
    iibrahim9 يقول...

    عايز الكلام المفيد خد عندك
    المسئولين فى شركات المياه بعد ان اصبحت شركات وهناك ارباح للتحصيل
    قاموا بافساد جميع عدادات المياه
    اولا حتى لايقوموا بقراءة العدادات لعدم وجود موظفين ولاسباب اخرى
    يقوموا يتحصيل الحد الاعلى للاستهلاك فتزيد نسبة ارباحهم
    لو عايز فعلا تتكلم صح
    قولولى نسبة العدادات البايظة اللى بتدفع اعلى استهلاك كام
    وللموضوع يقية
    اقوم حاليا بالمرور على جميع المدونات التى تتبنى هذا الموضوع الفاشل
    مفيش حد رد عليا
    مفيس مسئول قصدى حرا........... ولا بلاش سلام

    ReplyDelete
  10. كلامك مفيد لكن المشكلة في التنفيذ لان الناس فعلا لا تشعر بالمشكلة اطلاقا
    و اسرافهم في المياه ياتي من الاعتياد و تغيير العادات صعب
    فربما لو زودوا فاتورة المياه ، تبدا الناس تلتزم
    و لو ان ممكن تقوم قيامة الناس لان الغلا استشرى فمش معقول كمان نغلي اماية
    ده اقتراح قنبلة
    و مؤسف

    لكن الناس مش بتعرف قيمة الحاجة الا لما تدفع ثمنها غال
    موديل

    ReplyDelete
  11. موضوع مهم أود طرحه عن طريقك علي كل من يملك منبراً لتثقيف الناس وتوعيتهم. ضرورة توعية الشعب زي ماكان بيتعمل أثناء التجهيز لوقفة 25 يناير. برجاء متابعة الاقتراح علي مدونتي. مع الشكر

    ReplyDelete
  12. الله يبارك فيكي يا بنت بلادي يا مصرية يا أصيلة

    ReplyDelete
  13. http://egyptianyy.blogspot.com/
    مدونة مصرى أصلى

    ReplyDelete
  14. مدونة رائعة حقا والكتابة باسلوب جميل ..واتفضل شرفنى بزيارة مدونتى المتواضعة http://misralmostabal.blogspot.com/

    ReplyDelete
  15. I'm really impressed with your writing skills and also with the layout on your blog. Is this a paid theme or did you modify it yourself? Anyway keep up the excellent quality writing, it is rare to see a nice blog like this one nowadays.

    my weblog ... nintendo 3ds emulator

    ReplyDelete

الكلمـة نـور .. وبعـض الكلمـات قبـور